104
Kusinda Muhangi̱
1 Mwoyo ghwanje ghu̱ku̱si̱i̱ma Mukama!
Ai̱ Mukama Luhanga wanje, oli mukulu!
Oli na ki̱ti̱i̱ni̱sa kandi bu̱toki̱.
2 Olu̱wete kyeleeli̱ nga kiigandulo.
Waasambuula eghulu nga weema
3 kandi waakwela ka yaawe haagu̱u̱li̱ ya maasi.
Oku̱koleesi̱yagha bicu nga kigaali̱ kyawe
kandi okughendelagha haa mapapa ghaa mwegha.
4 Okufoolagha baamalai̱ka baawe kuba nga mpwegha
kandi ofoola baheeleli̱ya baawe kuba nga mulilo.
5 Nuuwe okata nsi haa misingi yayo,
niikuwo etadhinga-dhinga.
6 Waata nanja haagu̱u̱li̱ yayo nga kiigandulo
kandi maasi ghaswi̱ki̱la myena.
7 Obu weetanu̱ki̱ye, maasi ghaaluka.
Obu ghaaghu̱u̱ye elaka lyawe lya kwetanuka nga nkubha, ghaali̱gi̱ta.
8 Maasi agha ghaaswi̱ki̱la myena kandi ghaasu̱li̱ya bighona,
ku̱hi̱ki̱ya haa lulengo olu waaghalaghiiye.
9 Waateelʼo maasi agha mitaano egu̱mi̱ye,
niikuwo ghatatodha ku̱swi̱ki̱la nsi.
10 Waatʼo nsulo sya maasi kusenda mu bighona,
maasi ghaasenda haagati ya myena.
11 Nsulo esi sikuhaagha maasi binyama byʼomu kisaka,
niigho ndogooi̱ sikunuwaagha kusimalʼo eliyo.
12 Haai-haai nagho, niiyo noni̱ sikukwelagha bisui byasiyo,
siikala kulimbila mu matai ghaa biti.
13 Nuuwe oku̱tooni̱yagha mbu̱la haa myena ku̱lu̱gha mu mwanya
kandi nsi eesuuyemu mi̱gi̱sa yaawe.
14 Nuuwe oku̱twesi̱yagha bi̱si̱ngo ebi bisolo bikuliyagha
kandi na bilimuwa bya bantu kuliya.
Nuuwe oku̱si̱i̱mi̱lani̱yagha bantu kuhela bilimuwa byabo mu etaka.
15 Bahelamu ebi̱ku̱lu̱ghaghamu vi̱i̱ni̱ eghi ekulekagha mbadheedhuwa.
Biti oli̱va ebi bakuuyaghamu bigita ebikubatelelu̱ki̱yagha.
Baaya byokuliya mu etaka kubaha maani̱.
16 Bi̱i̱looku̱ byʼomu Lebbanooni̱ bikutungagha mbu̱la ekani̱ye.
Biti ebi Mukama eenini aaheli̱ye.
17 Mu biti ebi noni̱ sikukwelaghamu bisui byasiyo.
Bidhongo-dhongo bikulaalagha mu biti ebi.
18 Haa myena ekangami̱ye niiyo nsoku̱ sikuukalagha.
Mu bikuka niiyʼo nsi̱mba sikuulaalagha.
19 Okatʼo kweli̱ niikuwo bwile bwa meeli̱ bubʼo
kandi musana ghumani̱ye bwile bwaghuwo bwa kukotelamu.
20 Okatʼo mukilo kuba mweli̱ma, ti̱ bwile obu
niibuwo binyama byʼomu kisaka bikutuwaagha.
21 Ntale sikugbomagha nsinahiigha,
nsibbala byokuliya ebi Luhanga akusiha.
22 Musana ngwatuwa,
sikuuka mu bi̱i̱kalo byasiyo silangaala.
23 Bantu baamuka baghenda haa milimo yabo,
batandika kukola ku̱hi̱ki̱ya lwagholo.
24 Ai̱ Mukama, okakola bintu bikani̱ye,
byona okabikola na magheji ghaawe,
nsi yoona eesuuye bihanguwa byawe.
25 Haliyo nanja namu̱li̱to, eghi ejambi̱ye kandi egbaatikaane.
Bihanguwa ebitaakugubha kubaluwa,
biinamu̱li̱to na biinabwana niiyo bikuukalagha.
26 Haa nanja haala niiyo maati̱ ghaanamu̱li̱to ghakughendelagha.
Biyoka waakoli̱ye bikuukalagha mbi̱gyanilamu.
27 Bihanguwa ebi byona nuuwe bikulindagha
kubiha byokuliya ebi bikwete kubbala.
28 Okubihaagha biyo kandi biliya.
Okaakusambuulagha ngalo syawe biikuta byokuliya bisemeeye.
29 Okaaku̱bi̱lu̱ghaghʼo, byobaha,
okaakubiiyaghamu lwoha bi̱ku̱wa.
Bikuuka mu tu̱u̱tu̱ hambali byalu̱ghi̱ye.
30 Okaakuhaagha bihanguwa bihyaka lwoha lwawe biba byomi̱i̱li̱.
Oha bwomi̱i̱li̱ buhyaka bihanguwa byona byomi̱i̱li̱ ebili munsi.
31 Ki̱ti̱i̱ni̱sa kya Mukama kibe kya bilo nʼebilo!
Oleke Mukama adheedhuwe haabwa ebi aakoli̱ye.
32 Akaakulolagha hansi eekala kutukumila.
Naaku̱mʼo myena eekala kucuukamu mwi̱ka!
33 Ndalimbilagha Mukama mu bwomi̱i̱li̱ bwanje bwona.
Ninali mwomi̱i̱li̱ nkuukala niinalimba bilimbo bya kusinda Luhanga wanje.
34 Oleke kilimbo nkulimba kimudheedhe,
nanga kudheedhuwa kwanje kuli mu Mukama.
35 Oleke basi̱i̱si̱ bahwelekeelele ku̱lu̱gha munsi
kandi bantu babhi batatodha kubʼo.
Ndasi̱i̱magha Mukama na mwoyo ghwanje!
Musinde Mukama!