79
Nsaala ya kucunguluwa kwa ehanga
Jabbu̱li̱ ya Asafu.
1 Ai̱ Luhanga, mahanga ghaasi̱ye mu nsi yaawe.
Baabhi̱hi̱i̱ye numba yaawe ehi̱ki̱li̱i̱ye.
Baahwelekeeleli̱ya Yelusaalemu.
2 Mi̱ku̱ ya baheeleli̱ya baawe baaghihaaye bi̱noni̱ ebikughiliyagha.
Mi̱ku̱ ya bantu baawe yaafooki̱ye byokuliya bya binyama bya mu kisaka.
3 Niibuwo baaseesa saghama ya bantu baawe nga maasi.
Saghama niibuwo yaasenda nga maasi mu Yelusaalemu.
Taaliyo muntu nʼomui oghu ati̱ghaayʼo kujiika abaaku̱u̱ye.
4 Mahanga aghalabhaane naatu niibuwo ghaatwambula.
Bakwete kutusekeelela kandi kutubbaaki̱i̱si̱ya.
5 Mukama, buuye okuukala onatusaaliluuwe ku̱hi̱ki̱ya dhi̱?
Ki̱i̱ni̱gha kyawe kikweyongela kuukala nkinaaka nga mulilo?
6 Ote ki̱i̱ni̱gha kyawe haa mahanga aghataakukulami̱yagha.
Okite haa bantu abatakukusabagha.
7 Baati̱ye bantu baawe baasukulu baa Yakobbo
kandi baabhi̱i̱ya kyalo kyawe.
8 Otatufubila haabwa bibhi bya baataata baatu.
Otughilile kisa endindi,
nanga kunihila kwona kwatuhooyemu.
9 Ai̱ Luhanga, otukoonele kandi otujune.
Otucungule kandi otughanile bibhi byatu,
haabwa ki̱ti̱i̱ni̱sa kya li̱i̱na lyawe.
10 Mahanga ghakugubha ghati̱ya kughila ghati,
“Luhanga waanu ali haa?”
Oleke tulole ngoku okufubila mahanga agha,
haabwa kuseesa saghama ya baheeleli̱ya baawe.
11 Ooghu̱we kutaagha kwa banyankomo
kandi haabwa bu̱toki̱ bwawe,
ojune aba ngi̱ghu̱ syatu bakubbala kwita.
12 Mukama, osasule mahanga agha kifubilo milundi musanju̱,
haabwa kukwambula oku kwona.
13 Du̱mbi̱ etu̱we bantu baawe,
ntaama syʼomu eli̱i̱si̱li̱yo lyawe,
tu̱ku̱ku̱si̱i̱ma bilo nʼebilo
kandi tuukale ntukusinda mu mijo yoona.