1 Kɛ̀ɛleaiti, gaaɓelagi ɠa ga: À GALA fali gi ʋɛ, ga Maliɠii laawooi li ga vazaga, é lɛbiyai zɔlɔɔ, eɠɛʋelei é ɠɛɛzu la wo ʋɔ bɛ. 2 À GALA fali ɓalaa ga é gi ɠizo faa ɲɔu ɠɛ nuiti ta suɲɔu nuiti ma, mazɔlɔɔ kidaaleʋei la ɛsɛ pɛ zea.

3 Kɛlɛ Maliɠii ɠa ga wooɠɛɠila nu. Toɠa wo zɛbɛlɔ, é wo makɛ ma ɲɔi ma. 4 Maliɠii naama ladalai veeʋɛ gi ya wa-vaa zu, ga fai niiti gi ɠɛai wo ti ɠɛ, wa naati kɛɛzu, ta wa yɛsu ti ɠɛɛzu.

5 Maliɠii lo wo-yiimaʋɛti tuɠɔ, ti laazeeli GALA ná-nɛɛbɛi zu faan, ta é ziilɔɔi ma zobogi ve wo ʋɛ ga Kilista ɠɛʋele faan.

6 Kɛ̀ɛleaiti, gá wo levezu, Maliɠii Yesu Kilista laaseigi zu, ga wo maaɠooza ɠɛɛɠɛloin kpein ba, niiti ti eteai ziɛzu dɔɔʋɛi zu, ti la ziɛzu ga kalagi naa, nii gi boni ga woye. 7 Wa ɓɔɠɔi wo suɠwɛɛ kpezekele, ʋelei wo maanɛai la wo ʋokɔɠɔ gi ma. Mazɔlɔɔ gi la ɠɛni zeini wo zaama ga dɔɔʋɛ vaa, 8 gi la ɠɛni vaani bu nu nɔpɛ ge ʋa gi ɠɔnɔkula ni gi la sɔngɔ veeni, kɛlɛ tɔun, gi kpɔlɔi ɠwɛɛni, ta gi botii ɠɛɛni folo ʋɛɛ kpidi ʋa, nii a kɛ gi mina ɠɛ ga kasɔ wo taɠila kpalaa unma. 9 É la ga ma zobo ka é la ɠɛni gi ʋɛ, kɛlɛ wɔin ɠɛni gi ma, ga gi poo fe wo ya, wa ɠɛ ziɛzu la. 10 Mazɔlɔɔ siɛgi zu gi ɠɛni la wo ʋɔ bɛ, gi niima levei veeni wo ya ga: «Zɔi nɔpɛ é la pɔ ga é botii ɠɛ, é mina daami wo.»

11 Tama gá mɛnisu ga, tanigaa ta wo zaama, ti ta-eteai ziɛzu dɔɔʋɛi zu, ti la faa nɔpɛ kɛɛzu, kɛni faazupui nɔ. 12 Gá ɓɔɛzu naama nui naati pɔ Maliɠii Yesu Kilista laaseigi zu, devei gi feezu, toɠa ga ti botii ɠɛ ziilɛigi zu, ti-zɔlɔɔ ganii ɠɛ ga ti-ɠɔnɔgi.

13 Wɔun wo letegi, kɛ̀ɛleaiti, à mina ɓɔlɔ ga faa ʋagɔi ɠɛɛ vai. 14 Ni nui ta la ɠɛ ziɛni ga kala gooi nii gi bosu wo ma niima zɛʋɛi zu, à ɠizɛ su, kpɔfaama nɔpɛ ge mina ɠɛ wo yɔɠɔzu, wa tiyagaani, naa ɠa a kɛ ti unfe. 15 À mina pɛtɛ ga wo zili nu, kɛlɛ à tɛnɛ eɠɛ ɠɛɛɠɛloun.

16 Maliɠii nii é ziilɛigi veezu, naa ɓɔɠɔi ziilɛigi ve wo ʋɛ mɛtu fai pɛ su. Maliɠii yɛ wo pɛ wo ʋa.

17 Nà Pɔle, nà ɓɔɠɔi zèeʋogi ɠa gè wo luʋɔsu da. Naa ɠa é ga zèeʋogi nà-sɛʋɛiti pɛ su, zekana nà ɗa sɛʋɛ la.

18 De-Maliɠii Yesu Kilista ná-zaalai yɛ wo pɛ wo ʋa.