1 Wo maanɛɛʋɛ, wo gi leve ga Kilista ná-botiɠɛ nuiti, ta nuiti GALA ná-fai ma lɔɔɠuzu vaiti kalivaai ti ma. 2 Nii ɛsɛ pɛ ge pɔ kaliva ma makɛ nuiti ta-vaa zu, naa ɠa é ga, ti ɠɛ ga wooɠɛɠila nuiti. 3 Nɔ̀un nà, gè la yiizoolɛzu ga wo tùkpɔɠaaleʋe vai, ɓaa eteai tùkpɔɠaaleʋe vai. Gè la ɓɔɠɔ lukpɔɠaaleʋezu ɓalaa, nà ɓɔɠɔi. 4 Anɛɛ ni gè la ɓɔɠɔ ʋeelalazu kìgi zu, naa la bosu ga nà pee zɔlɔɔ naa zu. Zɔi é tùkpɔɠaaleʋezu, tɔ ɠa é ga Maliɠii. 5 Naa ɠa é ba, à mina faa nɔpɛ ma lukpɔ ɠaaleʋe ma yeeluɠɔ, eyɛsu Maliɠii ʋa. Toɠa kpidii zu lɔɔɠuzu vaiti kula kɛlɛma, é nuiti ziimaʋɛ vaiti dɛɛ. Názu ɠa ɛsɛ ka maamusɛi zɔlɔɔ da GALA zea.

6 Kɛ̀ɛleaiti, nii gè boga, gè pokɔɠɔga gi ma gá Apolɔse, é ɠɛ wo ʋɛ ga kalagi. Wa gaaɠa ɓalaa ga gá-ʋoogi maaʋele, ga wo mina ɓudɛ naa maazu, nii sɛʋɛai, wo tanɔpɛ ge mina waso, é ʋa lo nu ʋolu, nu laalɔɠɔma. 7 Mazɔlɔɔ ɓɛ ɠa é è vizɔ ga zɔiti ba? Leeni ɠa é è ya, nii GALA ge la feeni è ya? Ni tama fea nɔ ʋe è ya, ɗa wasosu ɠale, eɠɛ é la veeni nɔ è ya?

8 Wo wo wɔinma anii pɛ sɔlɔɔgɛ na! Wo ɓɛtɛʋɛ na! Wo ɠɛa ga masagiti, tama gi la ga masagaa! Nà pɔ ga wo masa fai ɠɛ ga ɠite, naa ɠa a kɛ gi masa fai ɠɛ wo ʋa! 9 Mazɔlɔɔ nà ɠisiɛzu ga GALA ge gi zeiɗa, gɛi gi ga keelaiti, gi ɠɛ ga nuiti ma ɠaaɓelagiti, gi ɠɛ eɠɛ nuiti deveai ti ma ga ti za kɛlɛi zu, gi ɠɛa ga pɛtɛ ganii eteai pɛ bɛ: geezuɠeelaiti bɛ, ta nuɓusɛiti pɛ bɛ. 10 Gá ga ɠimalala nuiti Kilista ná-faa zu, kɛlɛ wɔun, wa ga ɠima nuiti wa-ɠilibalai zu wa Kilista. Zɛbɛ la gi ʋa, kɛlɛ wɔun, wo zuɓaaʋɛ. Lɛbiyai ɠa wo ʋɛ, kɛlɛ gɔun, ɓaaɠulaʋɛ gi ma! 11 Zaaɠaza, gi maa ɠa nɔɠɔzu ga pului, ta kpɔɔle wɔin, ta seɠe vɛɛloi, gá doɠai laawu, gi ɠɛ ga teʋeteʋe nuiti, 12 gá ɓɔlɔzu ga botii ɠɛa ga gi-yeeiti. Ta gi ʋoomuna, gi tuya loo. Ta gi wɔinzeɠena, gi ziɛ naa wu. 13 Siɛgi zu ti gi-lɔɠɔi ɠoloɠolosu da, gá ɗa ɓɔɛ ga pagɔ. Ta gi levezu ga eteai ma nɔɠɔi, anii pɛ ma ɠaʋai, eyɛsu niizu.

14 Wo unfe faa laade gè ʋa ɠɛ niima vaiti sɛʋɛzu la wo ma, kɛlɛ gè wo ɠala, eɠɛʋelei wo la ga dòinti, wo nɛai bɛ̀. 15 Anɛɛ ni kalamɔn waapuugɔ (10.000) ɠa wo ya Kilista ná-fai zu, wo-ɠɛɛ ɠa ɠila kpe nɔ, tɔɔzei nà ɠa gè wo zɔlɔɔga kidaaleʋei zu, Yesu Kilista ná-fai zu, ga Woo Niinɛ Ʋagɔi laazeeli vai maaʋele. 16 Nà wo maanɛɛnɛzu deɠɛmu ga wo ʋokɔɠɔ mà. 17 Naa ɠa é kɛɛni, gè Timɔte leʋeni wo ma, dòin nii nɛai bɛ̀ gola, é ga wooɠɛɠila nu Maliɠii ná-fai zu. Toɠa wo ɠitoo naati su, ʋelei gè nà-eteai ziɛzu la Kilista ná-fai zu, ʋelei gè ma ɠalagi wosu da adaʋɛ pɛ, Egilisiiti su.

18 Wo zaama, tanigaani ti ɠɛni wasosu, ti ɗa ɠisiɛ ga gè la mɔ ʋa wo ʋɔ bɛ. 19 Kɛlɛ ni Maliɠii a laana ga, su la ɠoozazu gè ʋa wo ʋɔ bɛ. Názu waso nuiti ta-ɓɔɛzuɠulai laade gè ʋa ɠɛ kaazu, kɛlɛ kɛni ti-zɛbɛi! 20 Mazɔlɔɔ GALA ná-masadai la ga kpɔɛzuɠulai nɔ, kɛni zɛbɛi. 21 Leeni ɠa wo pɔ? Gè ʋa wo ʋɔ bɛ ga tukpɔi, ɓaa nɛɛbɛi ta sɛsɛbogi?