12
Ɠizɛ è Ɓɛtɛ Nui zu
1 Ɠizɛ è Ɓɛtɛ Nui zu, ɗa-nu niinɛlai zu,
aisa folo ɲɔiti ti ʋa ʋa,
ta konagiti ɗa ɠɛ ɠɛɛzu ɓɔɠɔ ma su:
«Zɛnvui wɔinzeɠea mà.»
2 Názu ɠa foloi ta wozakalagi ti wuu ɠa ɓidi la,
alugi ta somideɠaiti ti ʋala ti-ma zezeiti ma,
tonaɓiingi lɛ ga gaamanɔ, tonai leʋega ʋoluma.
3 Názu ɠa pɛlɛ makɛ nuiti ti zu ɠa ɗa ɓali la,
gaaɓaa nuiti ti ɗa ungi maayei,
koda ziɠa anzanuiti ti ɗa lo, tɔɔzei ti mɔinlalai ʋa,
zɔiti ti ɠɛa unmaalaasu fenɛtɛlɛiti da, ti maa ɗa ɓidi.
4 Názu ɠa etea ʋɛlɛ ɓo felegɔiti ta ɗa vala da su,
koda ziɠa lugi ɠaayei, é za ba,
ma ziɛgi zu ɠa wɔni ɠila kpegi wooi ɠa ɗa ɲiimɛnii ɓɛ la,
guye loo nuiti gooi ɠaayei.
5 Názu ɠa nu ɠa ɗa inɛinɛ da ga è ʋa lɛ ada zɛlɛgai,
dualuagi ɗa nu zo siɛ ʋelei zu,
amande wului ʋuai, kotogi ɗa wui ɓɔɠɔ ma,
siɛgi zu faa nɔpɛ wɔin la nu zosu da.
Mazɔlɔɔ nuɓusɛi ɠa na li ná-pɛlɛ ɠaaɓelagi wu,
naama ziɛ su, saa wɔlɔ wo nuiti ti ɗa leʋeteʋe koi yɔɠɔzuʋɛti.
6 Ɠizɛ è Ɓɛtɛ Nui zu,
aisa wali ɠalui ʋa vie,
ta zanu ɗaawɔi ʋa ɠɛ é wolo,
ziɛ liɠi wolo la yɔɠɔzu ziɛungi zu,
ziɛ ɠula ɠalagi ʋa ɠɛ é ɠale, é loo ziɛi wu,
7 aisa fufiligi ʋa ɠaaɠale ma pɔlɔi zu, ʋɛ seɠeai ná,
ta zɛnvui ʋa ɠaaɠale ma GALA pɔ, nii é feai.
8 Tɛnɛbo Nui ɠɛ ma: «Wafuun faa ʋɛɛ wafuun faa ʋa,
ti kpein ka ga wafuun faa nɔ.»
Kpɔɛi un sosuʋɛ
9 É ɠula Tɛnɛbo Nui ná-ɠimalai ʋolu, é nuɓusɛiti kalani mɔnɔ ga nii é ɠɛni kwɛɛni. É tɛnɛ faalaalii ma mɔinmɔin kɛʋele ɓɛtɛni, kpegai ma ga ɠida ti-ʋoluʋɛti bu ga pagɔ. 10 É ɠaaɓaani é iɲɔdɔɔ ɓɔɛiti sɔlɔɔ, ta é gaama ɓɔɛ ɠiteɠitegiti sɛʋɛ.
11 Ɠima nuiti gooiti kɛɛʋɛ eɠɛ kpaku ɠaazoɓagiti, ɗa ti kpein gaalɛɛna ba sɛʋɛ ɠila su, kɛɛʋɛ eɠɛ kɔlu ɠaazoɓagiti, ti ɓadɔai. Naa kpein kulaʋɛ baala makɛ nu ɠila su. 12 Naa pɛ poluma, dòun zunu, mina ta wola ʋɛɛ ba. Nu ɠa zoo sɛʋɛi ɠɛɛzu ga mɔinɗa, kpela ge la ɠɛa ba, kala mɔinmɔin bo fai ɓalaa ka ga kpɔlɔi nui ʋɛ.
13 Ade woilo niima ɓɔɛzuɠulai kpein gaaɓelasuʋɛ ma:
Lua GALA ba, è ná-deveiti so,
naa ɠa nuɓusɛi pɛ maanɛai ga ti kɛ.
14 Mazɔlɔɔ GALA ka ʋaazu kɛɛwotiiti kpein tukpɔɠaaleʋezu,
anɛɛ niiti ti ɠɛai dɔɔɠuzu, é ɠɛni ga ma ʋagɔ ɓaa ma ɲɔu.