1 È-ɠɔnɔgi ʋili ziɛi ɠa,

mazɔlɔɔ suɠooza ʋa, ɗa ʋaazu kaazu.

2 È-ɠɔligi ɠaaɠwɛ su nu lɔfela ɓaa dɔsaʋa ʋa,

mazɔlɔɔ è la kwɛni nimizai ma zii, nii é ʋaazu eteai zu.

3 Tonaɓiingiti daa ɠa veena ga ziɛi, tonai ɠa ɗa ʋu zooi ma.

Gului a loona zooi ma, ʋɛ nɔpɛ toai ná, miná ɠa a ɗa yɛ ná.

4 Zɔi é luazu fiilɛi ta tonai ʋaa vai ʋa,

naama nui la molo vazaga pɛ, ɓaa é ʋa molo leʋe.

5 È la zɛnvu viilɛi ná-pelei ɠwɛni,

ʋelei doin ɓɛtɛzu la koma anzanui ɠoozu.

Ʋele nɔ ɠana ɓalaa è la zooga la GALA ná-faiti kwɛɛsu da,

tɛigi é fai kpein kɛɛzu.

6 Ɗa-molo zuwui vaza fai lɔɔzei sobuzobui,

mina looɠo botii ʋa eyɛsu kpɔkɔ zeeli.

Mazɔlɔɔ è la kwɛni ɗa-wotiiti su,

ma ɓɛgele ɠa soloogai, ɓaa ni ti pɛ soloogɛ.

7 Wozakalagi ɠaanɛɛʋɛ,

tama fizɔgɛ ga nu foloi ɠa ga ɠaazu.

8 Naa ɠa é ba, nuɓusɛi maanɛɛʋɛ ga

é ɠoozunɛ konagi ɠilagila kpein ma feai zea,

anɛɛ ɓalaa sii zu ɠa ɠoozazu.

De ɠizɛ su ga folo zuɓidiai ma mɔinmɔin ka ʋa,

ta ʋelela ʋele vai kpein ka ɠɛ ga wafuun faa.

9 Buzeɠe niinɛgi, ɠoozunɛ ɗa-nu niinɛlai zu,

ɠɛ gaanɛɛi zu naama ziɛgi zu, è yiima vai kpein kɛ.

Kɛlɛ ɠizɛ su ga GALA ka è lukpɔɠaaleʋe naama vaiti kpein su.

10 Ziizoolɛi maaɠooza ɓɔɠɔ ʋa, è soolɛi maaɠooza è-ɠɔlɔgi ʋa,

mazɔlɔɔ nu niinɛlai ta geelaalaosu wozakalagi ti leʋe da zuvilɛʋɛ.