1 Faa mɔunpagi nii gè bosu, naa ɠa ga nu wooɠula GALA ma, ga faliiti, maanɛɛnɛiti, naa ʋɛɛ nu maavaiti ba, ta mamagiti, naa ɠɛ nuiti pɛ faa ma. 2 Kɛni de GALA falii ɠɛ masagiti bɛ, ta niiti pɛ ti zeini kundiɠilaiti su, naa ɠa a kɛ de eteai ziɛ gaanɛɛi ta ziilɛigi zu, GALA gaazuluabai pɛ su, ta unfemai ɠɛ de-ziɛ ʋelei zu. 3 Naa ʋagɛ, é zoloo GALA gaazu, de Ɠizo Nui, 4 nii wɔinɗai ga nui pɛ ge ɠizo, ti gaamai ɠwɛɛ. 5 Mazɔlɔɔ GALA gila kpe nɔ ɠa é ná, ta zɔɠɔzuɓɛtɛ nu ɠila kpe nɔ, GALA ta nuɓusɛiti zɔɠɔzu, naama nui ɠa é ga Yesu Kilista, 6 nii é ɓɔɠɔ veeni nuiti pɛ ta-vaa zu, ga ti pɛ unmɔɔ saɓui. Naama zeele wooi woni ná-yeeɠɛɠalai zu, 7 naa ɠa é kɛa, gè ɠɛa ga GALA daawooi laazeeli nui ta keelai, nà ga nuiti ta-ɠalamɔin, niiti ti la ga Zuifua, gè ti ɠala kidaaleʋe vai ta gaamai zu. Nà gaamai wosu, gè la zɛɛ wosu pa.

8 Nà pɔ ga zunuiti ti GALA falii wo adaʋɛ pɛ, ti GALA falii ɠɛ ga ti-yiima ɲadegai, ziiɠaawana mina ɠɛ ti-yiimaʋɛ ta maaɠaali vaa. 9 Nà pɔ ɓalaa ga anzanuiti ti ɗa ɓɔɠɔ maaɠili ga maaɠilii nii soloogai, waso ge la ba, ná kɛɠalai nɔ. Ti mina ɓɔɠɔ maaɠili ga unfɛlɛ ɓaaɓaagiti, ɓaa zanugi, ɓaa kɔtu zɔngɔ ɓaagiti, ɓaa seɠe laaɓaagiti, 10 kɛlɛ kɛni kɛɛwoti ʋagɔiti, eɠɛʋelei soloogai la anzanuiti ma, niiti ti ɠɛɛzu ta luazu GALA ba. 11 Maanɛɛʋɛ anzanui yiilɛi, é kalagi zɔlɔɔ unfema laazeeliai zu. 12 Gè la vaa bu ga anzanui ʋa yɛ kalagi veezu, é ʋa zei zunui unda. Maanɛɛʋɛ tɔun é yiilɛi. 13 Mazɔlɔɔ Adama ese fɔlɔ ka é ɓɛtɛni, naa ʋoluma Ɛve. 14 Adama la ɠɛni ɠakani, anzanui ɠa é yeezeini kaka fai wu, é loo GALA ná-tɔgi zu. 15 Anɛɛ naa ʋe, anzanui ɠa ɠizo ga doun zɔlɔɔgi maaʋele,*2:15 anzanui ɠa ɠizo ga doun zɔlɔɔgi maaʋele: Tati pelei taɠili ɓalaa ka ga nii: toɠa ɠizo mavofodai zaalai zu ni a yɛna kidaaleʋei zu, ta nɛɛbɛi, ta ɲadedai, ta kɛʋele ʋagɔi.