132
Numba ya Mukama ehi̱ki̱li̱i̱ye
Kilimbo kya kukoma Yelusaalemu kulami̱ya.
1 Ai̱ Mukama, oosuke Dhau̱dhi̱
kandi bijibu aasaaliiyemu byona.
2 Mukama, aasuke ebi eelaghi̱i̱sani̱i̱ye kandi aalahiiye ewaawe,
Luhanga wa Bu̱toki̱ Bwona wa Yakobbo.
3 Akaghila ati, “Tankughenda e ka,
kedha kulangaala haa bulili bwanje.
4 Tanku̱si̱i̱ma kughwesaghila,
kedha ku̱li̱bhi̱ya mboni̱ sya maaso ghanje,
5 ku̱hi̱ki̱ya ntungiiye Mukama ki̱i̱kalo,
hambali wa Bu̱toki̱ Bwona wa Yakobbo akuukala.”
6 Tukaaghu̱wa ngu sandu̱u̱ku̱ ya ndaghaano eli Efulaati̱.
Twaghisanga mu misili yʼomu kyalo kya Yaali̱.
7 Twaghila tuti, “Muleke tughende hambali Mukama akuukalagha,
tulami̱li̱ye mu maaso ghaa katebe kaa bighele biye.”
8 Ai̱ Mukama, oomuke, otaahe mu ki̱i̱kalo kyawe, hambali okuhuumulilagha.
Ookalemu na sandu̱u̱ku̱ ya ndaghaano, eghi ekwolekagha maani̱ ghaawe.
9 Bahongi̱ baawe bakolaghe bu̱li̱ kilo ebi̱hi̱ki̱ye
kandi bantu baawe balimbe nʼelaka lyamaani̱ badheedheeu̱we.
10 Haabwa mu̱heeleli̱ya waawe Dhau̱dhi̱,
otabhenga oghu waaseesi̱yʼo magita oghu.
11 Mukama akalahila ewaa Dhau̱dhi̱,
aahi̱ki̱i̱li̱li̱ya eki aalaghi̱i̱sani̱i̱ye kandi eki ataakuhindula.
Aaghila ati, “Nkuta omui mu baasukulu baawe
haa ntebe yaawe ya bukama.
12 Batabani̱ baawe mbaanakwete ndaghaano yanje
kandi bilaghilo ebi naabahaaye,
batabani̱ baabo bakusitama dhee,
haa ntebe yaawe ya bukama bilo nʼebilo.”
13 Mukama aakomi̱yemu Sayu̱u̱ni̱,
akubbala kughifoola ka yee.
14 Akaghila ati, “Kini niikiyo ki̱i̱kalo ndahuumulilaghamu bilo byona,
nanga nkibbali̱ye kandi ndakiikalaghamu.
15 Nkuha kibugha kya Sayu̱u̱ni̱ mu̱gi̱sa kandi ndeke kikula-kulane.
Bantu baamu banaku nkubaha byokuliya.
16 Bahongi̱ baamu nkubajuna
kandi bantu baamu bahi̱ki̱li̱i̱ye,
bakulimba nʼelaka lyamaani̱ lya kudheedhuwa.
17 Nkufoola omui mu baasukulu baa Dhau̱dhi̱ kuba mukama wamaani̱,
oghu aseeseeu̱wʼo magita wanje akuba nga taala haabwa bantu banje.
18 Nkuleka ngi̱ghu̱ siye bahemuke,
bhaatu eye akuba mukama wa ki̱ti̱i̱ni̱sa.”