95
Kilimbo kya kusinda
1 Mwise, muleke tulimbile Mukama
kandi tumusinde nʼelaka lyamaani̱ lya kudheedhuwa.
Eye niiye kikuka kyatu kandi kujunuwa kwatu!
2 Muleke twise mu maaso ghe ntu̱si̱i̱ma.
Tumulimbile tu̱dheedheeu̱we bilimbo bya kumusinda,
3 nanga Mukama ni Luhanga wamaani̱.
Niiye Mukama oghu asaai̱ye baaluhanga boona.
4 Kutobheela kwa nsi akukwete mu ngalo siye.
Myena eghi ekangamiiye kimui ni yee dhee.
5 Nanja ni yee, nanga niiye akaghikola.
Ngalo siye niisiyo syakoli̱ye etaka.
6 Mwise, muleke tugombe hansi kandi tumulami̱ye,
muleke tu̱teeli̱ye mu maaso ghaa Mukama Muhangi̱ waatu.
7 Niiye Luhanga waatu,
tuli bantu bʼomu eli̱i̱si̱li̱yo liye
kandi ntaama siye aloleleeye.
Obwalo nimwanaaghu̱u̱ye elaka liye,
8 mutatimbiikani̱ya mitima yaanu,
ngoku kyabaaye e Meli̱ba kandi e Masa mu elungu.
9 Mu elungu, baataata baanu bandengesagha kandi bampakani̱ya,
nankabha mbaabonagha bilungi ebi naabakolelagha.
10 Nkasaaliluwa na mujo oghu kumala myaka maku̱mi̱ anaa.
Naaghila nti, “Tabampu̱ti̱i̱ye mu mitima yabo
kandi bakubhengagha kukola ebi mbalaghiiye.”
11 Niikiyo kyaleki̱ye naalahila ndi na ki̱i̱ni̱gha nti,
“Tabalitaaha mu ki̱i̱kalo kyanje kya kuhuumula.”