105
Mukama naacungula bantu be
1 Mu̱si̱i̱me Mukama, mulangilile li̱i̱na liye.
Mughambile bantu baa mahanga ebi aakoli̱ye.
2 Mumulimbile, mulimbe bilimbo bya kumusinda.
Mughambile bantu byakuswekani̱ya ebi akukolagha.
3 Mudheedheluwe mu li̱i̱na liye li̱hi̱ki̱li̱i̱ye.
Oleke abakubbalagha Mukama,
badheedhuwe haa mitima yabo.
4 Musabe Mukama kubakoonela kandi kubaha maani̱,
mweyongele kumubbala.
5 Muusuke byamaani̱ ebi aakoli̱ye,
byakuswekani̱ya biye kandi ku̱twi̱la kuwe misango.
6 Enu̱we baasukulu baa Ebbulahi̱mu̱, mu̱heeleli̱ya wa Luhanga.
Enu̱we baasukulu baa Yakobbo, aba Luhanga aakomi̱yemu.
7 Niiye Mukama Luhanga waatu,
niiye aku̱twi̱lagha nsi yoona musango.
8 Akuusukagha ndaghaano yee bilo nʼebilo.
Aasuka ebi aalaghi̱i̱sani̱i̱ye ku̱hi̱ki̱ya haa mijo lu̱ku̱mi̱.
9 Aasuka ndaghaano eghi aakoli̱ye na Ebbulahi̱mu̱
kandi eki aalahiiye ewaa I̱saka.
10 Aaghi̱gu̱mi̱ya ewaa Yakobbo nga kilaghilo
kandi mu bantu baa I̱saaleeli̱, aaghifoola ndaghaano ya bilo nʼebilo.
11 Aaghila ati, “Nkubaha nsi ya Kanaani̱,
ekuba mughabo ghwa bugwetuwa bwanu.”
12 Akabu̱gha ebi obu bantu aba baabaagha banali bakee
kandi bali baghenu̱ mu Kanaani̱.
13 Baabunga-bungagha, ku̱lu̱gha mu ehanga limui kughenda mu linji.
Balu̱gha mu bukama bumui baghenda mu bunji.
14 Taasi̱i̱mi̱lani̱i̱ye muntu nʼomui kubabona-boni̱ya.
Aatanukagha bakama haabwa bantu aba,
15 naaghila ati, “Mutakwatʼo bantu banje aba naaseesi̱yʼo magita
kandi mutakolʼo kabhi balangi̱ banje.”
16 Mukama aaleka njala yaaghuwa mu ehanga lya Kanaani̱.
Aakeehi̱ya byokuliya byabo byona.
17 Bhaatu aasanguwa atu̱mi̱ye muntu kubahikila,
Yojeefu̱ oghu baaghu̱li̱i̱ye nga mu̱syana.
18 Anali Mi̱si̱li̱, baamukwata baamuboha mpi̱ngo mu maghulu,
na kyoma mu bikiya,
19 ku̱hi̱ki̱ya ebi aabu̱ghi̱ye bibaayʼo.
Kighambo kya Mukama kyoleka ngoku Yojeefu̱ aabu̱ghagha majima.
20 Mukama wa Mi̱si̱li̱ aalaghila ati bamulekele.
Oghu akaba alemi̱ye bantu bakani̱ye aamulekela.
21 Yojeefu̱ oghu baamuha mulimo ghwa kuloleelela kikaali kya mukama.
Aalema bintu byona ebi mukama aabaagha nabiyo.
22 Niiye aalaghilagha banyolo baa mukama ebi abbali̱ye bakole.
Eegheesi̱yagha magheji abaahanuulilagha mukama.
23 Niibuwo I̱saaleeli̱ aaghendi̱ye mu ehanga lya Mi̱si̱li̱,
Yakobbo oghu aaghoona mu kyalo kya Haamu.
24 Mukama aaleka bantu be aba baabyala baana bakani̱ye.
Aabafoola baamaani̱ kusaali̱ya ngi̱ghu̱ syabo.
25 Aagaali̱ya mitima ya Banami̱si̱li̱, booha bantu be
kandi baaghobeli̱ya baheeleli̱ya be.
26 Niibuwo aatu̱mi̱yeyo mu̱heeleli̱ya wee Musa,
aaghenda hamui na Alooni̱ oghu aakomi̱yemu.
27 Baakola bikoluwa byamaani̱ bya Luhanga mu bantu aba
kandi na byakuswekani̱ya mu kyalo kya Haamu.
28 Luhanga aatuma mweli̱ma mu kyalo eki kyona,
bhaatu Banami̱si̱li̱ baabhenga ebi aabu̱ghi̱ye.
29 Aafoola maasi ghaabo kuba saghama
kandi aata nsu̱i̱ syabo syona.
30 Aasu̱li̱ya bigbende mu ehanga lyabo,
byahi̱ki̱la kimui mu bisiika bya bakama baabo.
31 Luhanga aalaghila, nsoola sikani̱ye hamui na nku̱ndi̱
syasulila kimui mu ehanga lyabo eli lyona.
32 Mu ki̱i̱kalo kya mbu̱la, aabatooneli̱ya mbu̱la ya lubaale,
na kubbyoka kwa nkubha mu kyalo kyabo kyona.
33 Aahwelekeeleli̱ya mi̱jaabbi̱i̱bbu̱ yabo na biti mi̱ti̱i̱ni̱.
Aagenga biti byona mu ehanga lyabo eli.
34 Aalaghila, njighe syabaasamu,
sikaniiye kimui esi muntu ataakugubha kubala.
35 Njighe esi syaliya bi̱si̱ngo byona,
byʼomu kyalo eki hamui na bilimuwa byona.
36 Aata bu̱li̱ mwana wabusaasa mu̱li̱ghaaso mu bu̱li̱ ka ya Munami̱si̱li̱,
oghu aalekagha bu̱li̱ ka edheedhuwa kandi yeepanka.
37 Du̱mbi̱ aahikila Banai̱saaleeli̱ aabaaya Mi̱si̱li̱,
baaghenda baheeki̱ye siliva na feeja.
Boona bakaba bali boomi̱i̱li̱ kandi bali na maani̱.
38 Banami̱si̱li̱ baadheedhuwa kubona Banai̱saaleeli̱ mbalu̱ghayo,
nanga baakalagha boobahi̱ye Banai̱saaleeli̱ aba.
39 Luhanga aabateelʼo kicu mu mwanya kubaswi̱ki̱la
kandi mulilo kubabhaki̱li̱ya mu bwile bwa mukilo.
40 Bakasaba nyama, Mukama aabaha nkwali.
Aabaha maanu byokuliya ku̱lu̱gha eghulu, baaliya baakuta.
41 Aati̱ya kikuka, maasi ghaalu̱ghamu,
ghaasenda mu elungu ghakaniiye kimui.
42 Aasuka ndaghaano yee ehi̱ki̱li̱i̱ye,
eghi aakoli̱ye na mu̱heeleli̱ya wee Ebbulahi̱mu̱.
43 Nahabweki aahikila bantu be aakomi̱yemu aabatwesi̱ya Mi̱si̱li̱.
Baaghenda mbalimba badheedheeu̱we kwonini.
44 Aabaha nsi ya Kanaani̱ eghi bantu banji baabaagha baakaayemu.
Aabaha bilimuwa ebi bantu aba baabaagha baheli̱ye mu misili yabo.
45 Eki kikabʼo niikuwo bantu be bahu̱ti̱ye bilaghilo biye
kandi bakole byona ebi aabalaghiiye kukola.
Musinde Mukama!