118
Nsaala ya ku̱si̱i̱ma haabwa bu̱si̱ngu̱li̱
1 Mu̱si̱i̱me Mukama, nanga ni mulungi.
Kukunda kuwe kwamaani̱ ni kwa bilo nʼebilo.
2 Oleke Banai̱saaleeli̱ baghile bati,
“Kukunda kuwe kwamaani̱ ni kwa bilo nʼebilo.”
3 Oleke bahongi̱ baasukulu baa Alooni̱ baghile bati,
“Kukunda kuwe kwamaani̱ ni kwa bilo nʼebilo.”
4 Oleke abaku̱hu̱ti̱yagha Mukama baghile bati,
“Kukunda kuwe kwamaani̱ ni kwa bilo nʼebilo.”
5 Obu naabona-bonagha, nkabilikila Mukama.
Mukama ankuukamu kandi ampa bughabe.
6 Mukama ali hamui nanje,
tankwobaha.
Muntu akugubha kunkola ki?
7 Mukama ali hamui nanje,
niiye mu̱kooneli̱ wanje
kandi nku̱si̱ngu̱la ngi̱ghu̱ syanje.
8 Nkilungi kuulukila ewaa Mukama,
mu ki̱i̱kalo kya kwesigha bantu.
9 Nkilungi kuulukila ewaa Mukama,
mu ki̱i̱kalo kya kwesigha balemi̱.
10 Mahanga ghakaneeli̱ghi̱i̱li̱li̱ya,
bhaatu mu li̱i̱na lya Mukama naabahwelekeeleli̱ya.
11 Bakaneeli̱ghi̱i̱li̱li̱ya haa mpande syona,
bhaatu mu li̱i̱na lya Mukama naabahwelekeeleli̱ya.
12 Bakaneeli̱ghi̱i̱li̱li̱ya nga njoki
kandi baamuka nga mulilo ghuli mu mahuwa,
bhaatu mu li̱i̱na lya Mukama naabahwelekeeleli̱ya.
13 Bandu̱mba na maani̱ ku̱nsi̱ngu̱la,
bhaatu Mukama ankoonela.
14 Mukama niiye maani̱ ghanje kandi kilimbo kyanje.
Niiye aafooki̱ye kujunuwa kwanje.
15 Mu̱u̱ghu̱we malaka ghaa kudheedhuwa
kandi ghaa bu̱si̱ngu̱li̱ mu weema sya bahi̱ki̱li̱i̱ye.
Bakwete kulimba bati, “Mukono ghwabuliyo ghwa Mukama ghwakoli̱ye byakuswekani̱ya.”
16 Mukono ghwabuliyo ghwa Mukama ghwasi̱ngu̱u̱ye.
Mukono ghwabuliyo ghwa Mukama ghwakoli̱ye byakuswekani̱ya.
17 Si̱ye tanku̱ku̱wa bhaatu nkuukala ndi mwomi̱i̱li̱
kandi nkulangilila ebi Mukama akukolagha.
18 Mukama anfubiiye kwonini,
bhaatu taakuleka nku̱we.
19 Munjighuulile geeti̱ hambali bahi̱ki̱li̱i̱ye bakutaahilagha.
Nkutaahilamu kandi nsi̱i̱me Mukama.
20 Eni ni geeti̱ ya Mukama
kandi bahi̱ki̱li̱i̱ye bonkaha niibo bakutaahilamu.
21 Nku̱ku̱si̱i̱ma Mukama nanga okanji̱ghu̱wa
kandi waafooka kujunuwa kwanje.
22 Ebaale eli bakweli̱ baabhengi̱ye,
niiliyo lyahaghi̱ki̱ye numba kusaali̱ya ghanji ghoona.
23 Eki Mukama niiye akakikola
kandi kyatuswekani̱li̱ya kimui.
24 Kini niikiyo kilo eki Mukama aatuhaaye,
oleke tusemeeleluwe kandi tukidheedheluwemu.
25 Ai̱ Mukama, tu̱kwesengeleei̱ye, otujune.
Ai̱ Mukama, ohe mu̱gi̱sa ebi tukwete kukola.
26 Ali na mu̱gi̱sa oni oghu aasi̱ye mu li̱i̱na lya Mukama!
Tukwete kubaha mu̱gi̱sa ku̱lu̱gha mu numba ya Mukama.
27 Mukama niiye Luhanga,
niiye atuhaaye kyeleeli̱.
Mukwate bi̱kongu̱bho mu ngalo,
mulubhatange, mweli̱ghi̱i̱li̱li̱ye eki bakuhongelaghʼo bihonguwa.
28 Nuuwe Luhanga wanje kandi nku̱ku̱si̱i̱magha.
Nuuwe Luhanga wanje kandi nkukusindagha.
29 Mu̱si̱i̱me Mukama, nanga ni mulungi.
Kukunda kuwe kwamaani̱ ni kwa bilo nʼebilo.