102
Nsaala ya muntu oghu ali mu bijibu
1 Ai̱ Mukama, ooghu̱we kusaba kwanje.
Otegheeleli̱ye kutakangana kwanje kunkoonela.
2 Gutu otandu̱ghʼo obu nkuba ndi mu bijibu.
Ontegheeleli̱ye kandi onkuukemu bwangu ninaakubilikiiye.
3 Bwomi̱i̱li̱ bwanje niibuwo bwahuwʼo nga mwi̱ka.
Mubili ghwanje niibuwo ghwahiya nga muntu ndi mu mulilo.
4 Mutima ghu̱njombeki̱ye munda
kandi ghwanjoma nga bi̱si̱ngo,
tankyabbala kuliya.
5 Noolobeeye kimui
haabwa kulila kukani̱ye.
6 Ndi nga nseku̱me eli mu kisaka
kandi nga ki̱hu̱u̱ghu̱lu̱ ekili mu elungu.
7 Nkulaalagha mbhali̱i̱ye,
ndi nga noni̱ eghi eli yonkaha haa lusui lwa numba.
8 Ngi̱ghu̱ syanje bakumalagha kilo kyona mbanaanambula,
bakumbbaaki̱i̱si̱yagha kandi bankiina.
9 Nkuliyagha ki̱bu̱ kyomu mahi̱gha mu ki̱i̱kalo kya byokuliya.
Kyakunuwa kyanje baakitabuuyemu mali̱gha.
10 Ki̱i̱ni̱gha kyawe kikani̱ye
kyaleki̱ye wampimba kandi wankuba haakpengbu̱.
11 Bwomi̱i̱li̱ bwanje buli nga ki̱i̱lu̱ghu̱u̱li̱li̱ya kya lwagholo
kandi niibuwo nooma nga bi̱si̱ngo.
12 Ai̱ Mukama, olemi̱ye bilo nʼebilo,
bantu baa mijo yoona balakuusukagha.
13 Okuumuka kandi oghilile kisa bantu baa Sayu̱u̱ni̱.
Bwile bwahi̱ki̱ye bwa kubaghilila kisa.
Buni niibuwo bwile bwonini obu waataayʼo.
14 Mabaale bakwehi̱ye kibugha eki ghadheedhi̱ye baheeleli̱ya baawe.
Bakukikwatiluwagha kisa nankabha kili mu kuhwelekeelela.
15 Mahanga ghakwobaha li̱i̱na lya Mukama
kandi na bakama boona baa munsi bakwobaha ki̱ti̱i̱ni̱sa kiye.
16 Mukama akutodha kukwela Sayu̱u̱ni̱
kandi aboneke mu ki̱ti̱i̱ni̱sa kiye.
17 Aku̱u̱ghu̱wa kusaba kwa banaku
kandi taakughaya nsaala syabo.
18 Ebi Mukama akukolagha mubihandiike haabwa mujo oghukwisa,
niikuwo bantu abatakabyahuwe bamusinde.
19 Mukama anali hambali hakangami̱ye
mu eghulu liye li̱hi̱ki̱li̱i̱ye akulolagha hansi.
Akulolagha munsi anali mu eghulu.
20 Aku̱u̱ghu̱wagha kulila kwa banyankomo
kandi aha bughabe aba batwi̱li̱i̱ye musango ghwa ku̱ku̱wa.
21 Nahabweki li̱i̱na liye bakulilangilila mu Sayu̱u̱ni̱.
Bamusindile mu kibugha kya Yelusaalemu.
22 Bwile obu bantu bʼomu mahanga kandi makama
bakwekumaani̱li̱ya hamui kulami̱ya Mukama.
23 Mukama, ancekeei̱ye ninali mwana,
bilo byanje aabi̱keeheei̱ye.
24 Bhaatu nkwete kumughila nti, “Ai̱ Luhanga wanje,
otanjita ntakakaakuuye,
uwe oghu ali mwomi̱i̱li̱ bilo nʼebilo.”
25 “Nuuwe ku̱lu̱gha mu ntandiko okahanga nsi
kandi waahanga byona ebili mu eghulu.
26 Bilihwelekeelela, bhaatu uwe ookalʼo,
byona bilikaakula nga lughoye.
Okubihindula nga ngoye
kandi obikube.
27 Bhaatu okuukala ngoku oli
kandi myaka yaawe teekuhuwʼo.
28 Baana baatu bakuukala bali kusemeeye
kandi baasukulu baabo bakuba kulungi,
mu maaso ghaawe.”