KITABO KYAKATAANO
107
(Jabbu̱li̱ 107—150)
Kukunda kwamaani̱ kwa Mukama
1 Mu̱si̱i̱me Mukama, nanga ni mulungi.
Kukunda kuwe ni kwa bilo nʼebilo!
2 Oleke aba Mukama aaju̱ni̱ye bamusinde mbabu̱gha bighambo ebi.
Aba aacunguuye ku̱lu̱gha mu ngi̱ghu̱ syabo.
3 Aabakumaani̱ya ku̱lu̱gha mu mahanga,
ku̱lu̱gha bu̱lu̱gha ejooba kandi bughuwa ejooba,
ku̱lu̱gha elughulu kandi eku̱wa.
4 Bamui mu bantu aba baaghenda kitiyo-kitiyo mu elungu.
Tabaagu̱bhi̱ye kutunga kibugha kya kuukalamu.
5 Njala kandi eliyo byabakwata,
ti̱ baabbala ku̱ku̱wa.
6 Baabilikila Mukama haabwa kijibu kyabo eki,
aabajuna ku̱lu̱gha mu kubona-bona oku.
7 Aabahikila mu kihanda ki̱si̱mi̱ye
kandi aabaki̱dhi̱ya mu kibugha hambali bakuukala.
8 Oleke basi̱i̱me Mukama haabwa kukunda kuwe kwamaani̱
kandi byakuswekani̱ya aabakoleeye.
9 Aahaagha maasi aba eliyo likwete.
Aba njala ekwete aabaha byokuliya bisemeeye baakuta.
10 Bamui mu bantu aba baakalagha mu mweli̱ma ghwamaani̱.
Bali banyankomo kandi bababohi̱ye na mpi̱ngo.
11 Baabona-bona nanga kujeemela bighambo bya Luhanga
kandi kughaya kuhana kwa owa Eghulu Munu.
12 Eki niikiyo kyaleki̱ye aaleka baabakoleesi̱ya milimo yamaani̱.
Beegengagha kandi batatunga muntu oghu akubakoonela.
13 Baabilikila Mukama haabwa kijibu kyabo eki,
aabajuna ku̱lu̱gha mu kubona-bona oku.
14 Aabaaya mu mweli̱ma ghwamaani̱ kandi mu kubona-bona,
aatu̱wakaka mpi̱ngo bababohi̱ye.
15 Oleke basi̱i̱me Mukama haabwa kukunda kuwe kwamaani̱
kandi byakuswekani̱ya aabakoleeye.
16 Aahenda njighi sya byoma sya nkomo
kandi aabheghanga mitahimbuwa.
17 Bamui mu bantu aba baaba badhoma,
baabona-bona haabwa bibhi byabo
kandi haabwa bubhi bwabo.
18 Tabaabbalagha kuliya byokuliya
kandi bakaba bali haai ku̱ku̱wa.
19 Baabilikila Mukama haabwa kijibu kyabo eki,
aabajuna ku̱lu̱gha mu kubona-bona oku.
20 Aalaghila kwonkaha na kighambo kiye aabaki̱li̱ya
kandi aabacungula ku̱lu̱gha mu kuhwelekeelela.
21 Oleke basi̱i̱me Mukama haabwa kukunda kuwe kwamaani̱
kandi byakuswekani̱ya aabakoleeye.
22 Oleke bahonge bihonguwa bya ku̱mu̱si̱i̱ma
kandi babu̱ghe ebi akukolagha mu bilimbo bya kudheedhuwa.
23 Bamui mu bantu aba baaghenda haa nanja mu maati̱,
baakola bu̱su̱u̱bu̱li̱ haa nanja.
24 Baabona ebi Mukama aakolagha,
bikoluwa byakuswekani̱ya haa nanja etobheeye.
25 Aalaghila kandi kyegha kyasa haa nanja,
mighina yaatandika kusamba.
26 Maasi ghaakala ku̱ni̱i̱ni̱ya maati̱ eghulu mu mwanya
kandi kughakoti̱ya hansi hambali atobheeye.
Balu̱ki̱ baa maati̱ agha boobahila kimui.
27 Baakala kutukumila kandi kuhunga-hunga nga batami̱i̱li̱,
ebi bamani̱ye byona bitaaba na mughaso.
28 Baabilikila Mukama haabwa kijibu kyabo eki,
aabajuna ku̱lu̱gha mu kubona-bona oku.
29 Aaholeesi̱ya kyegha haa nanja
kandi mighina yaateekaana.
30 Baadheedhuwa haabwa kyegha eki kuleka
kandi aabaki̱dhi̱ya kulungi haa mwalo hambali baabbalagha.
31 Oleke basi̱i̱me Mukama haabwa kukunda kuwe kwamaani̱
kandi byakuswekani̱ya aabakoleeye.
32 Oleke balangilile bukulu buwe mu kusanga-sangaana kwa bantu.
Bamusinde mu maaso ghaa bengei̱.
33 Mukama niiye akuhindulagha maasi kufooka elungu
kandi na nsulo kufooka etaka lyomi̱ye.
34 Aafoola etaka lisemeeye kuba mu elungu lya kisula,
haabwa bubhi bwa bantu abaabaagha baakaayemu.
35 Aahindula dhee etaka lyomi̱ye mu elungu kuba biijongo bya maasi
kandi etaka lyomi̱ye kuba nsulo sya maasi.
36 Aasi̱i̱mi̱lani̱ya bantu abali na njala kuukalamu
kandi baakwelayo kibugha kya kuukalamu.
37 Baakolayo misili kandi baahela mi̱jaabbi̱i̱bbu̱
kandi baakobha bi̱ghu̱ma bikani̱ye.
38 Abaha mu̱gi̱sa, baabyala baana bakani̱ye.
Ataasi̱i̱mi̱lani̱ya bitunguwa byabo kukeeha.
39 Baakakeehagha haabwa ngi̱ghu̱ syabo kubabona-boni̱ya kandi kubaghaya,
40 Mukama aatwalikani̱yagha kubhi bakama abaabona-boni̱yagha bantu be.
Aleka balalangila mu elungu hambali kihanda kitali.
41 Bhaatu abali mu bwetaagho aabaaya mu kubona-bona
kandi agbaatikani̱ya maka ghaabo nga ntaama sikaniiye kimui.
42 Bantu bahi̱ki̱li̱i̱ye baakaboone eki, badheedhuwa,
bhaatu bantu babhi boona baakala baholeei̱ye.
43 Oleke bantu bagheji boona beeli̱li̱kane haa bintu bini.
Oleke bantu bateekeleejʼo kukunda kwamaani̱ kwa Mukama.