97
Mukama niiye mu̱lemi̱
1 Mukama niiye alemi̱ye, oleke nsi edheedhuwe.
Oleke bantu abali mu byalo bi̱seli̱ye
ebi maasi gheeli̱ghi̱li̱i̱ye basemeeleluwe.
2 Bicu kandi mweli̱ma ghwamaani̱ bi̱mweli̱ghi̱li̱i̱ye.
Bu̱hi̱ki̱li̱i̱le kandi bwengani̱ja niibiyo musingi ghwa ntebe yee ya bukama.
3 Mulilo ghukughendagha ghumuhikiiye
kandi ghu̱kwoki̱yagha ngi̱ghu̱ siye abali haa bu̱li̱ luhande.
4 Nkubha yee ekubbyokagha,
nsi yoona ekughibonagha kandi etukumila.
5 Myena ekunuunuutagha nga ki̱hu̱lo mu maaso ghaa Mukama.
Mu maaso ghaa Mukama oghu alemi̱ye nsi yoona.
6 Eghulu lilangilile bu̱hi̱ki̱li̱i̱le buwe
kandi bantu boona babone ki̱ti̱i̱ni̱sa kiye.
7 Boona abakulami̱yagha bisasani̱ bakubaagha bahemu̱ki̱ye.
Bakwepankagha haabwa baaluhanga baabo abatali na mughaso.
Baaluhanga baabo aba baku̱teeli̱yagha mu maaso ghaa Mukama.
8 Ai̱ Mukama, bantu baa Sayu̱u̱ni̱ badheedheeu̱we
kandi na maatau̱ni̱ ghʼomu nsi ya Yu̱da ghasemeleeuwe,
haabwa ku̱twi̱la kwawe musango mu bwengani̱ja.
9 Ai̱ Mukama oli wa Eghulu Munu munsi yoona.
Osaai̱ye baaluhanga boona.
10 Mukama aku̱ndi̱ye bantu aboohi̱ye bubhi.
Akulindagha bwomi̱i̱li̱ bwa bantu be.
Akubajunagha ku̱lu̱gha mu maani̱ ghaa bantu babhi.
11 Kyeleeli̱ ki̱ku̱bbeneli̱yagha bantu bahi̱ki̱li̱i̱ye
kandi bantu abali na mitima esemeeye aba badheedhuwa.
12 Enu̱we boona bantu bahi̱ki̱li̱i̱ye mudheedheluwe mu Mukama
kandi musinde li̱i̱na liye li̱hi̱ki̱li̱i̱ye.