10
1 Diili ʋoomaiti ta ɗa gulɔ maku nɛɛnɛgi ɠoloɠolo, é vɛɛlo.
Ʋele nɔ ɠana ɠimalala goi ɠa ɗa vɔni da ɠimalai ma ta lɛbiyai.
2 Ɠima nui ɠigi ɠa ɗa lo tuɠɔ ga pagɔ,
kɛlɛ ɠimalala nui ɠigi ɠa ɗa faiti kula kazemazu.
3 Ɠimalala nui ziɛ ʋelei ɠa ɗa dɛ pele zaamaʋɛ ga é la faa ɠaaɠaazu,
ná-kɛɛwotiiti maaʋele ma, toɠa bosu ɛsɛ pɛ ma ga: «Nà ga ɠimalala nui.»
4 Ni ɗa-ɠundiɠii yiiɠaa a wanana è ma, mina zeɠe è-losuʋɛ,
mazɔlɔɔ ɓɔɠɔzogi ɠa ɗa faaɠaaza golaiti kpudɛ nu maazu.
5 Gè faa ɲɔi ta ɠaaʋɛ, é ɗa ɠɛ zooi ɠa, é ga kundiɠiiti sɔgi. 6 Naa ɠa é ga: Ɠimalala nuiti ta ɗa tosu wolaiti sɔlɔɔ, zɔiti mu ti ga kpɛtɛ nuiti, naati ti ɗa yɛ tosu goiti su. 7 Gè duɔi tanigaa ɠaa zeini sooiti kɔma, masa dointi ti ɗa ziɛ ɠɔɠɔa ga duɔiti kɛʋele.
Zɛnvui ma vaaɓaagiti
8 Zɔi é zeɠei wɔɔzu, toɠa zoo tɔ ɓɔɠɔi é loo su.
Nii ma é siɠigi ʋa wɔɔzu, kaalii ta ɠa zoo é laaloo ma.
9 Kɔtui ɠula nui ɠa zoo ɓɔɠɔ maawanazu ga ta,
zɔi ɓalaa é gului ʋalizu, toɠa zoo faa ɠɛɛzu ga ɓɔɠɔ.
10 Kɔlui ɠaa a zaana, nui nii é botii ɠɛɛzu la, ni é la gaalini, kɛni é boti ɠɛ ga zɛbɛi pɛ,
kɛlɛ ɠimalai ɠa a ɗa ɓɔ nu ʋa ɗa-vaiti ti ɗa zoloo.
11 È zoo pa ɠaɠosu ga kaalii, ni ɗa tɔɔzeina ga kaalii è ɲi,
naa ma ɠulanumai ɠa ga leeni?
Nu ɓɔɛ nɔ kpein
12 Ɠima nui a ɓɔɛna, gooi ɠa ɗa nuiti ɛnɛkɛ,
kɛlɛ ɠimalala nui wooi ɠa ɗa pili faa zu.
13 Toɠa ɗa woo lɔɔzei ga ɠimalala ɓɔɛiti,
é gaaɓela ga ɓoloɠa woo ɲɔuɲɔugiti.
14 É la ɠwɛ kwɛni kpɔɛzuɠulai ʋa.
Tama nu la luɠɔ ɠwɛɛ.
Ɓɛ ɠa a naa lɛ ga nu, nii é ʋaazu ɠɛɛzu ga poluʋelei?
15 Ɠimalala nui ná-botii ɠa ɗa suziɠa,
é la vɔlɔ kwɛɛ ʋelei a lɛɛ la taazu.
Masagi ta zobogi
16 Maanɔɠɔi ɠa zooi naa ʋɛ, nii ná-masagi ga doungoi,
ta ná-kundiɠiiti ti wuunsu nɔ sobui ga ɠulukpugi.
17 Undaanɛɛ ɠa naama yooi ʋɛ, nii ná-masagi ga seizumaanɛ suwuzui,
ná-kundiɠiiti ti daami wosu yeeɠɛɠala ʋagɔi ma,
nii a kɛ ti zɛbɛ niinɛ zɔlɔɔ, kɛlɛ é la ga ti ɓɔɠɔ ve dɔɔ ɓɔɔlei ya.
18 Nui nii ɲaka yeeiti ti ba, dakai ɠa ɗa ɠolo ma,
tona ɗɛi ɠa ɗa lɛ dɔɔʋɛ nui ma pɛlɛi wu.
19 Nu ɠa ɠɔnɔgi ɓɛtɛzu ga é è yiilɛi,
dɔɔi ma ka ɗa nu ɠoozunɛ,
walii ɠa zoo naati feezu è ya.
20 Mina masagi ɠoto anɛɛ è-yiimaʋɛ,
mina zobobɛ nui ɠoto, anɛɛ ɗa è laa ʋɛlɛi wu.
Mazɔlɔɔ wɔnii ɠa zoo è-wooi vazasu, é naa laazeeli nii è bogai.