1 Leevi ná-pɛlɛyeɠei wu zunui ta liini, é anzanui ta zeɠe ná-bolodai zu, é sei ga anza. 2 Naama anzanui kogi zeɠeni, é doun zunu zɔlɔɔ. É kaani ga doungoi ʋagɛ, é seɠeni, é dɔɔɠu alu saʋagɔ laawu. 3 Tɛi é la mɔ ɠɛni zooga é ʋa dɔɔɠu, é tɛmu ɓɔlɔgi zeɠeni, é managi ziɛ ba. Naa ʋolu é doungoi zeɠeni, é da su, é li, é sei seeligiti saama ziɛ wolai Nile ɠobaʋɛ. 4 Doungoi diɛ anzanui liini, é lo ɠoozama tago, nii a kɛ é kwɛɛ, nii é ʋaazu ɠɛɛzu la.

5 Falaɠɔn ná-doun anzanui yeini ziɛ wolai Nile ʋɔ pelei ga é maagba, ta ná-botiɠɛ anzanuiti, ti ɠɛni ziɛziɛsu ziɛ wolai Nile laaʋɛ. É wɛlɛni, é tɛmu ɓɔlɔgi ɠa seeligiti saama, é ná-botiɠɛ anzanui leʋeni ga é li, é seɠe. 6 É daalaoni, é doungoi ɠa laani su. Zunu loungoi ɠɛni de, é ɗa wɔlɔ. Naa maawɔin soni, é ɠɛ ma: «Eɓulu nuiti ti-loin ta ɠaa.»

7 Doungoi diɛ anzanui ɠɛni Falaɠɔn ná-doun anzanui ma: «Nà zoo nɛi gè li, gè doun ɠulasu anzanui ta loli è ʋɛ, Eɓulu anzanuiti saama, naa ɠa a kɛ é ɗa ɲiimii ve doungoi nii ya è ʋɛ?» 8 Falaɠɔn ná-doun anzanui gooɠaaʋoteni, é ɠɛ ma: «Li!» Anzanu loungoi liini, é doungoi dee loli. 9 Falaɠɔn ná-doun anzanui ɠɛni ma: «Li bɛ̀ ga doungoi nii, è ɗa ɲiimii ve zea, nà ʋaazu è zalazu.» Anzanui doungoi zeɠeni, é kula su. 10 Siɛgi zu doungoi wɔɔlɔni la, é liini la Falaɠɔn ná-doun anzanui ʋɔ. Naa seɠeni, é kɛ ga ná-doun zunu. É daasei pɛɛni ga Moize,*Moize: daaseigi nii ti maaɓuɠaai ʋa ta «kula.» mazɔlɔɔ é ɠɛni ma: «Gè kulaʋɛ ziɛi ɠa.»

11 Naama ziɛgi zu, Moize wɔɔlɔai ma, é liini ná-nuɓusɛiti pɔ bɛ, é wɛlɛni, é naati ta-woti ɓaagiti pɛtɛ. É Ezipete nui ta ɠaani, é ɗa kɛɛɠɛloin Eɓulu nui ta loɠa. 12 É wɛlɛni ɠoba, é kaai ma ga nu nɔpɛ ge la ɠɛni ná, é Ezipete zunui zoni, é paa, é dɔɔɠu ɲaɠaegi zu. 13 É ɠulani naa ʋoluma zobui, pɛtɛ, Eɓulu zunu felegɔ ɠɛni ná, ti ɗa kɔ. Zɔi é la ɠɛni ʋeeni, é ɠɛni naa ma: «Lee vaa zu è è-ɠɛɛloin loɠazu?» 14 É gooɠaaʋoteni, é ɠɛ ma: «Ɓɛ ɠa é è zeiɗa ga kundiɠii ta tukpɔɠaaleʋe nui gi unda? Ɗa ɠisiɛzu ga è pàa, eɠɛʋelei è Ezipete nui ʋaani la?» Moize luani, é ɠɛ ɓɔɠɔ ma: «Gaamazu fai nii ɠwɛɛgɛ na.» 15 Falaɠɔn naa mɛnini, nii é ɠɛɛni, é ɠɛni pɔ ga é Moize ʋaa.

Kɛlɛ Moize ʋelani Falaɠɔn ʋa, é li poun, é zei Madiyan yooi zu. Kɛai ma ziɛyeɠei ta ɠobaʋɛ, 16 anzanu loun lɔfela ti ʋaani ziɛ zaɠazuʋɛ. Ti ɠɛni ga Madiyan zalaɠa ɠula nui ná-doun anzanuiti. Ti toganiiti ta-ɓɔɔle wosuʋɛti daaveni, ti ti-ɠɛɛ ná-togani ɓulugiti kɔ. 17 Kɛlɛ togani makɛ nuiti ti ʋaani, ti ti ɓɛ. Moize wuzeɠeni, é ti maalobo, é ta-logani ɓulugiti kɔ. 18 Siɛgi zu ti ɠaleni ma la ti-ɠɛɛ Leyuwɛle ʋɔ bɛ, naa ti ɠaazaɠani, é ɠɛ ti ma: «Lee vaa zu wo ʋaai fala za?» 19 Ti gooɠaaʋoteni, ti ɠɛ ma: «Ezipete zunui ta ɠa é gi maalobogai, é gi ɠula togani makɛ nuiti zea, é ziɛi zaɠaʋɛ vɔlɔ gi ʋɛ, é togani ɓulugi ɠɔ.» 20 É ɠɛni ná-doun anzanuiti ma: «Mini ɠa é ná? Lee vaa zu wo zunui naa yɛgai mu? À tolina, é daamianigi ta mi.»

21 Moize yeezeini bu ga é zei zunui naa ʋɔ bɛ, naa ma ge ná-doun anzanui Seefɔla zeɠe, é fe bɛ ga anza. 22 É doun zunu zɔlɔɔni. Moize daasei pɛɛni ga Gɛɛlesome (nii poluʋɛ ga «seikɔɠɔmai»), mazɔlɔɔ é ɠɛni ma: «Nà ga seikɔɠɔma nui, gè zeini zou ɠili su.»

23 Suɠoozaai ma, Ezipete masagi zaani. Izelayɛle nuɓusɛiti ti ɠɛni ɓalasu nɔ dɛ duɔlai zu, ti ɠɛni kpeei loozu. Kpeei ti ɠɛni toozu duɔlai zu, naa zeelini GALA ma. 24 GALA ge ti ɓala gooi mɛnini. GALA ge ɠizɛni ná-minazeɠegi zu, é boni Aɓalaame ʋɛ, ta Izaake, naa ʋɛɛ Zakɔɓe ʋa. 25 GALA ge wɛlɛni Izelayɛle nuɓusɛiti ba, ti maawɔin so.