116
Jabbu̱li̱ ya ku̱si̱i̱ma
1 Nku̱ndi̱ye Mukama, nanga aku̱u̱ghu̱wagha elaka lyanje.
Aaghu̱wa kwesengeleli̱ya kwanje.
2 Aku̱ntegheeleli̱yagha,
nahabweki nkumubilikila ninaakaaye.
3 Kabhi kaa lu̱ku̱ kakaba kaneeli̱ghi̱li̱i̱ye,
ti̱ naakalagha noobahi̱ye nti nku̱ku̱wa,
naatunga bijibu kandi naatuntula.
4 Niibuwo naabilikiiye li̱i̱na lya Mukama nti,
“Ai̱ Mukama, onjune.”
5 Mukama ali na ngughuma kandi ahi̱ki̱li̱i̱ye,
Luhanga waatu ali na kisa.
6 Mukama akulindagha abatali na bu̱kooneli̱,
obu naabaagha ndi mu kabhi, akanjuna.
7 Uwe mwoyo ghwanje, oteekaane,
nanga Mukama ankoleeye bintu bilungi.
8 Mukama akanjuna lu̱ku̱,
andaghali̱yʼo mali̱gha
kandi aalinda bighele byanje kutakobhoka.
9 Nkulubhatangila mu maaso ghaa Mukama,
munsi ya boomi̱i̱li̱.
10 Nkaakala ninahi̱ki̱li̱i̱je, nankabha ninaabu̱ghi̱ye nti,
“Naaboona-boone kwonini.”
11 Obu bwoba bwabaagha bunkwete, naaghila nti,
“Bantu boona ni bahi̱ baa bisubha.”
12 Nkiki nkuha Mukama,
haabwa bilungi byona akunkolelagha?
13 Nkumuhongela kiikopo kya vi̱i̱ni̱
kandi nku̱si̱i̱ma li̱i̱na lya Mukama haabwa kunjuna.
14 Nkuha Mukama eki naamulaghi̱i̱sani̱i̱ye,
mu maaso ghaa bantu be boona.
15 Mu maaso ghaa Mukama,
ku̱ku̱wa kwa bantu be bahi̱ki̱li̱i̱ye,
ni kintu kya mughaso munu.
16 Ai̱ Mukama, majima ndi mu̱heeleli̱ya waawe.
Ndi mu̱heeleli̱ya waawe, mwana wa mu̱heeleli̱ya waawe wabukali̱.
Nuuwe okanjuna lu̱ku̱.
17 Nkukuha kihonguwa kya ku̱ku̱si̱i̱ma.
Nkubilikila li̱i̱na lya Mukama.
18 Nku̱hi̱ki̱i̱li̱li̱ya ebi naalahiiye ewaa Mukama,
mu maaso ghaa bantu be boona,
19 mu bbalaaji ya numba ya Mukama,
eghi eli haagati ya Yelusaalemu.
Musinde Mukama!