80
Nsaala ya ku̱ku̱u̱ki̱ya buhyaka I̱saaleeli̱
Ewaa mukulu wa bilimbo. Kusighikila haa “Eleka lya Bimole lya Ndaghaano.” Jabbu̱li̱ ya Asafu.
1 Ai̱ Mu̱li̱i̱si̱ya wa I̱saaleeli̱, otu̱tegheeleli̱ye.
Uwe oghu akuhikilagha baasukulu baa Yojeefu̱ nga ntaama.
Ositami̱ye haa ntebe yaawe ya bukama,
haagati ya bakelu̱bbi̱.
Oleke kyeleeli̱ kyawe ki̱bbeni̱ye.
2 Weeyoleke bantu baa Efulahi̱mu̱, Bbenjami̱i̱ni̱ na Manase.
Otwoleke maani̱ ghaawe
kandi wiise otujune!
3 Ai̱ Luhanga, otweku̱u̱ki̱li̱ye,
otughilile kisa kandi otujune!
4 Mukama Luhanga waamahe,
oku̱hi̱ki̱ya dhi̱ kuukala onasaaluuwe haabwa nsaala syatu?
5 Waatuhaaye mali̱gha kuba byokuliya byatu.
Waaleki̱ye twanuwa kiikopo kiinamu̱li̱to kiisuuye kyaghʼo.
6 Waatufooye kinughuwa mu mahanga aghalabhaane naatu.
Ngi̱ghu̱ syatu niibuwo baatusekeelela.
7 Luhanga waamahe, otweku̱u̱ki̱li̱ye,
otughilile kisa kandi otujune!
8 Okaaya mujaabbi̱i̱bbu̱ mu Mi̱si̱li̱.
Waabhinga bantu bʼomu mahanga ghanji
kandi waaghuhelamu.
9 Okaghubaghaalila niikuwo ghukule.
Mi̱li̱ yaghuwo yaatobheela mu etaka
kandi ghwamalakaka nsi yaatu yoona.
10 Ki̱i̱ku̱dhu̱ kyaghuwo kyaswi̱ki̱la myena
kandi matai ghaaghuwo ghaswi̱ki̱la bi̱i̱looku̱.
11 Matai ghaaghuwo agha ghaakula,
ghaahi̱ka haa nanja Medi̱teleni̱yani̱
kandi na haa maasi Efulaati̱.
12 Waaseesi̱ye bisiika ebyeli̱ghi̱li̱i̱ye mujaabbi̱i̱bbu̱ oghu nangaaki?
Oghu akaakusaalagha akunoghagha haa bi̱ghu̱ma byaghuwo.
13 Mpunu sya mu kisaka sikughukpeetagha
kandi binyama bya mu kisaka bighuliya.
14 Ai̱ Luhanga waamahe, otukuukʼo.
Otulole onali mu eghulu
kandi wiise ojune bantu baawe.
15 Wiise ojune mujaabbi̱i̱bbu̱ ghwawe oghu waaheli̱ye.
Oghu waaleki̱ye ghwakula
kandi ghwaba ghwamaani̱.
16 Ngi̱ghu̱ syawe baajombi̱ye mujaabbi̱i̱bbu̱ oghu
kandi baaghwoki̱ya.
Obooleke ki̱i̱ni̱gha kyawe
kandi obahwelekeeleli̱ye.
17 Ote mukono ghwawe ewaa oghu ali haa mukono ghwawe ghwa buliyo.
Mwana wa muntu oghu uwe weenini waafooye wamaani̱.
18 Tatukutodha ku̱ku̱lu̱ghʼo bbaa,
otuhe bwomi̱i̱li̱ kandi tukukusinda.
19 Ai̱ Mukama Luhanga waamahe, otweku̱u̱ki̱li̱ye,
otughilile kisa kandi otujune!