106
Bulungi bwa Mukama
1 Musinde Mukama!
Mu̱si̱i̱me Mukama nanga ni mulungi,
kukunda kuwe kwamaani̱ ni kwa bilo nʼebilo.
2 Ni ani̱ akugubha kulangilila bintu byamaani̱ ebi Mukama akukolagha?
Ni ani̱ akugubha kumusinda kwonini?
3 Bali na mu̱gi̱sa abaku̱hu̱ti̱yagha bilaghilo biye.
Abakukolagha bwile bwona ebi̱hi̱ki̱ye.
4 Ai̱ Mukama, onjisuke, obu okuba nookoonela bantu baawe,
ontemu dhee, obu okuba noobajuna.
5 Oleke nanje ntunge haa kukula-kulana kwa bantu baawe aba waakomi̱yemu.
Oleke ndheedhuwe mu kusemeeleluwa kwa bantu baawe.
Oleke nkusinde ndi hamui na bantu baawe.
6 Tukasi̱i̱sa, ngoku baataata baatu baakoli̱ye.
Tu̱ku̱sobi̱yagha kandi tukola ebitahi̱ki̱ye.
7 Obu baataata baatu baabaagha Mi̱si̱li̱,
tabeeli̱li̱kaanʼo byakuswekani̱ya biye.
Tabaasu̱ki̱ye kukunda kwawe kwamaani̱.
Baamujeemela haa nanja, Nanja Mutuku.
8 Bhaatu aabajuna, ngoku aalaghi̱i̱sani̱i̱ye,
niikuwo ooleke bu̱toki̱ buwe bwamaani̱.
9 Aalaghila Nanja Mutuku kandi yooma.
Aahikila bantu be, baabhasukila haa etaka lyomi̱ye.
10 Aabajuna bantu aba baabaagha baboohi̱ye.
Aabacungula ku̱lu̱gha mu ngi̱ghu̱ syabo.
11 Bhaatu ngi̱ghu̱ syabo boona baadhikila mu nanja.
Taaliyo nʼomui oghu akati̱ghalʼo.
12 Du̱mbi̱ bantu be aba baahi̱ki̱li̱ja ndaghaano siye.
Baalimba bilimbo bya kumusinda.
13 Bhaatu bwile butaseli̱ye baabululuwa eki aabakoleeye.
Tabaamu̱li̱ndi̱ye kubahanuulila.
14 Banali mu elungu, beeghombela kimui byokuliya.
Eki kyabaleeteleja kulengesa Luhanga.
15 Aabaha eki baamusabi̱ye,
bhaatu aabasindikamu dhee ndwala yamaani̱.
16 Bantu aba banali hambali baghooneeye, baaghilila Musa etima.
Baalighilila dhee Alooni̱ mu̱heeleli̱ya ahi̱ki̱li̱i̱ye wa Mukama.
17 Nsi yeesama kandi yaammela Dataani̱.
Yaabutikila Abbilaamu na baa ka yee.
18 Mulilo ghwaka mu ki̱bbu̱la kyabo eki
kandi ghwoki̱ya bantu babhi aba boona.
19 Haa mwena Holebbu, baataata baatu
bakeekolela mu feeja kisasani̱ kya kyana kya nte
kandi baakilami̱ya.
20 Ki̱ti̱i̱ni̱sa banguhaaye Luhanga,
baakiha kisasani̱ kya nte eghi ekuliyaagha bi̱si̱ngo.
21 Baabululuwa Luhanga oghu akabajuna,
oghu akakola bintu byamaani̱ munsi ya Mi̱si̱li̱.
22 Aakola byakuswekani̱ya mu kyalo kya Haamu
kandi na bintu byamaani̱ haa Nanja Mutuku.
23 Obu Luhanga aaghi̱li̱ye ati akubahwelekeeleli̱ya,
mu̱heeleli̱ya wee Musa oghu aakomi̱ye,
eemilila haagati ya Mukama, na bantu be.
Aamwesengeleli̱ya kuleka ki̱i̱ni̱gha kiye
kandi kutabahwelekeeleli̱ya.
24 Baabhenga nsi esemeeye aabahaaye,
nanga tabaahi̱ki̱li̱i̱je eki aabalaghi̱i̱sani̱i̱ye.
25 Baatandika ku̱mu̱bu̱ghʼo kubhi mu weema syabo,
baabhenga ku̱u̱ghu̱wa elaka lya Mukama.
26 Niibuwo aamu̱ki̱i̱ye mukono ghuwe naalahila
ati akubaatila mu elungu.
27 Alalangi̱ya baasukulu baabo mu mahanga
kandi aaleka baakwi̱la mu nsi sitali syabo.
28 Obu baahi̱ki̱ye Peyola, beelungani̱ya
na abaalami̱yagha luhanga Bbaali̱.
Baaliya bibembo babembeeye baaluhanga abatali na bwomi̱i̱li̱.
29 Ebi baakolagha byaleka Mukama aakwatuwa ki̱i̱ni̱gha.
Aabasindikamu ndwala yamaani̱.
30 Bhaatu Fi̱nehaasi aamuka kandi aafubila abaasobeei̱ye,
niibuwo ndwala eghi yaahooyʼo.
31 Eki aakoli̱ye eki kikulekagha bantu baa
mijo yoona,
bamughilamu ahi̱ki̱li̱i̱ye bilo nʼebilo.
32 Haai na maasi ghaa Meli̱ba baatodha dhee
baaleka Mukama aakwatuwa ki̱i̱ni̱gha.
Baaleeteleja Musa kabhi kaamaani̱.
33 Baaleka Musa aasaaliluwa kwonini
kandi aabu̱gha bintu bitalimu magheji.
34 Baataata baatu batahwelekeeleli̱ya bantu bʼomu mahanga,
ngoku Mukama aabaagha abalaghiiye kukola.
35 Bhaatu beelungani̱ya na bantu aba
kandi nabo baatandika kukola bikoluwa bi̱bhi̱i̱hi̱ye nga bya bantu aba.
36 Baalami̱ya bisasani̱ ebi bantu aba baalami̱yagha.
Kyaleeteleja bantu baa Luhanga kughuwa.
37 Baahongela batabani̱ baabo,
na bahala baabo bi̱li̱mu̱ ebi.
38 Baata batabani̱ baabo na bahala baabo,
abatali na musango.
Baabahaayo nga bihonguwa ewaa bisasani̱ bya Banakanaani̱.
Baabhi̱i̱ya nsi eghi haabwa bu̱ji̱ndi̱ bwabo.
39 Beebhi̱i̱ya haabwa bikoluwa byabo bi̱bhi̱i̱hi̱ye.
Baaba nga baamalaaya kandi baalu̱ghʼo Luhanga wabo.
40 Nahabweki Mukama aakwatiluwa ki̱i̱ni̱gha bantu be aba
kandi aabeetamuwa.
41 Aabahaayo mu mahanga
kandi ngi̱ghu̱ syabo esi syabalema.
42 Ngi̱ghu̱ syabo esi syababona-boni̱ya
kandi baaba hansi ya bu̱toki̱ bwabo.
43 Milundi ekani̱ye Mukama aacungulagha bantu be aba.
Bhaatu batu̱wamu kumujeemela
kandi beeyongela mu kibhi.
44 Baakatanganagha ewaa Mukama aabaaghu̱wa
kandi abona kubona-bona kwabo.
45 Aasuka ndaghaano aakoli̱ye haabwabo
kandi haabwa kukunda kuwe kwamaani̱ akeehi̱ya ki̱i̱ni̱gha kiye.
46 Aaleka abakwete kubona-boni̱ya bantu be,
babaghilila kisa.
47 Ai̱ Mukama Luhanga waatu, otujune.
Otukumaani̱ye ku̱lu̱gha mu mahanga,
niikuwo tu̱si̱i̱me li̱i̱na lyawe li̱hi̱ki̱li̱i̱ye,
tudheedhuwe kandi tukusinde.
48 Mu̱si̱i̱me Mukama Luhanga wa I̱saaleeli̱,
oghu aliyo bilo nʼebilo!
Oleke bantu boona baghile bati, “Aami̱i̱na!”
Musinde Mukama!