81
Ewaa mukulu wa bilimbo. Kusighikila haa du̱ngu̱. Jabbu̱li̱ ya Asafu.
1 Mulimbe nʼelaka lyamaani̱ mu̱dheedheeu̱we
ewaa Luhanga oghu akutuhaagha maani̱.
Mulimbile Luhanga wa Yakobbo musemeleeuwe.
2 Mulimbe mu̱dheedheeu̱we, nimuteela buuciki-ciki,
du̱ngu̱ kandi maali̱kembe.
3 Muteele ki̱i̱di̱yo kya ki̱ghenu̱,
obu kweli̱ kukuba nkudhuuka
kandi ku̱bbeneleei̱ye kimui.
4 Kini nkilaghilo ewaa Banai̱saaleeli̱,
eki Luhanga wa Yakobbo aataayʼo.
5 Akakitʼo kuba kilaghilo mu baasukulu baa Yojeefu̱,
obu Luhanga aaghendi̱ye ku̱lu̱mba ehanga lya Mi̱si̱li̱.
Nkaaghu̱wa elaka eli nteetegheleei̱ye,
6 elyaghilagha liti, “Nkabaayʼo nku̱mba haa mighongo.
Naabaayʼo milimo yamaani̱ mwakolagha.*81:6 Bbai̱bbu̱li̱ sinji sighambi̱ye kuheeka bighegha mu ngalo.
7 Obu mwabaagha mu bijibu, mukambilikila naabajuna.
Naabakoonela ndi mu ki̱i̱kalo kya nsi̱ta mu kubbyoka mu kicu.
Naabalengesa obu mwabaagha haai na maasi Meli̱ba.
8 Enu̱we bantu banje, mu̱tegheeleli̱ye kuhabula kwanje.
Banai̱saaleeli̱ enu̱we, mu̱u̱ghu̱we ebi nkubaghambila!
9 Mutaliba na luhanga onji mu enu̱we*81:9 Ku̱lu̱gha 20:2
kandi mutalilami̱ya luhanga onji weena.
10 Ni̱i̱si̱ye Mukama Luhanga waawe oghu nkakuuya mu ehanga lya Mi̱si̱li̱.
Waasami̱ye kanu̱wa kaawe, nkukaasu̱li̱ya.
11 Bhaatu bantu banje tabaku̱ntegheeleli̱yagha.
Banai̱saaleeli̱ aba tabakundhootelagha.
12 Nahabweki nanje naabaleka mu butalibani̱ja bwabo
kandi kuukala mbanakola ebi babbaali̱ye.
13 Neekumbulagha bantu banje Banai̱saaleeli̱ aba banji̱ghu̱wa
kandi balubhatangila mu kihanda kyanje!
14 Nangu̱bhi̱ngi̱ye bwangu ngi̱ghu̱ syabo
kandi nsi̱ngu̱la bananji̱ghu̱wa baabo aba.
15 Aboohi̱ye Mukama aba bangumudhooteeye,
nanga kifubilo kyabo ni kya bilo nʼebilo.
16 Bhaatu enu̱we nkubaha ngano esemeleeye kimui
kandi mbaaku̱ti̱ye na bwoki obu̱lu̱ghi̱ye mu kikuka.”