101
Mukama mulungi
Jabbu̱li̱ ya Dhau̱dhi̱.
1 Ai̱ Mukama, nkulimba haa kukunda kwawe kwamaani̱ kandi bwengani̱ja.
Nkulimba bilimbo bya kukusinda.
2 Nkweghendeseleja kuukala na bwomi̱i̱li̱ butalimu kabhi.
Uwe okunjisʼo dhi̱?
Ndalubhatangagha na mutima ghusemeeye mu numba yanje.
3 Tanku̱si̱i̱ma kukola kintu kyona ki̱bhi̱i̱hi̱ye.
Noohi̱ye ebi abalu̱ghi̱yʼo Luhanga bakukolagha.
Tankukolangana nabo bbaa.
4 Nkwelinda bantu abali na mitima etasemeeye.
Tankukolangana na muntu weena oghu akukolagha bintu bi̱bhi̱i̱hi̱ye.
5 Nku̱hwelekeeli̱ya boona abakukokagha baanakyabo mu ki̱bi̱so.
Tanku̱gu̱mi̱si̱li̱ja bantu abali na myepanko kandi kwebhi̱mba-bhi̱mbi̱ya.
6 Ndalolagha na maaso ghanje bantu beesighibuwa abali munsi,
niikuwo baakalaghe hamui nanje.
Aba bonkaha abatali nʼeki bakubasoghosʼo,
niibo balampeeleli̱yagha.
7 Taaliyo muntu nʼomui oghu akuhaagha bisubha
oghu akuukala mu numba yanje.
Taaliyo nʼomui oghu aku̱bu̱ghagha ebitalimu majima,
oghu nku̱si̱i̱mi̱lani̱ya kuukala nanje.
8 Ndahwelekeeleli̱yagha bu̱li̱ kilo
bantu babhi munsi
kandi nkubhinga bantu babhi boona
ku̱lu̱gha mu kibugha kya Mukama.