1 Gaamazu gè ɠidaaʋɛ naama vaiti kpein bu, pɛtɛ nii ɠa gè kaai su: Telebo nuiti ta ɠima nuiti, é ʋɛɛ ta-wotiiti pɛ ba ta GALA zeezaama. Ti la ɠite kwɛni ni nɛɛbɛi ɓaa wɔinzeɠemai ɠa zeeli ti ma. Ti la zooga naa tanɔpɛ kwɛɛsu ma yeeluɠɔ. 2 Ɛsɛ pɛ gaaɓelazuʋɛ ɠa ga faa ɠila nɔ: telebo nui ta faa ɲɔu ɠɛ nui, nu ʋagɔi nii ɲadegai ta kɔzɔba nui, zɔi é zalaɠa ɠulazu ta zɔi é la zalaɠa ɠulazu. Ʋele nɔ ɠana é la nu ʋagɔi ta kotoba nui ti yɔɠɔzu, zɔi ɓalaa é minazeɠegiti kɛɛzu GALA bɛ, ta zɔi é luazu ga é mina minazeɠe, zenɔ ɠana ti yɔɠɔzuʋɛ la. 3 Faa ɲɔu wolai taɠili ka zooi ɠa: Nuɓusɛ pɛ gaaɓelazuʋɛ ɠa ga faa ɠila nɔ. É ɓudɛ naa maazu, nuɓusɛiti ziilaavegɛ ga faa ɲɔi, ɠimalala vai ɠɛ ti-yiimaʋɛ ta-eteai pɛ su. Naa pɛ poluma, saai ɠa é ti ɓɔunsu. 4 Tama zɔi é vulua, kito ka naa ʋɛ. Gilɛi nii é vulua, naa vizɔgɛ zala ʋoomai ʋa. 5 Mazɔlɔɔ fulu nuiti ti kwɛni ga ta zaazu, kɛlɛ gɔvɛiti ti la fɔi nɔpɛ kwɛɛ. Tɔnɔ kili ge la mɔ ná ta ɠito ba, tɔɔzei nuɓusɛi yeema ti ma. 6 Ta-nɛɛbɛi ta ta-wɔinzeɠemai, naa ʋɛɛ ta-loloi ʋa, naati pɛ ti ɓega, nii kpein niina é ɠɛɛzu zooi ɠa, tɔnɔ la mɔ naa ta zu.

7 Ɗa-laamianigi mi ga koozunɛ, è ɗa-lɔɔi ɓɔle ga yiima, mazɔlɔɔ GALA ge yeezeiɗa naa wu, nii è kɛɛzu. 8 Fɛti ɠula zeɠei ɠɛ è ɠɔba yeeɠɛɠalai pɛ su, ta gulɔ maku nɛɛnɛgi mina ʋala ɗɔungi zu pɛ. 9 Zɛnvui wo koozunɛɛi zu wa è-anzai nii nɛai è ʋɛ, naa ɠɛ etea wafuungi tɛi su, nii GALA ge feai è ʋɛ ga è kɛ zooi ɠa. Naa ɠa é ga ɗɔnɔi kpɔlɔi naa kpein su, è suzosu zooi ɠa. 10 Nii nɔpɛ è-yeei ɠa zoo kɛɛzu, ɠaaɓa è kɛ ga zɛbɛ. Mazɔlɔɔ gɔvɛalaazu, ʋɛ è liizu ná, nu la zooga boti ɠɛɛzu ná, faazeikpasu la ná, faaɠwɛ ge la ná, ɠimala la ná.

11 Gè faa ɠiligaa ɠaaʋɛ mɔnɔ zooi ɠa: Yeenɔpɛ tɛi kpizɛ wo nu wolaiti ta ɗa leʋe da zɔi pɛ ba, gaaɓaa nuiti ti la ɗa ga ziɛ yeenɔpɛ zɔiti bu kɔɔɠɔzuʋɛ. Ɠima nui pɛ tɛi a ɗa ɠɔnɔgi zɔlɔɔ fala, naavoloi la ga keleɠele nuiti gila tɔnɔ, unfemai la nɔ ɓalaa ga faa ɠwɛɛ nu wolaiti gila tɔnɔ. Mazɔlɔɔ ɛsɛ pɛ ná-kpalai ta ná-undaanɛɛi ɠa ɗa zeeli ma. 12 Nuɓusɛi la kwɛni nii seiɗai tuɠɔ. Ti ɠɛɛʋɛ eɠɛ kalei, niiti tumɔi ti zosu kulafilibai zu, ti ɠulaʋɛ ga wɔnii, niiti ti liizu, ti lɔ kpilii ɠa. Maanɔɠɔi ɠa ɗa ɠula nɔ nuɓusɛiti filiba, é ti zo.

13 Gè ɠimalai ná-faa ɓiigi ta ɠaaʋɛ mɔnɔ zooi ɠa, nii gola vizɔgai gàazu. 14 Taa goi ta ɠɛni ná, su nuɓusɛi la mɔinni. Zɛbɛsu masagi ta ʋaani, é vala ba. É seini kɛlɛ su, é siɠigi loni taai ma ziɠigi ɠoba. 15 Zunui ta ɠɛni taai naa zu, é ga ɠima nu, tama balagai. É taai naa unmɔɔni ga ná-ɠimalai, kɛlɛ nu nɔpɛ ge la ɠizɛni bala nui nii ɠɛɛ vai zu. 16 Nɔ̀un gè ɠɛ ma: Ɠimalai vizɔgɛ zobogi ʋa, kɛlɛ nuɓusɛiti ta ɗa bala nui ná-ɠimalai ʋɛlɛʋɛlɛ, ti la daawooiti soga.