111
Oleke bantu basinde Mukama
1 Musinde Mukama!
Si̱ye nku̱si̱i̱ma Mukama na mutima ghwanje ghwona,
mu kugumbaana kwa bantu be.
2 Mukama akukolagha bintu byamaani̱!
Boona aba bikudheedhagha bakubbalagha ku̱byetegheeleli̱ya.
3 Byona ebi akukolagha biisuuyemu ki̱ti̱i̱ni̱sa kiye kandi bukulu buwe.
Bu̱hi̱ki̱li̱i̱le buwe ni bwa bilo nʼebilo.
4 Mukama akulekagha tuusuka bikoluwa biye byakuswekani̱ya.
Ali na ngughuma kandi kisa.
5 Akuhaagha byokuliya abaku̱mu̱hu̱ti̱yagha.
Taakuubululuwagha ndaghaano yee.
6 Akooleka bantu be bu̱toki̱ bwa ebi akukolagha.
Aabaha mahanga kuba kyalo kyabo.
7 Byona ebi akukolagha, akubikolelagha mu bwesighibuwa
kandi mu bwengani̱ja.
Bilaghilo biye byona ni bya kwesigha.
8 Bilaghilo ebi ni bya bilo nʼebilo,
bikaheebuwa mu majima kandi mu bu̱hi̱ki̱li̱i̱le.
9 Akacungula bantu be,
aakola nabo ndaghaano ya bilo nʼebilo.
Li̱i̱na liye li̱hi̱ki̱li̱i̱ye kandi ni lya ki̱ti̱i̱ni̱sa!
10 Ku̱hu̱ti̱ya Mukama niiyo ntandiko ya magheji.
Boona abakukwatagha bilaghilo biye bakubaagha
na kwetegheeleli̱ya kusemeeye.
Niiye bantu babhonganuuwe kusinda bilo nʼebilo.