96
Mukama niiye alemi̱ye
1 Mulimbile Mukama, kilimbo kihyaka.
Mulimbile Mukama enu̱we bantu baa munsi yoona.
2 Mulimbile Mukama kandi mu̱si̱i̱me li̱i̱na liye.
Mulangilile bu̱li̱ kilo ngoku akujunagha bantu.
3 Mughambile bantu baa mu mahanga ngoku ali na ki̱ti̱i̱ni̱sa.
Mughambile bantu boona byakuswekani̱ya ebi akukolagha.
4 Mukama ni mukulu kandi abhonganuuwe kumusinda kwonini.
Abhonganuuwe ku̱mu̱hu̱ti̱ya kusaali̱ya baaluhanga banji boona.
5 Baaluhanga baa mahanga ghanji ni bisasani̱ kwonkaha,
bhaatu Mukama niiye akahanga eghulu.
6 Ali na ki̱ti̱i̱ni̱sa kandi bukulu.
Maani̱ kandi kusemela biisuuye mu numba yee.
7 Musinde Mukama enu̱we bantu baa munsi yoona.
Mumusinde haabwa ki̱ti̱i̱ni̱sa kiye kandi maani̱ ghe.
8 Muhe Mukama ki̱ti̱i̱ni̱sa eki abhonganuuwe.
Muleete bihonguwa kandi mwise mu numba yee.
9 Mulami̱ye Mukama mu ki̱ti̱i̱ni̱sa kya bu̱hi̱ki̱li̱i̱le buwe.
Oleke bantu baa munsi yoona baase mu maaso ghe mbatukumila.
10 Mughambile mahanga ghoona muti, “Mukama niiye alemi̱ye!
Nsi yoona akaghi̱gu̱mi̱ya, teekugubha kudhinga-dhinga.
Aku̱twi̱la bantu boona musango mu bwengani̱ja.”
11 Oleke eghulu lidheedhuwe kandi nsi esemeeleluwe!
Oleke nanja na ebilimu byona bimusinde nʼelaka lyamaani̱!
12 Oleke misili na bilimuwa ebilimu bidheedheluwe kimui!
Oleke biti ebili mu ki̱bhi̱li̱ bilimbe bisemeleeuwe,
13 obu Mukama akwisa.
Akwisa ku̱twi̱la nsi musango,
aku̱twi̱la bantu boona musango mu bwengani̱ja kandi mu majima.