108
Nsaala ya kusaba bu̱kooneli̱
Kilimbo. Jabbu̱li̱ ya Dhau̱dhi̱.
1 Ai̱ Luhanga, mutima ghwanje ghu̱gu̱mi̱ye,
nkulimba kandi nkusinde,
na mutima ghwanje ghwona.
2 Osu̱su̱mu̱ke uwe du̱ngu̱ kandi li̱kembe.
Ndasu̱su̱mu̱kagha nkyambisi cu̱i̱-cu̱i̱ kulimba.
3 Ai̱ Mukama, nku̱ku̱si̱i̱ma mu bantu boona,
nkulimba ninkusinda mu mahanga.
4 Kukunda kwawe kwamaani̱ kuli eghulu munu.
Bwesighibuwa bwawe bu̱hi̱ki̱i̱ye kimui eghulu mu bicu.
5 Ai̱ Luhanga, woolekele eghulu mu mwanya bukulu bwawe
kandi ki̱ti̱i̱ni̱sa kyawe kimalakake munsi yoona.
6 Otujune na mukono ghwawe ghwabuliyo
kandi okuukemu kusaba kwanje,
niikuwo aba oku̱ndi̱ye bagubhe kucunguluwa.
7 Luhanga akabu̱gha ali mu ki̱i̱kalo kiye ki̱hi̱ki̱li̱i̱ye ati,
“Nkutambulani̱yamu ndheedheeu̱we tau̱ni̱ ya Sekeemu
kandi ngabile bantu banje kighona kya Su̱kooti̱.”
8 Byalo bya Gi̱li̱yaadi̱ na Manase ni byanje.
Efulahi̱mu̱ niiye kiisipeewa kyanje kya kyoma,
Yu̱da niiye mwi̱gho ghwanje ghwa bukama.
9 Mowaabu niiye bbaafu yanje nkunaabilaghamu,
Edomu niiyo ndikuba nkai̱to syanje,
mu Fi̱li̱si̱ti̱ya niiyo ndi̱bu̱ghi̱la nʼelaka lyamaani̱ lya bu̱si̱ngu̱li̱.
10 Ni ani̱ alintwala mu kibugha ekili na bigho bi̱gu̱mi̱ye?
Ni ani̱ akumpikila kuntwala mu kyalo kya Edomu?
11 Ai̱ Luhanga, majima waatu̱bhengi̱ye?
Tookutodha kughenda hamui na baasilikale baatu?
12 Otukoonele kulwani̱i̱si̱ya ngi̱ghu̱ syatu,
nanga bu̱kooneli̱ bwa bantu tabuli na mughaso.
13 Luhanga naabaaye ali hamui naatu tu̱ku̱si̱ngu̱la
kandi akukpeetaagula ngi̱ghu̱ syatu.