112
Ali na mu̱gi̱sa oghu aku̱hu̱ti̱yagha Mukama
1 Musinde Mukama.
Ali na mu̱gi̱sa muntu oghu aku̱hu̱ti̱yagha Mukama,
oghu akudheedhuwagha kukwata bilaghilo biye.
2 Baana be balabaagha baamaani̱ hoona hambali baakaaye.
Baasukulu be balaheebuwagha mu̱gi̱sa.
3 Etungo kandi buguudha bilaakalagha mu ka yee,
ti̱ bu̱hi̱ki̱li̱i̱le buwe bukuukalʼo bilo nʼebilo.
4 Nankabha ghuli mweli̱ma halabaaghʼo kyeleeli̱ haa bantu balungi.
Balabaagha na ngughuma, kisa kandi bu̱hi̱ki̱li̱i̱le.
5 Ali na mu̱gi̱sa muntu oghu ali mwenge
kandi oghu akweholi̱yagha,
oghu akukolagha bu̱su̱u̱bu̱li̱ buwe mu majima.
6 Muntu mulungi taakusaaghuwagha
kandi balaakalagha mbamuusuka bilo nʼebilo.
7 Taakwobahagha makulu ghabhi̱i̱hi̱ye.
Akuukala agu̱mi̱ye mutima kandi eesi̱ghi̱ye Mukama.
8 Taakutuntula kandi taakwobaha.
Amani̱ye ngoku akubona ngi̱ghu̱ siye mbasi̱ngu̱lu̱wa.
9 Akuhaagha banaku adheedheeu̱we,
ti̱ kikoluwa kiye ki̱hi̱ki̱li̱i̱ye eki kikuukalʼo bilo nʼebilo.
Akuba wamaani̱ kandi bamu̱hu̱ti̱ye.
10 Bantu babhi bakaakubonagha eki, bakwatuwa ki̱i̱ni̱gha.
Bakwenenagha ngaga basaaluuwe kandi babula.
Kunihila kwabo kuhuwʼo bilo nʼebilo.