103
Kukunda kwa Luhanga
Jabbu̱li̱ ya Dhau̱dhi̱.
1 Osi̱i̱me Mukama, uwe mwoyo ghwanje.
Byona ebili muli si̱ye,
mu̱si̱i̱me li̱i̱na liye li̱hi̱ki̱li̱i̱ye!
2 Osi̱i̱me Mukama uwe mwoyo ghwanje.
Otaabululuwa bilungi byona ebi akukukolelagha.
3 Niiye akukughanilagha bibhi byawe byona
kandi aku̱ki̱li̱ya ndwala syawe syona.
4 Niiye akukucungulagha ku̱lu̱gha mu ki̱i̱na
kandi niiye akukwolekagha kukunda kwamaani̱ kandi kisa.
5 Niiye akukuhaagha bintu bilungi mu bwomi̱i̱li̱ bwawe,
niikuwo ookale onali mutabhana kandi onali na maani̱ nga kibebe.
6 Mukama niiye aku̱twi̱lagha musango mu bwengani̱ja abami̱ghi̱lu̱u̱we
kandi abaha bughabe.
7 Akooleka Musa ntegheka siye
kandi aaleka bantu baa I̱saaleeli̱ baamanya bikoluwa biye byamaani̱.
8 Mukama ali na kisa kandi ngughuma.
Taakusaaliluwagha bwangu-bwangu
kandi ali na kukunda kwamaani̱.
9 Taakuukalagha naasoghosa bantu,
kedha kukwatuwa ki̱i̱ni̱gha bilo nʼebilo.
10 Taakutufubilagha naasighikila ngoku bibhi byatu bili,
kedha kutusasula naasighikila ngoku bubhi bwatu buli.
11 Ngoku eghulu likangami̱ye ku̱lu̱gha hansi,
niikuwo akundiiye kimui atiyo boona abamu̱hu̱ti̱i̱ye.
12 Ngoku bu̱lu̱gha ejooba eselaane na bughuwa ejooba,
niikuwo akutuuyaghʼo atiyo bibhi byatu.
13 Ngoku ese baana akughililagha kisa baana be,
niikuwo Mukama akughililagha kisa abamu̱hu̱ti̱i̱ye.
14 Amani̱ye eki twakoleeu̱wemu
kandi akuusukagha ngoku tuli tu̱u̱tu̱.
15 Bwomi̱i̱li̱ bwatu munsi buli nga bi̱si̱ngo
kandi nga bimole bya mu kisaka.
16 Mpwegha eghi ekwete kuhunga ekaakubisaalilaghʼo
byoma kandi bihuwʼo,
batamaniilila hambali byabaagha.
17 Bhaatu kukunda kwamaani̱ kwa Mukama ni kwa bilo nʼebilo ewaa abamu̱hu̱ti̱i̱ye.
Bu̱hi̱ki̱li̱i̱le buwe akubughililagha baasukulu baa bantu.
18 Akubughililagha abeesi̱ghi̱ye ndaghaano yee
kandi abakukwatagha bilaghilo biye.
19 Mukama aafooye eghulu ntebe yee ya bukama,
niiye alemi̱ye bintu byona.
20 Mu̱si̱i̱me Mukama enu̱we baamalai̱ka be,
enu̱we abaamaani̱ abaku̱u̱ghu̱wagha ebi aku̱bu̱ghagha
kandi bakola ebi akulaghilagha.
21 Mu̱si̱i̱me Mukama enu̱we mahe ghe ghoona.
Enu̱we abaku̱mu̱heeleli̱yagha kandi bakola ebi abbali̱ye.
22 Mu̱si̱i̱me Mukama enu̱we bihanguwa biye byona,
ebili mu bi̱i̱kalo byona ebi alemi̱ye.
Osi̱i̱me Mukama, uwe mwoyo ghwanje!