3
GALA ná-botiɠɛ nuiti tosuʋɛ
1 Nɔ̀un nà, kɛ̀ɛleaiti, gè la ɠɛni zooni gè ʋa ɓɔɛ wo ʋɔ eɠɛ nuiti GALA Zɛnvui loni ti luɠɔ, gè ɠɛni ɓɔɛzu wo ʋɔ eɠɛ etea nuɓusɛiti nɔ, eɠɛ doungoiti kidaaleʋei zu Kilista ma. 2 Gè ɲiimiɗɛi nɔ veeni wo ya, daamiani kpaaɓaa ge la ɠɛni de, mazɔlɔɔ wo la ɓena ziɛ bu. Anɛɛ niizuʋɛ, wo la dɛ ziaa bu, 3 tɔɔzei wa dɛ ziɛzu nɔ ga etea nuɓusɛiti siɛ ʋelei. Tama tɛi tolo ɲɔi wo zaama, ta kpɔɛ vaiti, wo la ziɛzu ga etea nuɓusɛiti kɛʋele ɓaa? 4 Siɛgi zu wo taɠila ge ɠɛɛzu ma la: «Nà ga Pɔle ʋolu nu,» zɔi ɠɛ ma: «Nà ga Apolɔse ʋolu nu,» nuɓusɛiti tuʋa ʋelei la ga naa ɓaa, wo ʋa ɠɛ ziɛzu la?
5 Ɓɛ ɠa mu é ga Apolɔse? Ɓɛ ɠa é ga Pɔle? Botiɠɛ nuiti nɔ, niiti wo ɠidaaleʋeai nɔ ti ya, eɠɛʋelei Maliɠii ma zobogi vea la ɛsɛ zea. 6 Gè siinni, Apolɔse kɔ ga ziɛi, kɛlɛ GALA ka é kpɛtɛni. 7 Naa ma, zɔi é siinsu, ta zɔi é kɔɔzu ga ziɛi, naati ti la ga ani nɔpɛ, kɛni GALA, nii é kpɛtɛzu. 8 Zɔi é siinsu, ta zɔi é kɔɔzu ga ziɛi, ta ga ɠɛʋele nɔ, GALA ka ti ɠilagilagi zala, é zoloo ta-wotiiti ma, ta kɛ. 9 Mazɔlɔɔ gá botii ɠɛɛzu ʋɔɔma GALA ná-fai zu, wa ga GALA ná-kpalagi.
Wa ɓalaa wa ga GALA ná-pɛlɛi. 10 Eɠɛʋelei GALA ge tèʋegai la wo ma ná-zaalai zu, gè seɓasemai laa, eɠɛʋelei ɠima ʋɛlɛ lo nui a ɗa kɛ la. Niizu, nu ɠili ka ta lo maazu. Kɛlɛ ɛsɛ ge dama ga ma ʋɛlɛi lo pelei maazu. 11 Mazɔlɔɔ nu nɔpɛ ge la zooga é ʋa seɓasema ɠili da mɔnɔ, zɔi ʋolu daai, nii é ga Yesu Kilista. 12 Nui ta ɠa zoo é to seɓasemai naa maazu ga zanugi, ɓaa walii, ɓaa kɔtu zɔngɔ ɓaagiti, ɓaa gului, ɓaa tufa vɔɔi, ɓaa muiin. 13 Kɛlɛ ɛsɛ ná-kɛɛwotii ma zii ɠa ɠula kɛlɛ zu tukpɔɠaaleʋe voloi, tɔɔzei toɠa ɠula kɛlɛ zu abui ɠa, abui ɠa ɛsɛ gilagilagi ná-kɛɛwotii zuɠɔɠɔ. 14 Ni nui ta ná-kɛɛwotii é togai seɓasemai naa ɠa, naa la ɠɛ ɠalani abui ɠa, naama nui ɠa zalai zɔlɔɔ. 15 Kɛlɛ zɔi ná-kɛɛwotii a ɠalana, toɠa ʋala salai ma, kɛlɛ tɔ ɓɔɠɔi ɠa ɠizo, eɠɛ a leʋe abui zaama.
16 Wo la suɠwɛɛ ɓaa ga wa ga GALA sei ʋɛlɛi, ga GALA Zɛnvui ɠa zeini wo-yiimaʋɛ? 17 Ni nu a GALA sei ʋɛlɛi ɠoloɠolona, GALA ka naama nui ɠoloɠolo. Mazɔlɔɔ GALA sei ʋɛlɛi ɲadegɛ, wa ɠa wo ga naama ʋɛlɛi.
18 Nu nɔpɛ ge mina ɓɔɠɔ yaava. Ni nui ta ɠa wo zaama, é ɓɔɠɔ ɠaazu ga ɠima nu eteai ná-kɛʋelei ma, é ɠɛ ga ɠimalala nu, naa ɠa a kɛ é ɠɛ ga ɠima nui. 19 Mazɔlɔɔ niima eteai ná-ɠimalai ɠa ga ɠimalala vaa GALA gaazu. Mazɔlɔɔ sɛʋɛʋɛ GALA Sɛʋɛi zu ga:
«Toɠa ɗa ɠima nuiti so ga balii, nii é ga ta-ɠeleɠele ɲɔi.»*3:19 Zɔɓ 5:13.
20 Sɛʋɛʋɛ mɔnɔ ga:
«Maliɠii ɠima nuiti ta-ɠisiɛiti kwɛɛ, ta nɔ ga faa ɲaka.»†3:20 Guy 94:11 bogɛ é zoloo Gɛlɛke woo zɛʋɛ wɔlɔmai ma.
21 Naa ɠa é ba, nu nɔpɛ ge mina ɓɔɠɔ lɛ su ga nuɓusɛ vaa. Mazɔlɔɔ ti pɛ ta ga wɔnɔ, 22 é ɠɛni ga Pɔle ʋe, ɓaa Apolɔse ʋe, ɓaa Piyɛlɛ ʋe, ɓaa eteai ʋe, ɓaa nu yɛnvui ʋe, ɓaa saai ʋe, ɓaa niizu vaiti be, ɓaa faiti be ti ʋaazu. Ti pɛ ta ga wɔnɔ, 23 kɛlɛ wɔun, wa ga Kilista nɔnɔiti, Kilista ɠɛ ga GALA nɔnɔ.