109
Nsaala ya muntu bakutwalikani̱ya kubhi
Ewaa mukulu wa bilimbo. Jabbu̱li̱ ya Dhau̱dhi̱.
1 Ai̱ Luhanga oghu nkusindagha,
gutu otaholi̱ya!
2 Bantu babhi kandi abakudimaagagha baasami̱i̱ye kanu̱wa kaabo,
bakwete ku̱mbu̱ghʼo bisubha.
3 Baku̱bu̱ghagha ngoku banjohi̱ye
kandi bandwani̱i̱si̱ya batali na nsonga.
4 Si̱ye nku̱ndi̱ye bantu aba, bhaatu ebo bakumpakani̱yagha.
Eki nkukolagha, nkubasabilagha.
5 Nkaakubakolagha kulungi, ebo bankola kubhi.
Nkaakubakundagha, ebo banjoha.
6 Okomele ngi̱ghu̱ yanje mu̱cu̱ wa misango mubhi ku̱mu̱twi̱la musango.
Oleke omui mu ebo aaliiye aamunyegheelela.
7 Naamunyegheleeye, oleke musango ghu̱mu̱si̱nge,
nsaala yee ebaluwe nga kibhi.
8 Oleke bilo bya bwomi̱i̱li̱ buwe bikeehe
kandi muntu onji atwale mulimo ghuwe.
9 Oleke baana be bafooke nku̱u̱bbi̱
kandi mukali̱ wee abe mu̱kwi̱si̱ya.
10 Oleke baana be baakalaghe mbayaaya kandi mbasaba-saba.
Oleke babhinguwe mu bi̱hu̱ma bakwete kulaalamu.
11 Oleke abakwete kumutonga batwale bintu biye byona
kandi ebi akwete kukola bantu aba atamani̱ye babitwale.
12 Atabʼo muntu nʼomui oghu akumughilila kisa,
kedha kuloleelela nku̱u̱bbi̱ esi ati̱ghi̱ye.
13 Baasukulu be boona baku̱we
kandi bamuubululuwe mu mujo oghukulabhʼo.
14 Oleke Mukama aasuke bibhi bya baataata be,
na kibhi kya ni̱na wee, atakighanila.
15 Mukama, ookalaghe noosuka bibhi byabo
kandi ebo babaabululuwe munsi.
16 Tabakweli̱li̱kanaghʼo kughilila bantu kisa.
Bakubona-boni̱yagha kandi baata banaku,
abali mu bwetaagho kandi abatali na bu̱kooneli̱.
17 Babbali̱ye kukiina,
oleke nabo bakiinuwe!
Boohi̱ye kuha bantu mu̱gi̱sa,
oleke nabo batatunga mu̱gi̱sa.
18 Kukiina baakufooye nga ngoye balu̱wete.
Kwabataahiiye kimui mu mubili nga maasi
kandi mu maku̱wa nga magita.
19 Oleke kukiina oku kubafookele nga ngoye balu̱wete
kandi nga mu̱ci̱pi̱ beebohi̱ye bwile bwona.
20 Mukama, ofubile ngi̱ghu̱ syanje syona mu mulingo oghu,
abakwete ku̱mbu̱ghʼo bintu bi̱bhi̱i̱hi̱ye.
21 Bhaatu uwe, Ai̱ Mukama Luhanga wanje,
onkoonele haabwa li̱i̱na lyawe.
Oncungule haabwa bulungi bwa kukunda kwawe kwamaani̱,
22 nanga ndi munaku kandi ndi mu bwetaagho,
mutima ghumputaaye munda.
23 Ndi haai kuhuwʼo nga ki̱i̱ku̱du̱ kya lwagholo.
Ndi nga lujighe olu mpwegha ekwete ku̱hu̱ngi̱ya.
24 Malu̱ ghanceki̱ye haabwa ku̱si̱i̱ba,
noolobeeye kimui kandi ndi maku̱wa ghonkaha.
25 Ngi̱ghu̱ syanje bakwete kumpwawaani̱ya.
Bakaakumbonagha, bansekeelela mbanadhi̱ngi̱ya mituwe yabo.
26 Ai̱ Mukama Luhanga wanje, onkoonele!
Onjune haabwa kukunda kwawe kwamaani̱.
27 Oleke ngi̱ghu̱ syanje bamanye
ngu nuuwe okunjunagha.
28 Nankabha ebo bankiina, bhaatu uwe okumpa mu̱gi̱sa.
Oleke abakwete kumbona-boni̱ya aba bahemuke,
bhaatu si̱ye mu̱heeleli̱ya waawe, ndheedhuwe.
29 Oleke ngi̱ghu̱ syanje baswajibuwe.
Oleke nsoni̱ sibamalakake nga ngoye balu̱wete.
30 Nku̱si̱i̱ma Mukama nʼelaka lyamaani̱.
Nkumusinda mu ki̱bbu̱la kya bantu bakani̱ye,
31 nanga akwemililagha haa mukono ghwabuliyo,
ghwa abali mu bwetaagho.
Akubajunagha abakubatwi̱la musango ghwa ku̱ku̱wa.