119
Bilaghilo bya Mukama
1 Bali na mu̱gi̱sa abataakukolagha kibhi
kandi abakulubhatangilagha mu kulaghikiilila kwa Mukama.
2 Bali na mu̱gi̱sa abakukwatagha buukai̱so buwe
kandi bamubbala na mitima yabo yoona.
3 Ebo abataakukolagha bintu bi̱bhi̱i̱hi̱ye,
bhaatu balubhatangila mu bihanda biye.
4 Ai̱ Mukama, okatuha njegheesi̱ya syawe
kandi waatulaghila kusikwatila kimui na bwesighibuwa.
5 Si̱ye nkwekumbula kwonini kuba mwesighibuwa
kandi kukwata ebi waalaghiiye.
6 Kaakuba nkwata bilaghilo byawe byona,
tankuhemuka.
7 Nkukusinda na mutima ghusemeeye,
niineegha ntu̱wamu syawe syona esi̱hi̱ki̱li̱i̱ye.
8 Nkukwata ebi waalaghiiye,
gutu otandu̱ghʼo!
Ku̱hu̱ti̱ya bilaghilo bya Mukama
9 Mutabhana akugubha ati̱ya kuukala naakola ebi̱hi̱ki̱ye mu bwomi̱i̱li̱ buwe?
Akubulinda haabwa kukwata kighambo kyawe.
10 Nkulengaghʼo ku̱ku̱heeleli̱ya na mutima ghwanje ghwona,
otaleka ni̱ndu̱gha haa bilaghilo byawe.
11 Nkakwata haa mutima ghwanje ebi waalaghi̱i̱sani̱i̱ye,
niikuwo ntasi̱i̱sa ewaawe.
12 Ai̱ Mukama nuuwe nku̱si̱i̱ma,
gutu onjegheesi̱ye ebi waalaghiiye.
13 Nkuukala niinabu̱gha na kanu̱wa kanje
haa ntu̱wamu syawe syona.
14 Ndheedheeu̱we haabwa buukai̱so bwawe,
kusaali̱ya kubeela kimui muguudha.
15 Nkweli̱li̱kanʼo njegheesi̱ya syawe
kandi neeli̱li̱kanʼo bihanda byawe.
16 Nkudheedhuwagha kukwata ebi waalaghiiye
kandi tankubululuwa kighambo kyawe.
Kudheedhuwa haabwa bilaghilo bya Mukama
17 Ontwalikani̱ye kusemeeye, si̱ye mu̱heeleli̱ya waawe,
niikuwo niikale ninaakaaye kandi mpu̱ti̱ye kighambo kyawe.
18 Onjighule maaso, niikuwo mbone
byakuswekani̱ya ebili mu kulaghikiilila kwawe.
19 Ndi munsi muni haabwa bwile bukee,
otambi̱si̱i̱li̱la bilaghilo byawe.
20 Mwoyo ghwanje ghukwete kubbala kwonini
kumanya ntu̱wamu syawe bwile bwona.
21 Nuuwe okutanukagha abali na myepanko abaki̱i̱nu̱u̱we
kandi abakughayagha bilaghilo byawe.
22 Otaleka mbaanambula kandi mbapwawaani̱ya,
nanga si̱ye nkwete buukai̱so bwawe.
23 Nankabha balemi̱ beekumaani̱ya kuhanuula kunkola kubhi,
bhaatu si̱ye mu̱heeleli̱ya waawe nkweli̱li̱kanʼo ebi waalaghiiye.
24 Buukai̱so bwawe bukulekagha ndheedhuwa,
niibuwo bukumpanuulilagha.
Kweli̱li̱kanʼo bilaghilo bya Mukama
25 Si̱ye ndangaaye mu tu̱u̱tu̱.
Onku̱u̱ki̱yemu bwomi̱i̱li̱ kusighikila haa kighambo kyawe.
26 Nkakughambila ebi nkukolagha kandi wanji̱ghu̱wa,
gutu onjegheesi̱ye ebi waalaghiiye.
27 Onkoonele kwetegheeleli̱ya kihanda kya njegheesi̱ya syawe.
Nkweli̱li̱kanʼo byakuswekani̱ya byamaani̱ okukolagha.
28 Kusaaliluwa okuli mu mwoyo ghwanje kwammali̱ye maani̱.
Ongu̱mi̱ye kusighikila haa kighambo kyawe.
29 Onkingilile kughenda mu kihanda kya bisubha
kandi mu bulungi bwawe onjegheesi̱ye bilaghilo byawe.
30 Si̱ye naatu̱u̱yemu kuukala mu kihanda kyamajima
kandi nkuta ku̱lu̱ na nkokolo haa bwengani̱ja bwawe.
31 Mukama, nkakwata buukai̱so bwawe,
gutu otaleka nimpemuka.
32 Ndakwamilagha mu kihanda kya bilaghilo byawe,
nanga ompaaye kwetegheeleli̱ya kukani̱ye.
Nsaala ya kusaba kwetegheeleli̱ya
33 Ai̱ Mukama, onjegheesi̱ye ebi waalaghiiye
kandi nkubikwatila kimui ku̱hi̱ki̱ya haakumaliilila.
34 Ompe kwetegheeleli̱ya, niikuwo mpu̱ti̱ye kulaghikiilila kwawe
kandi nkukwate na mutima ghwanje ghwona.
35 Onkoonele kulubhatangila mu kihanda kya bilaghilo byawe,
nanga niibiyo bikulekagha ndheedhuwa.
36 Ompe kwekumbula kukwata buukai̱so bwawe,
mu ki̱i̱kalo kya kuba muguudha.
37 Otasi̱i̱mi̱lani̱ya maaso ghanje kulola haa bintu ebitali na mughaso
kandi ompe bwomi̱i̱li̱ kusighikila haa kighambo kyawe.
38 Ogu̱mi̱ye eki waalaghi̱i̱sani̱i̱ye mu̱heeleli̱ya waawe,
eki okuhaagha abaku̱hu̱ti̱i̱ye.
39 Onjune kuunambula oku nkwobahagha,
majima ntu̱wamu syawe sisemeeye.
40 Nkubbalagha kwonini njegheesi̱ya syawe
kandi bu̱hi̱ki̱li̱i̱le bwawe, olinde bwomi̱i̱li̱ bwanje.
Kwesigha bilaghilo bya Mukama
41 Ai̱ Mukama, onjoleke kukunda kwawe kwamaani̱.
Onjune kusighikila ngoku waalaghi̱i̱sani̱i̱ye,
42 du̱mbi̱ nkugubha kuba na kyakukuukamu abakwete kuunambula,
nanga neesi̱ghi̱ye kighambo kyawe.
43 Ongu̱bhi̱i̱si̱ye ku̱bu̱ghagha majima mu kanu̱wa kanje,
nanga ntaaye kunihila kwanje mu ntu̱wamu syawe.
44 Ndahu̱ti̱yagha bilaghilo byawe,
bilo nʼebilo.
45 Nkulubhatanga ndi na bughabe,
nanga nkukwamililagha njegheesi̱ya syawe.
46 Nkughambila bakama haa buukai̱so bwawe
kandi tankuhemuka bbaa.
47 Nkudheedhuwagha ku̱hu̱ti̱ya bilaghilo byawe,
nanga mbi̱ku̱ndi̱ye.
48 Nku̱hu̱ti̱yagha bilaghilo byawe,
nanga mbi̱ku̱ndi̱ye
kandi nkweli̱li̱kanaghʼo ebi waalaghiiye.
Kugumila haa bilaghilo bya Mukama
49 Oosuke kighambo kyawe waaghambiiye mu̱heeleli̱ya waawe,
niikiyo kikumpaagha kunihila.
50 Ebi waalaghi̱i̱sani̱i̱ye bi̱ku̱ngu̱mi̱yagha
kandi bi̱mpu̱u̱mu̱li̱ya mu bijibu byanje byona.
51 Bantu abali na myepanko bakumpwawaani̱yagha,
bhaatu si̱ye tanku̱lu̱ghagha haa kulaghikiilila kwawe.
52 Ai̱ Mukama, nkaakuusukagha ntu̱wamu syawe syona ku̱lu̱gha hambele,
si̱ku̱mpu̱u̱mu̱li̱yagha.
53 Nkaakubonagha bantu babhi mbalu̱gha haa kulaghikiilila kwawe,
nkusaaliluwagha kwonini.
54 Hambali nkaakughendagha,
nkulimbagha bilimbo ebi̱ku̱bu̱ghʼo ebi waalaghiiye.
55 Mukama, mukilo nkuusukagha li̱i̱na lyawe
kandi nkwata bilaghilo byawe.
56 Nkudheedhuwagha,
nanga nkwete njegheesi̱ya syawe.
Kwekambila bilaghilo bya Mukama
57 Ai̱ Mukama, nuuwe wanje,
nkulaghaana kukwata bighambo byawe.
58 Nkwesengeleei̱ye na mutima ghwanje ghwona,
kungilila kisa ngoku waalaghi̱i̱sani̱i̱ye.
59 Nkweli̱li̱kanaghʼo ebi nkukolagha
kandi nkulaghaana kukwata buukai̱so bwawe.
60 Nkwangu̱u̱ya kandi tankukeesekeleluwa,
kukwata bilaghilo byawe.
61 Nankabha bantu babhi bamboha na mighuwo,
tankubululuwa kulaghikiilila kwawe.
62 Saaha mukaagha sya mukilo nkuumukagha ku̱ku̱si̱i̱ma,
haabwa ntu̱wamu syawe si̱hi̱ki̱li̱i̱ye.
63 Ndi bhootu̱ sya boona abaku̱hu̱ti̱i̱ye
kandi abakwete njegheesi̱ya syawe.
64 Ai̱ Mukama, kukunda kwawe kwamaani̱ kuusuuye munsi yoona,
onjegheesi̱ye ebi waalaghiiye.
Mughaso ghwa bilaghilo bya Mukama
65 Ai̱ Mukama, waakoleeye bilungi mu̱heeleli̱ya waawe,
kusighikila haa kighambo kyawe.
66 Onjegheesi̱ye kuba na magheji kandi ku̱twi̱la kulungi bantu musango,
nanga ni̱hi̱ki̱li̱i̱je bilaghilo byawe.
67 Obu waabaagha otakanfubiiye naaku̱lu̱ghaghʼo,
bhaatu endindi mpu̱ti̱i̱ye kighambo kyawe.
68 Oli mulungi kandi okukolagha bintu bisemeeye,
onjegheesi̱ye ebi waalaghiiye.
69 Bantu baa myepanko baku̱mbu̱ghaghʼo bisubha,
bhaatu nkukwata njegheesi̱ya syawe na mutima ghwanje ghwona.
70 Bantu babhi tabakwetegheeleli̱yagha kandi mbadhoma,
bhaatu bilaghilo byawe bikundheedhagha.
71 Kubona-bona kukambeela kintu kilungi,
nanga kukanjegheesi̱ya ebi waalaghiiye.
72 Kulaghikiilila kwa kanu̱wa kaawe ni kwa mughaso ewanje,
kusaali̱ya mi̱li̱yooni̱ ya feeja kandi siliva.
Bilaghilo bya Mukama ni byamajima
73 Ngalo syawe niisiyo syampangi̱ye kandi syankola.
Ompe kwetegheeleli̱ya, niikuwo ngubhe kwegha bilaghilo byawe.
74 Oleke abaku̱hu̱ti̱i̱ye balakambonagha badheedhuwe,
nanga ntaaye kunihila kwanje mu kighambo kyawe.
75 Ai̱ Mukama, nimani̱ye ngoku ntu̱wamu syawe si̱hi̱ki̱ye.
Okanfubila nanga oli mwesighibuwa.
76 Oleke kukunda kwawe kwamaani̱ ku̱mpu̱u̱mu̱li̱ye,
ngoku wandaghiisani̱i̱ye si̱ye, mu̱heeleli̱ya waawe.
77 Ongilile kisa, niikuwo niikale ninaakaaye
kandi bilaghilo byawe bikulekagha ndheedhuwa.
78 Oleke bantu baa myepanko abaku̱mbu̱ghaghʼo bisubha bahemuke,
bhaatu si̱ye nkweli̱li̱kanʼo njegheesi̱ya syawe.
79 Oleke abaku̱hu̱ti̱i̱ye banjisʼo,
abamani̱ye buukai̱so bwawe.
80 Oleke mutima ghwanje ghuukale ghutali
nʼeki bakughusoghosʼo haa ebi waalaghiiye,
niikuwo ntahemuka.
Nsaala ya kucunguluwa
81 Mwoyo ghwanje ghwalu̱hi̱ye kukulindilila kunjuna,
bhaatu ntaaye kunihila kwanje mu kighambo kyawe.
82 Maaso ghandu̱hi̱ye kuukala mbhali̱i̱ye ndindiliiye eki waalaghi̱i̱sani̱i̱ye,
ni̱i̱neebu̱u̱li̱ya nti, “Oku̱mpu̱u̱mu̱li̱kani̱ya dhi̱?”
83 Nankabha ndi nga kihu baalubikilaghamu vi̱i̱ni̱ eki baku̱bi̱ye,
tankabululuwagha ebi waalaghiiye.
84 Buuye si̱ye mu̱heeleli̱ya waawe ndindilile ku̱hi̱ki̱ya dhi̱?
Okufubila dhi̱ abakwete kumbona-boni̱ya?
85 Bantu baa myepanko, bandimiiye bi̱i̱na bya kwegengamu,
aba ni abatahu̱ti̱i̱ye kulaghikiilila kwawe.
86 Bilaghilo byawe byona ni byamajima.
Gutu onkoonele, nanga bantu bakwete kumbona-boni̱ya mbambu̱ghʼo bisubha.
87 Bakaba bali haai kunjita,
bhaatu naabhenga ku̱lu̱ghʼo njegheesi̱ya syawe.
88 Oki̱li̱ye bwomi̱i̱li̱ bwanje haabwa kukunda kwawe kwamaani̱,
niikuwo mpu̱ti̱ye buukai̱so bwa kanu̱wa kaawe.
Kugumila haa bilaghilo bya Mukama
89 Ai̱ Mukama, kighambo kyawe
kikuukalagha ki̱gu̱mi̱ye mu eghulu bilo nʼebilo.
90 Bwesighibuwa bwawe bu̱ku̱hi̱kʼo mijo yoona,
nuuwe okata nsi hambali eli kandi yaakalʼo.
91 Bintu byona binaliyo ku̱hi̱ki̱ya na obwalo haabwa ku̱tu̱wamu kwawe,
nanga byona nuuwe bi̱ku̱heeleli̱yagha.
92 Nguli bilaghilo byawe bitaabaaye ndu̱ghi̱i̱li̱lo ya kudheedhuwa kwanje,
nangubaaye nku̱u̱ye haabwa kubona-bona.
93 Si̱ye tankubululuwa njegheesi̱ya syawe,
nanga niisiyo wampeeleeyemu bwomi̱i̱li̱.
94 Si̱ye ndi waawe, onjune,
nanga nkukolagha na maani̱ ku̱hu̱ti̱ya njegheesi̱ya syawe.
95 Bantu babhi bandi̱ndi̱ye kunjita,
bhaatu nkutʼo ku̱lu̱ na nkokolo kweli̱li̱kanʼo buukai̱so bwawe.
96 Naaboone ngoku bu̱li̱ kintu kisemeeye kili na hambali kiheleeye,
bhaatu bulungi bwa bilaghilo byawe tabuli na mutaano.
Kukunda bilaghilo bya Mukama
97 Si̱ye mbbali̱ye kulaghikiilila kwawe
kandi nku̱kweli̱li̱kanaghʼo kumala kilo kyona.
98 Bilaghilo byawe bikumpaagha magheji kusaali̱ya ngi̱ghu̱ syanje,
nanga bikuukalagha nanje bwile bwona.
99 Nkwetegheeleli̱yagha kusaali̱ya beegheesi̱ya banje boona,
nanga nkweli̱li̱kanaghʼo buukai̱so bwawe.
100 Nkukengagha kusaali̱ya bantu bakulu,
nanga nku̱hu̱ti̱yagha njegheesi̱ya syawe.
101 Nkubhengagha bighele byanje kughenda mu bu̱li̱ kihanda ki̱bhi̱i̱hi̱ye,
niikuwo ngubhe kukwata kighambo kyawe.
102 Si̱ye tankalu̱ghaghʼo ntu̱wamu syawe,
nanga nuuwe weenini oku̱si̱njegheesi̱yagha.
103 Bighambo byawe bi̱nu̱li̱ye ewanje,
majima bi̱nu̱li̱ye kusaali̱ya bwoki.
104 Njegheesi̱ya syawe niisiyo sikumpaagha kwetegheeleli̱ya,
nahabweki noohi̱ye kihanda kyona ekilimu bisubha.
Bilaghilo bya Mukama bikuhaagha kyeleeli̱
105 Kighambo kyawe niiyo taala ya bighele byanje
kandi kyeleeli̱ kya kihanda kyanje.
106 Nkalahila kandi naagu̱mi̱ya
kukwata ntu̱wamu syawe si̱hi̱ki̱li̱i̱ye.
107 Ai̱ Mukama, naaboona-boone kwonini.
Oleke niikale ndi mwomi̱i̱li̱ kusighikila haa kighambo kyawe.
108 Ai̱ Mukama, osi̱i̱me kihonguwa kya ku̱ku̱si̱i̱ma nkukuha.
Onjegheesi̱ye ntu̱wamu syawe.
109 Bwomi̱i̱li̱ bwanje bukuukalagha buli mu kabhi bwile bwona,
bhaatu tankubululuwa kulaghikiilila kwawe.
110 Bantu babhi bantegheeye ki̱ki̱ya kya kunkwatilamu,
bhaatu tanku̱lu̱ghaghʼo njegheesi̱ya syawe.
111 Buukai̱so bwawe niibuwo bugwetuwa bwanje bilo nʼebilo
kandi bukulekagha ndheedhuwa haa mutima ghwanje.
112 Naatu̱u̱yemu ku̱hu̱ti̱ya na mutima ghwanje ebi waalaghiiye
ku̱hi̱ki̱ya haa kilo nku̱kwi̱lamu.
Bilaghilo bya Mukama niibiyo bikundindagha
113 Noohi̱ye bantu abatali beesighibuwa,
bhaatu naakunda kulaghikiilila kwawe.
114 Nuuwe buulukilo bwanje kandi ngabo yanje,
ntaaye kunihila kwanje mu kighambo kyawe.
115 Mu̱ndu̱ghʼo enu̱we bantu babhi,
niikuwo nkwate bilaghilo bya Luhanga.
116 Ondinde kusighikila ngoku waalaghi̱i̱sani̱i̱ye, niikuwo niikale ndi mwomi̱i̱li̱.
Otaleka nimpemuka haabwa kunihila ndi nakuwo.
117 Onkwatilile, niikuwo niikale kusemeeye
kandi nkwate bwile bwona ebi waalaghiiye.
118 Okubhengagha boona abakughayagha ebi waalaghiiye
kandi ntegheka syabo sya bisubha tasili na mughaso.
119 Bantu babhi abali munsi okubabonagha nga bi̱si̱ngo byʼomu kyabu̱,
ti̱ eki niikiyo ki̱leki̱ye nku̱ndi̱ye buukai̱so bwawe.
120 Mubili ghukuntukumilagha haabwa kukwobaha
kandi nkwelalikiililagha ntu̱wamu syawe.
Kudhootela bilaghilo bya Mukama
121 Nkukolagha ebili na bwengani̱ja kandi ebi̱hi̱ki̱ye,
otandu̱ghʼo mu ngi̱ghu̱ syanje.
122 Olaghi̱i̱sani̱ye ngoku si̱ye mu̱heeleli̱ya waawe nkuba kulungi.
Otaleka abali na myepanko mbambona-boni̱ya.
123 Maaso ghandu̱hi̱ye kuukala mbhali̱i̱ye uwe kunjuna
kandi kubona majima ghaa ebi waalaghi̱i̱sani̱i̱ye kubʼo.
124 Wooleke kukunda kwawe kwamaani̱
si̱ye mu̱heeleli̱ya waawe
kandi onjegheesi̱ye ebi waalaghiiye.
125 Ndi mu̱heeleli̱ya waawe, ompe kwetegheeleli̱ya,
niikuwo nimanye buukai̱so bwawe.
126 Mukama, bwile bwahi̱ki̱ye kufubila bantu,
nanga niibuwo baaghaya kulaghikiilila kwawe.
127 Majima nku̱ndi̱ye bilaghilo byawe kusaali̱ya feeja,
kusaali̱ya feeja eghi esemeleeye kimui.
128 Nahabweki nkutwalagha njegheesi̱ya syawe syona kuba si̱hi̱ki̱ye
kandi eki niikiyo ki̱leki̱ye noohi̱ye kihanda kyona kya bisubha.
Kubbala ku̱hu̱ti̱ya bilaghilo bya Mukama
129 Buukai̱so bwawe bukuswekani̱yagha,
niikiyo ki̱leki̱ye mbukwete haa mutima ghwanje.
130 Kwegheesi̱ya kwa bighambo byawe kukuhaagha kyeleeli̱
kandi kuleetela magheji abatali nagho.
131 Nkwesami̱yagha kanu̱wa kanje na kwekumbula kwamaani̱,
nanga nkubbalagha bilaghilo byawe.
132 Ontegheeleli̱ye kandi ongilile kisa,
ngoku okukolagha abaku̱ndi̱ye li̱i̱na lyawe.
133 Oleke ndubhatange ngu̱mi̱ye ngoku waalaghi̱i̱sani̱i̱ye
kandi otasi̱i̱mi̱lani̱ya kibhi ku̱nsi̱ngu̱la.
134 Onjune abakwete kumbona-boni̱ya,
niikuwo nkwate njegheesi̱ya syawe.
135 Oghilile mu̱heeleli̱ya waawe kisa
kandi onjegheesi̱ye ebi waalaghiiye.
136 Mali̱gha ghakunsendagha nga maasi,
nanga bantu kutakwata kulaghikiilila kwawe.
Bilaghilo bya Mukama ni bya bwengani̱ja
137 Ai̱ Mukama, ohi̱ki̱li̱i̱ye
kandi ntu̱wamu syawe si̱hi̱ki̱ye.
138 Okatʼo buukai̱so bwawe mu bu̱hi̱ki̱li̱i̱le
kandi mu bwesighibuwa kwonini.
139 Ki̱i̱ni̱gha kikunjakagha munda nga mulilo,
nanga ngi̱ghu̱ syanje kughaya bighambo byawe.
140 Eki waalaghi̱i̱sani̱i̱ye nkyamajima,
niikiyo ki̱leki̱ye si̱ye mu̱heeleli̱ya waawe nki̱ku̱ndi̱ye.
141 Nankabha bantu batampu̱ti̱i̱ye kandi mbangaya,
tankubuluwagha njegheesi̱ya syawe.
142 Bu̱hi̱ki̱li̱i̱le bwawe bukuukalʼo bilo nʼebilo
kandi kulaghikiilila kwawe ni kwamajima.
143 Ndi mu bijibu kandi mu busaali̱ji̱,
bhaatu bilaghilo byawe bikulekagha ndheedhuwa.
144 Buukai̱so bwawe bukuukalagha bu̱hi̱ki̱li̱i̱ye bilo nʼebilo.
Ompe kwetegheeleli̱ya niikuwo niikale ndi mwomi̱i̱li̱.
Nsaala ya kucunguluwa
145 Ai̱ Mukama, nkwete kukubilikila na mutima ghwanje ghwona,
onkuukemu kandi nku̱hu̱ti̱ya ebi waalaghiiye.
146 Nkwete kukubilikila, gutu onjune
kandi nkukwata buukai̱so bwawe.
147 Nkuumukagha cu̱i̱-cu̱i̱, nsonooki̱ etakadhu̱u̱ki̱ye, kukubilikila kunkoonela.
Nkutaagha kunihila kwanje mu bighambo byawe.
148 Nkulaalagha mbhali̱i̱ye mukilo yoona,
ni̱i̱neeli̱li̱kanʼo eki waalaghi̱i̱sani̱i̱ye.
149 Ai̱ Mukama, ooghu̱we elaka lyanje kusighikila haa kukunda kwawe kwamaani̱.
Ojune bwomi̱i̱li̱ bwanje kusighikila haa ku̱tu̱wamu kwawe.
150 Bantu babhi abakwete kumbona-boni̱ya, niibuwo baasa kuneebinga,
tabakwete kulaghikiilila kwawe.
151 Ai̱ Mukama oli haai-haai nanje
kandi bilaghilo byawe byona ni byamajima.
152 Ku̱lu̱gha hambele nkeegha buukai̱so bwawe,
okabutʼo kuba bwa bilo nʼebilo.
Kusaba bu̱kooneli̱
153 Olole ngoku nkwete kubona-bona kandi onjune,
nanga tankabululuwagha kulaghikiilila kwawe.
154 Ontonganiilile kandi oncungule,
ompe bwomi̱i̱li̱ ngoku waalaghi̱i̱sani̱i̱ye.
155 Bantu babhi tabalijunuwa,
nanga tabakwete ebi waalaghiiye.
156 Ai̱ Mukama, haabwa kisa kyawe kyamaani̱,
ompe bwomi̱i̱li̱ kusighikila haa ntu̱wamu syawe.
157 Ngi̱ghu̱ syanje abakwete kumbona-boni̱ya bakani̱ye,
bhaatu si̱ye tanku̱lu̱ghaghʼo buukai̱so bwawe.
158 Nkaakubonagha bantu baghobi̱ya nkutamuwagha,
nanga tabakwete bilaghilo byawe.
159 Mukama, olole ngoku nku̱ndi̱ye njegheesi̱ya syawe,
ompe bwomi̱i̱li̱ kusighikila haa kukunda kwawe kwamaani̱.
160 Kighambo kyawe ni kyamajima ku̱lu̱gha mu ntandiko
kandi ntu̱wamu syawe syona esi̱hi̱ki̱li̱i̱ye ni sya bilo nʼebilo.
Kwehaayʼo kukwata bilaghilo bya Mukama
161 Bakama bakwete kumbona-boni̱ya batali na kighendeleluwa,
bhaatu si̱ye nku̱hu̱ti̱yagha haa mutima ghwanje bighambo byawe.
162 Nkudheedhuwagha haabwa ebi waalaghi̱i̱sani̱i̱ye,
nga muntu oghu atu̱ngi̱ye buguudha bukani̱ye.
163 Nooheeye kimui bisubha,
bhaatu nku̱ndi̱ye kulaghikiilila kwawe.
164 Nkukusindagha milundi musanju̱ bu̱li̱ kilo,
haabwa ntu̱wamu syawe mu bwengani̱ja.
165 Ababbali̱ye kulaghikiilila kwawe bali na mpempa ekani̱ye
kandi taaliyo kabhi koona akakubabʼo.
166 Mukama, nuuwe nkulindagha kunjuna
kandi nkukolagha ebi bilaghilo byawe bilaghiiye.
167 Nkwete buukai̱so bwawe
kandi mbu̱ku̱ndi̱ye kwonini.
168 Mpu̱ti̱i̱ye njegheesi̱ya syawe kandi buukai̱so bwawe,
nanga omani̱ye byona ebi nkukolagha.
Nsaala ya kusaba bu̱kooneli̱
169 Ai̱ Mukama, oleke kutakangana kwanje ku̱ku̱hi̱kʼo.
Ompe kwetegheeleli̱ya kusighikila haa kighambo kyawe.
170 Otegheeleli̱ye kukutaaghilila kwanje
kandi oncungule ngoku waalaghi̱i̱sani̱i̱ye.
171 Ndakusindagha bwile bwona,
nanga oku̱njegheesi̱yagha ebi waalaghiiye.
172 Ndalimbagha na kanu̱wa kanje haa kighambo kyawe,
nanga bilaghilo byawe byona bi̱hi̱ki̱li̱i̱ye.
173 Oleke mukono ghwawe ghweteekani̱je kunkoonela,
nanga nkatu̱wamu kukwata njegheesi̱ya syawe.
174 Ai̱ Mukama, nkwete kubbala kwonini uwe kunjuna
kandi kulaghikiilila kwawe kukulekagha ndheedhuwa.
175 Ompe bwomi̱i̱li̱, niikuwo ngubhe kukusinda
kandi oleke ntu̱wamu syawe sinkoonele.
176 Nkwete kulalanga nga ntaama ebu̱li̱ye,
wiise obbale si̱ye mu̱heeleli̱ya waawe,
nanga tankabululuwagha bilaghilo byawe.