94
Mukama niiye akufubilagha
1 Ai̱ Mukama Luhanga, nuuwe okufubilagha aba musango ghu̱si̱ngi̱ye.
Weeyoleke ngoku oli, ti̱ obafubile endindi.
2 Oomuke, uwe oghu oku̱twi̱lagha nsi yoona musango.
Ohe kifubilo ekibhonganuuwe bantu abali na myepanko aba.
3 Ai̱ Mukama, bantu babhi baku̱hi̱ki̱ya dhi̱,
kweghonja kandi kudheedhuwa?
4 Bantu babhi aba baku̱bu̱ghagha bighambo bya kwebhi̱mba-bhi̱mbi̱ya
kandi baasuuye myepanko.
5 Ai̱ Mukama, bakukpeetaagulagha bantu baawe
kandi babona-boni̱ya abakweghilagha bati ni baawe.
6 Bakwitagha bakwi̱si̱ya na baghenu̱
kandi bajinda nku̱u̱bbi̱.
7 Bakughilagha bati, “Mukama taatuboone.
Luhanga wa I̱saaleeli̱ taamani̱ye ebi tukwete kukola.”
8 Mwetegheeleli̱ye, enu̱we abatali nʼeki mumani̱ye mu bantu.
Badhoma enu̱we, mukufooka dhi̱ bagheji?
9 Eye oghu akatutʼo matui,
buuye taakugubha ku̱u̱ghu̱wa?
Eye oghu akakola maaso,
buuye taakugubha kubona?
10 Eye oghu akufubilagha mahanga,
buuye taakufubila naanu dhee?
Eye oghu akwegheesi̱yagha bantu magheji,
buuye taamani̱ye dhee ebi mukwete kukola?
11 Mukama amani̱ye byeli̱li̱kano bya bantu
ngoku bitali na mughaso.
12 Ai̱ Mukama, bali na mu̱gi̱sa aba okuhanagha,
aba okwegheesi̱yagha bilaghilo byawe.
13 Okubahu̱u̱mu̱li̱yagha mu bwile bwa kubona-bona.
Okukola eki ku̱hi̱ki̱ya bantu babhi babalimiiye ki̱i̱na kya kwegengamu.
14 Mukama taakubhenga bantu be
kandi taaku̱lu̱ghʼo abali be.
15 Bwengani̱ja bukukuuka haa bahi̱ki̱li̱i̱ye
kandi abali na mitima esemeeye, bakubukwamilila.
16 Ni ani̱ akuumuka kunsaghika kulwani̱i̱si̱ya bantu babhi?
Ni ani̱ akwemilila kunkwati̱i̱si̱ya kuhakani̱ya bantu babhi aba?
17 Nguli Mukama atankooneeye,
nangubaaye nku̱u̱ye.
18 Ai̱ Mukama, obu naaghi̱li̱ye nti, “Bighele byanje bili matelebuka,”
wankwatilila haabwa kukunda kwawe kwamaani̱.
19 Nkaakubaagha ntuntuuye,
oku̱mpu̱u̱mu̱li̱yagha kandi oleka ndheedhuwa.
20 Tookukolanganagha na bacu̱ baa misango babhi,
abaku̱tu̱waagha misango etali mu bilaghilo.
21 Bakwelungani̱yagha kwita bantu bahi̱ki̱li̱i̱ye.
Baku̱twi̱lagha musango ghwa ku̱ku̱wa bantu abatali na musango,
22 bhaatu Mukama niiye kigho kyanje ki̱gu̱mi̱ye.
Luhanga wanje niiye kikuka kya buulukilo bwanje.
23 Akufubila bantu babhi, haabwa bubhi bwabo.
Abahwelekeeleli̱ye haabwa bibhi byabo.
Mukama Luhanga waatu akubahwelekeeleli̱ya.