135
Kilimbo kya kusinda
1 Musinde Mukama!
Musinde li̱i̱na lya Mukama,
mumusinde, enu̱we baheeleli̱ya baa Mukama.
2 Mumusinde enu̱we abaku̱heeleli̱yagha mu numba ya Mukama
kandi mu bbalaaji sya numba ya Luhanga.
3 Musinde Mukama, nanga Mukama ni mulungi.
Mulimbe nimusinda li̱i̱na liye,
nanga ali na kisa.
4 Mukama akeekomela baasukulu baa Yakobbo,
Banai̱saaleeli̱ aba kuba bantu be.
5 Nimani̱ye ngoku Mukama ali wamaani̱
kandi Mukama waatu asaai̱ye baaluhanga boona.
6 Mukama akukolagha ebi abbali̱ye,
mu eghulu na munsi
kandi mu maananja hambali hatobheeye.
7 Niiye akulekagha bicu biboneka haa nsondo sya nsi yoona.
Atooni̱ya mbu̱la eghi elimu nkubha
kandi alekela mpeu ku̱lu̱gha hambali aghibiikiiye.
8 Niiye akaata baana baabusaasa mi̱li̱ghaaso ya Banami̱si̱li̱.
Aata dhee mi̱li̱ghaaso ya bisolo byabo.
9 Aakola mu Mi̱si̱li̱ byakuswekani̱ya bya milingo ekani̱ye,
kufubila Falaaho na baheeleli̱ya be boona.
10 Aahwelekeeleli̱ya mahanga ghakani̱ye
kandi aata bakama baamaani̱.
11 Aata Si̱hooni̱, mukama wa Bamooli̱,
Ogi̱, mukama wa Bbasaani
kandi bakama boona bʼomu Kanaani̱.
12 Nsi ya bantu aba aaghiha bantu be.
Aaghiha Banai̱saaleeli̱ aba nga bugwetuwa bwabo.
13 Ai̱ Mukama, li̱i̱na lyawe likuukalaghʼo bilo byona.
Bantu baa mijo yoona balakuusukagha.
14 Mukama akubala bantu be abatali na musango
kandi aghilile kisa baheeleli̱ya be.
15 Bisasani̱ bya banamahanga ni bya siliva kandi feeja,
ebi bantu bakoli̱ye na mikono yabo.
16 Bili na kanu̱wa, bhaatu tabi̱ku̱bu̱ghagha.
Bili na maaso, bhaatu tabikubonagha.
17 Bili na matui, bhaatu tabi̱ku̱u̱ghu̱waagha
kandi tabikugubha kuhuumula mu kanu̱wa kaabiyo.
18 Abakukolagha bisasani̱ ebi kandi babyesigha,
balisusaana nabiyo dhee.
19 Enu̱we bantu baa I̱saaleeli̱, mu̱si̱i̱me Mukama!
Enu̱we bahongi̱ baasukulu baa Alooni̱, mu̱si̱i̱me Mukama!
20 Enu̱we baasukulu baa Leevi̱, mu̱si̱i̱me Mukama.
Enu̱we boona abaku̱mu̱hu̱ti̱yagha, mu̱mu̱si̱i̱me!
21 Mu̱si̱i̱me Mukama mu Sayu̱u̱ni̱,
eye oghu akuukalagha mu Yelusaalemu.
Musinde Mukama!