1 Ɓɛ ɠa é ga ɠima nui ɠɛʋele? Ɓɛ ɠa soogai fai ta wuuɓɛɛzu? Nui ná-ɠimalai ɠa ɗa gaazuʋɛ maanɛ é ná ɠɛ niɛnniɛn.

2 Ɠolo masagi ná-devei ʋɛ, tɔɔzei minazeɠegi ʋa kɛai GALA gaazu. 3 Mina zuvilɛ ga è ʋa ɠula ná-zobogi wu, mina ɓata wanama vai ʋa. Mazɔlɔɔ nii nɔpɛ nɛai masagi ʋɛ, naa ɠa a ɗa kɛ. 4 Daawooi ɠa zobogi bɛ, ɓɛ ɠa zoo é ɠɛ ma: «Lee ɠa è kɛɛzu?» 5 Zɔi é tɔgiti sosu, naa la lɔa faaɓaa su. Ɠima nui kwɛni nii é ga yeeɠɛɠala ʋagɔi, ta ʋelei maanɛai é faiti kɛɛ la. 6 Fai kpein ma yeeɠɛɠala ʋagɔi ɠa ná, ta ʋelei maanɛai faiti ti ɠɛ la. Kɛlɛ nimiza wola ɠa nu vului luɠɔ, 7 mazɔlɔɔ é la kwɛni nii é ʋaazu ʋelela ʋelei. Ɓɛ ɠa a naa lɛɛ la, ʋelei faiti ti ʋaazu ɠɛɛzu la? 8 Nuɓusɛi ná-zobo nɔpɛ ge la zɛnvui ma, ga é ʋa ɓata naa ma, nu nɔpɛ ná-zobo ge la tɔ ɓɔɠɔi zaa voloi ma. Maavaayɛ ge la kɔɔɠɔzuʋɛ. Sili la ɗa ga ɠula nui ɠizo.

9 Gè niima vaiti pɛ pɛtɛgɛ, gè ɠida faiti kpein bu, niiti ti ɠɛɛzu zooi ɠa. Yeeɠɛɠalai ta ɠa ɗa zeeli, nui ta zei bɔɔlaiti unga, nii a kɛ é faa ɲɔi ɠɛ ga tiye. 10 Gè faa ɲɔu ɠɛ nui tanigaa ɠaa, ti ɗa ti maaɠulu fɔɔn, nuiti ti ɗa lɛ, ti ɗa ɠula GALA sei ʋɛlɛi ma ɠoizuʋɛ. Nuɓusɛiti ti ɗa ti maamusɛ taazuʋɛ, ti-ɠɛɛwotiiti faa zu. Naa ɓalaa ka ga wafuun faa nɔ. 11 Tɛi faa ɲɔi la zala zɔlɔɔsu gaamanɔ, naa ɠa é kɛɛzu, nuɓusɛiti kɛʋele ɓɛtɛai faa ɲɔu ɠɛɛ vai ma. 12 Naa pɛ su, anɛɛ ɓalaa nui ta ɠa faa ɲɔi ɠɛɛzu ga seizu ungila (100), naa ʋoluma sii zuɠooza, gè faa ɠila kwɛɛ, naa ɠa ga: Undaanɛɛi ɠa ga naati tɔnɔ, niiti ti lɛbiya veezu GALA bɛ, mazɔlɔɔ ta unfesu ma. 13 Kɛlɛ undaanɛɛ la faa ɲɔu ɠɛ nui ʋɛ, toɠa leʋe nɔ eɠɛ niinigi, tɔɔzei é la unfesu GALA ma.

14 Wafuun fai taɠili ka ná mɔnɔ é ɠɛɛzu zooi ma, toɠa ga: Telebo nui tanigaa ta ná, nii maanɛai ga faa ɲɔu ɠɛ nuiti ti sɔlɔɔ, ti ɗa naa zɔlɔɔ. Faa ɲɔu ɠɛ nui tanigaa ɓalaa ti ná, nii maanɛai ga telebo nuiti ti sɔlɔɔ, ti ɗa naa zɔlɔɔ. Nà bosu ʋolu ga wafuun faa nɔ ɠa ga naa ɓalaa.

15 Nɔ̀un nà koozunɛɛi maamusɛzu. Mazɔlɔɔ nuɓusɛi ná-undaanɛɛi nii é ná zooi ɠa, naa ɠa ga, é laami, é ɓɔɔle, ta é ɠoozunɛ. Naa ɠa maanɛai é ɠɛ ná-botii ʋolu, sii ma voloi pɛ su, nii GALA ge feai zea ga é kɛ zooi ɠa. 16 Gè ɠaaɓaai ma ga zìi pɛ, nii a kɛ gè ɠimalai ɠwɛɛ, ta gè naati kpein pɛtɛ, niiti ti ɠɛɛzu zooi ma, gè ɠɛlɛni ɲiimɛnii ʋa ga foloi ta kpidii. 17 Gè kaani ga ti pɛ ka ga GALA ná-kɛɛwotiiti, anɛɛ ni nuɓusɛi ɠa ɓɔɠɔ ɓɔlɔzu ga é ti ɠwɛɛ, é la zooga pɛ faiti kwɛɛsu, niiti ti ɠɛɛzu zooi ɠa. Ɠima nui ɓalaa ɠɛ ʋa ma, é ti ɠwɛɛ, tɔ ɓalaa la zooga pɛ ti ɠaaɠaazu.