115
Luhanga omui wamajima
1 Ai̱ Mukama, ki̱ti̱i̱ni̱sa takibhonganuuwe etu̱we, taali etu̱we,
bhaatu kibhonganuuwe li̱i̱na lyawe,
nanga otughiliiye kukunda kwamaani̱ kandi bwesighibuwa.
2 Haabwaki mahanga ngatu̱bu̱u̱li̱ya ghati,
“Luhanga waanu ali haa?”
3 Bhaatu etu̱we tukukuukaghamu tuti, “Luhanga waatu ali mu eghulu
kandi akukolagha ebi abbali̱ye.”
4 Bisasani̱ byabo ni bya siliva kandi feeja,
ebi bantu bakoli̱ye na mikono yabo.
5 Bili na kanu̱wa, bhaatu tabi̱ku̱bu̱ghagha,
bili na maaso, bhaatu tabikubonagha.
6 Bili na matui, bhaatu tabi̱ku̱u̱ghu̱waagha,
bili na mihuli, bhaatu tabikukaghagha.
7 Bili na ngalo, bhaatu tabikukwatagha kantu.
Bili na maghulu, bhaatu tabikulubhatangagha.
Bili na mimelo, bhaatu tabi̱ku̱twesi̱yagha elaka.
8 Abakukolagha bisasani̱ ebi kandi babyesigha,
balisusaana nabiyo dhee.
9 Enu̱we bantu baa I̱saaleeli̱, mwesighe Mukama.
Niiye mu̱kooneli̱ waanu kandi ngabo yaanu.
10 Enu̱we bahongi̱ baasukulu baa Alooni̱, mwesighe Mukama.
Niiye mu̱kooneli̱ waanu kandi ngabo yaanu.
11 Enu̱we boona abaku̱hu̱ti̱yagha Mukama, mwesighe Mukama.
Niiye mu̱kooneli̱ waanu kandi ngabo yaanu.
12 Mukama akutuusukagha kandi atuha mu̱gi̱sa.
Akuha mu̱gi̱sa bantu baa I̱saaleeli̱
kandi ahe mu̱gi̱sa bahongi̱ baasukulu baa Alooni̱.
13 Akuha mu̱gi̱sa boona abaku̱mu̱hu̱ti̱yagha,
bakulu na abatali bakulu.
14 Mukama ahe mu̱gi̱sa ghwamaani̱,
enu̱we na baana baanu.
15 Mukama oghu akahanga eghulu kandi nsi,
abahe mu̱gi̱sa!
16 Eghulu ni lya Mukama,
bhaatu nsi niiyo aahaaye bantu.
17 Abaaku̱u̱ye tabakusindagha Mukama,
nanga bali eku̱li̱mu̱ hambali aholeei̱ye.
18 Bhaatu etu̱we abaakaaye, tu̱ku̱si̱i̱ma Mukama,
ku̱lu̱gha endindi kandi bilo nʼebilo.
Musinde Mukama!