133
Mu̱gi̱sa ghwa kuukala mu bumui
Kilimbo kya kukoma Yelusaalemu kulami̱ya. Jabbu̱li̱ ya Dhau̱dhi̱.
1 Nkilungi kandi kyakudheedhuwa,
bantu baa Luhanga kuukala bali mu bumui.
2 Ki̱su̱si̱ye nga magita ghaa muhendo munu agha baseesi̱ye Alooni̱ mu mutuwe,
aghakwete kusendela mu bi̱lelu̱ biye,
ghahi̱ka haa ki̱togi̱ kya biigandulo biye.
3 Ki̱su̱si̱ye nga ki̱me ekili haa mwena ghwa Helu̱mooni̱,
ekikwete kutoona haa bwena bwa Sayu̱u̱ni̱.
Haala niiyo Mukama aalaghi̱i̱sani̱i̱ye mu̱gi̱sa ghuwe kubʼo,
oghulimu bwomi̱i̱li̱ obutaakuhuwʼo.