78
Luhanga na bantu be
Jabbu̱li̱ ya Asafu.
1 Enu̱we bantu banje, mu̱u̱ghu̱we ebi nkwete kwegheesi̱ya.
Mu̱tegheeleli̱ye bighambo ebikwete ku̱lu̱gha mu kanu̱wa kanje.
2 Nkubabu̱ghi̱la mu nsi̱mo
kandi mbaghambile nsi̱ta sya hambele.
3 Bintu ebi twaghu̱u̱ye kandi twamanya,
ebi baataata baatu baatughambiiye.
4 Tatu̱ku̱bi̱bi̱si̱i̱lila baana baabo.
Tukughambila mujo oghukwisa
haa maani̱ ghaa Mukama,
haa bikoluwa biye byamaani̱
kandi na byakuswekani̱ya akukolagha.
5 Luhanga akaha bilaghilo bantu baa I̱saaleeli̱,
baasukulu baa Yakobbo.
Aalaghila baataata baatu aba,
ku̱byegheesi̱ya baana baabo.
6 Aakola atiyo niikuwo mujo oghu ghumanye bilaghilo ebi,
na baana aba baku̱byala
kandi baana aba babyegheesi̱ye baana baabo.
7 Aakola atiyo niikuwo bantu baa bu̱li̱ mujo beesighe Luhanga.
Bataabululuwa ebi akukolagha
kandi bakwate bilaghilo biye.
8 Ebo bataba nga baataata baabo,
abeefooye ntaaghu̱wa kandi bajeemi̱.
Aba mitima yabo etaagumiiyʼo Luhanga.
Tabaamwesi̱ghi̱ye mu myoyo yabo.
9 Mahe ghaa bantu baa Efulahi̱mu̱, nankabha mbaabaagha bakwete mata,
haa kilo kya bulemo bakaaluka.
10 Tabaakwete ndaghaano ya Luhanga.
Baabhenga kukwata bilaghilo biye.
11 Baabululuwa ebi aakoli̱ye
kandi byakuswekani̱ya ebi baabonagha naakola.
12 Aakolagha byakuswekani̱ya mu maaso ghaa baataata baabo,
mu kyalo kya Johani̱, mu ehanga lya Mi̱si̱li̱.
13 Aati̱yamu nanja kabili kandi maasi gheemilila nga bisiika,
ebo baaghikwamilamu.
14 Ntangaali̱ aaghendagha abahikiiye na kicu.
Mukilo aaghenda abahikiiye na kyeleeli̱ kya mulilo.
15 Aati̱ya bikuka mu elungu,
aabaahilamu maasi ghakani̱ye ghaa kunuwa.
16 Aabaahila maasi mu kikuka,
ghaasenda nga maasi ghakani̱ye.
17 Bhaatu beeyongela ku̱si̱i̱sa.
Baajeemela Luhanga wa Eghulu Munu mu elungu.
18 Baalengesa Luhanga mu mitima yabo,
mbamusaba byokuliya ebi ebo baabbalagha.
19 Baabu̱ghʼo Luhanga mbaghila bati,
“Luhanga taakugubha kutuha byokuliya mu elungu?
20 Majima, akugubha kwati̱ya kikuka maasi ghaalu̱ghemu.
Buuye taakugubha kuha bantu be byokuliya kandi abahe nyama?”
21 Obu Mukama aabaaghu̱u̱ye, aasaaliluwa.
Mulilo ghuwe ghwoki̱ya bantu baa Yakobbo.
Ki̱i̱ni̱gha kiye haa baasukulu be Banai̱saaleeli̱ kyeyongela,
22 nanga bakabhenga ku̱hi̱ki̱li̱ja Luhanga
kandi bataamwesigha kubajuna.
23 Bhaatu aalaghila mwanya kuughulika
kandi aaghula njighi sya eghulu.
24 Aabasindikila byokuliya maanu bantu kubiliya,
aabaha ngano ku̱lu̱gha mu eghulu.
25 Bantu baaliya haa byokuliya bya baamalai̱ka.
Luhanga aabasindikila byokuliya bikani̱ye.
26 Aaleka mwegha ghwalu̱gha bu̱lu̱gha ejooba,
na ghunji eku̱wa ghwahunga mu mwanya hambali baghooneeye.
27 Aabaha nyama sikaniiye kimui nga tu̱u̱tu̱.
Noni̱ esi syakanila kimui nga musene ghwa ki̱si̱yo kya nanja.
28 Aaleka noni̱ esi syasu̱nda hambali baghooneeye,
syeli̱ghi̱i̱li̱li̱ya weema syabo syona.
29 Bantu baaliya nyama kandi baakuta.
Luhanga aabaha ebi baabbalagha.
30 Bhaatu baakala dhee mbaneekumbula nyama.
Obu baanaliyagha byokuliya binabali mu kanu̱wa,
31 Luhanga aabakwatiluwa ki̱i̱ni̱gha.
Aaleka basaasa baamaani̱ abaabaagha mu Banai̱saaleeli̱ aba baaku̱wa.
Aata batabhana aba baali beesi̱ghi̱ye.
32 Nankabha bantu aba mbaaboone ebi byona,
beeyongela ku̱si̱i̱sa.
Baabona byakuswekani̱ya ebi byona,
bhaatu baabhenga ku̱mu̱hi̱ki̱li̱ja.
33 Nahabweki aamalʼo bilo byabo nga mpeu
kandi myaka yabo bali mu bijibu.
34 Luhanga aakaatagha bamui mu bantu aba,
abaati̱ghaayʼo bamukuukʼo.
Beekuukamu kandi baamubbala kwonini.
35 Baasuka ngoku Luhanga aaniiye kikuka kyabo
kandi ngoku Luhanga wa Eghulu Munu aaniiye mu̱cu̱ngu̱li̱ wabo.
36 Bhaatu baabu̱ghagha bisubha byonkaha,
tabaabaagha na majima mu kanu̱wa kaabo.
37 Bakaba batamugumiiyʼo mu mitima yabo,
ndaghaano yee bakaba bataghikwete.
38 Bhaatu Luhanga aabaghililagha kisa,
aabaghanila bubhi bwabo
kandi ataabahwelekeeleli̱ya.
Milundi ekani̱ye aakeehi̱yagha ki̱i̱ni̱gha kiye,
taakyolekagha kyona.
39 Aakimanya ngoku bali bantu kwonkaha,
ngoku bali nga mwegha oghukuhungagha kandi ghusaala.
40 Mu elungu bakamujeemela
kandi baaleka aasaaliluwa milundi ekani̱ye.
41 Beeyongela kulengesa Luhanga
kandi baaleka Ahi̱ki̱li̱i̱ye wa I̱saaleeli̱ naasaaliluwa.
42 Baabululuwa maani̱ ghe
kandi kilo eki aabacunguuye ku̱lu̱gha mu ngi̱ghu̱ syabo.
43 Baabululuwa kilo eki aakoleeyemu byakuswekani̱ya byamaani̱,
mu kyalo kya Johani̱ mu ehanga lya Mi̱si̱li̱.
44 Aahindula maasi ghaafooka saghama.
Banami̱si̱li̱ baabuluwa maasi ghaa kunuwa.
45 Aabatumila nsoola sikani̱ye esyabalumagha
kandi bigbende ebyabhi̱hi̱i̱ye kyalo kyabo.
46 Aaleka bilimuwa byabo byalibuwa njighe
kandi syabhi̱i̱hi̱li̱ya kimui misili yabo.
47 Aahwelekeeleli̱ya mi̱jaabbi̱i̱bbu̱ na mbu̱la ya lubaale
kandi biti mi̱ti̱i̱ni̱ na maasi ghatungeeye.
48 Aaleka mbu̱la ya lubaale yaata nte syabo
kandi bitunguwa byabo aabiita na nkubha.
49 Aababona-boni̱ya kwonini naabooleka kusaakala kuwe,
ki̱i̱ni̱gha kiye kandi kusaaliluwa kuwe,
ebyabaasi̱yʼo nga baamalai̱ka baa lu̱ku̱.
50 Taakeehei̱ye ki̱i̱ni̱gha kiye kedha kukingilila bwomi̱i̱li̱ bwabo,
bhaatu aabaata na kifubilo.
51 Aata baana boona mi̱li̱ghaaso,
abaabaagha mu maka ghoona ghaa Banami̱si̱li̱.*78:51 Ku̱lu̱gha 12:29
52 Ahikila bantu be nga ntaama ku̱lu̱gha mu ehanga lya Mi̱si̱li̱.
Aabalinda obu baakwamilagha mu elungu.
53 Aabahikila kusemeeye niikuwo batoobaha,
bhaatu ngi̱ghu̱ syabo baadhikila mu nanja.
54 Aabatwala haa mutaano ghwa kyalo kiye ki̱hi̱ki̱li̱i̱ye,
haa mwena oghu aasi̱ngu̱u̱ye na mukono ghuwe ghwabuliyo.*78:54 Ku̱lu̱gha 15:17; Yosuwa 3:14-17
55 Aabhinga bantu abaabaagha mu kyalo eki, bantu be banaloli̱ye.
Aaha ntu̱la sya I̱saaleeli̱ kyalo eki nga bugwetuwa bwabo.
Aaleka baatwala maka ghaa bantu aba kuukalamu.
56 Bhaatu Banai̱saaleeli̱ baajeema.
Baalengesa Luhanga wa Eghulu Munu
kandi tabaahu̱ti̱i̱ye bilaghilo biye.
57 Bantu aba beegaali̱ya, baaba abatali beesighibuwa nga baataata baabo.
Baabhiiya nga buta bu̱bhi̱i̱hi̱ye.
58 Baaleka Luhanga aakwatuwa ki̱i̱ni̱gha
nanga ebo kulami̱ya bisasani̱ bya baaluhanga baabo
haagu̱u̱li̱ ya bwena.
Bisasani̱ beekoleeye kulami̱ya ebi, byaleka aasaaliluwa kwonini.
59 Obu Luhanga aabiboone, aakwatuwa ki̱i̱ni̱gha kyamaani̱.
Aabhengela kimui Banai̱saaleeli̱ aba.
60 Aalu̱gha mu ki̱i̱kalo kiye mu kibugha kya Si̱i̱lo,
mu weema ehi̱ki̱li̱i̱ye yee hambali aakalagha mu bantu aba.
61 Aaleka ngi̱ghu̱ syatu baatwala sandu̱u̱ku̱ ya ndaghaano.
Kaakulolelʼo kaa maani̱ ghe kandi ki̱ti̱i̱ni̱sa kiye.
62 Aasaaliluwa kwonini na bantu be
kandi aasi̱i̱mi̱lani̱ya ngi̱ghu̱ syabo kubaata.
63 Batabhana baabo baakwi̱la haa bulemo.
Baana baabukali̱ baabo baabuluwa baa kubaswela.
64 Bahongi̱ baabo baabaata na bihiyo
kandi bataasi̱i̱mi̱lani̱ya bakwi̱si̱ya baabo kutuntula.
65 Haakumaliilila Mukama aasu̱su̱mu̱ka nga muntu aakaaye aghwesaghiiye.
Aaba nga musaasa wamaani̱ aakwete ku̱bu̱gha nʼelaka lyamaani̱ haabwa tamiilo.
66 Aabhinga ngi̱ghu̱ esi aabaku̱u̱ki̱ya enu̱ma,
boona baaghenda bali na kuhemuka kwa bilo nʼebilo.
67 Bhaatu aabhenga baasukulu baa Yojeefu̱
kandi ataakoma baa ntu̱la ya Efulahi̱mu̱.
68 Mu ki̱i̱kalo kyabo aakoma baa ntu̱la ya Yu̱da,
abaakaaye haa mwena Sayu̱u̱ni̱ oghu aabaagha abbali̱ye.
69 Aakwelʼo numba yee ya kulami̱li̱yamu
eghi esu̱si̱ye nga ki̱i̱kalo kiye mu eghulu.
Aaghi̱gu̱mi̱ya nga nsi eghi aagu̱mi̱i̱ye bilo nʼebilo.
70 Aakoma mu̱heeleli̱ya wee Dhau̱dhi̱,
aamuuya hambali ntaama syakalagha.
71 Aamuuya hambali aali̱i̱si̱li̱yagha ntaama.
Aamufoola kuba mu̱li̱i̱si̱ya wa baasukulu baa Yakobbo,
Banai̱saaleeli̱ bantu baa Luhanga.
72 Dhau̱dhi̱ aabaloleelela na mutima ghusemeeye
kandi aabeebembela na magheji.