Ezekiyɛle
Ná-Sɛʋɛi
Sɛʋɛi lɔɔzeizuʋɛ ma woo mɔungiti
Ezekiyɛle Ná-Sɛʋɛi ɠa ga GALA goo zɛʋɛi é lo Izilayɛle loo vai ʋa bu, ta buzeɠe vai ʋolu. Nii kpein nu a kwɛɛ Ezekiyɛle ɓɔɠɔi ná-faa zu, naa pɛ ka zɔlɔɔsu sɛʋɛi nii ɓɔɠɔi nɔ zu. É kɛɛni GALA goo wo botii zu ga kona ʋuufelegɔ maazu felegɔ (22), kona dɔfela aisa Zeluzalɛme ʋa ɠoloɠolo, kona undɔɔlugɔ puulɔsaʋa maazu lɔzitai (586) ma aisa Yesu Kilista ʋa zɔlɔɔ, ta é kona puugɔ maazu lɔɔlugɔ (15) ɠiligaa ɠɛɛni Zeluzalɛme koloɠologai ʋoluma. GALA ge ɠɛni Ezekiyɛle ma kɛni poogiti pɔ, é faa mɔinmɔin gaalɛɛ ga pagɔ, fai niiti ti ʋaazu zeelizu Izilayɛle ma. Naama ʋoogi gila ka gaaɠwɛsu lɔɔlugɔi zu, ʋɛ GALA ge ɠɛɛzu ná, é kpɛlɛi wo, é ma leɠai ɠaaɠwɛ su ga saʋagɔ, é dɛɛ naa ʋɔ ga fai nii é ʋaazu zeelizu Zeluzalɛme ma (5:1-17).
Ezekiyɛle Ná-Sɛʋɛi ɠaaɠwɛɛʋɛ su ga saʋagɔ: Izilayɛle lukpɔɠaaleʋe vai, Izilayɛle maaɠoolizu zii ɠiligiti tukpɔɠaaleʋe vai, ta Izilayɛle zei vai ʋolu ga niinɛ. Naama vaiti pɛ su, woo ɓii gola ɠila ka ná, naa ɠa ga naama vaiti ta ɓɔ ade ʋa ɠale, ade GALA kwɛɛ. Ezekiyɛle Ná-Sɛʋɛi zu, mɔinʋɛ puulɔzita (60) ma, é ɗa niima woo ɠilagi zɛʋɛ: «Ta suɠwɛɛ naazu ga nà ɠa gè ga Ɠɔoɠɔ GALAGI.» É ɠɛni ga GALA ge ná-nuɓusɛiti lukpɔɠaaleʋe, ɓaa é ti zei ʋele ɓɛtɛ ʋolu, ada zoo kalagi zɔlɔɔsu, é lo tɔun ba, ta nii wɔin ma ada-vaa zu.
Unsosuʋɛ
1. GALA ka Izilayɛle lukpɔɠaaleʋe (1:1—24:27).
2. GALA ka zii ɠiligiti tukpɔɠaaleʋe, niiti ti Izilayɛle maaɠoolizu (25:1—32:32).
3. Ezekiyɛle GALA gooi woni é lo Izilayɛle zei vai ʋa ʋolu ga niinɛ (33:1—48:35).
Izilayɛle Lukpɔɠaaleʋe Vai
1
(1:1—24:27)
Ɠɔoɠɔ GALAGI ɠula vai kɛlɛma
Ezekiyɛle ʋɛ
Ezekiyɛle ʋɛ
1 Kona ʋuuzaʋasiɛi (30) ma alu naanigɔi ma volo lɔɔlugɔi ma, gè ɠɛni Zuifuiti saama niiti ti ti ɠulani zooi ʋa, gi ziɛ wolai Keɓaal ɠobaʋɛ. Geeɠɔlɔgi laalaoni, GALA ge kulakɛlɛmaiti teʋeni mà. 2 Masagi Yeɠoyakin ná-kona dɔɔlusiɛi ma kasoi ɠa, 3 miná, Ɓaɓilɔne nuiti ta-yooi zu, ziɛ wolai Keɓaal ɠobaʋɛ ɠa Ɠɔoɠɔ GALAGI ɓɔɛni pɔ̀ ná, ná-zɛbɛi yei mà, nà Ezekiyɛle, zalaɠa ɠula nui Ɓuzi ná-doun zunui.
4 Gè wɛlɛni, gaamanɔ gè tɔngɔlɔ fiilɛi ɠa, é ɗa zeɠe ga lɛkpɛmaʋɛ nu ɠɔʋɛzu ʋelei, é ɗa zɔɔ tonaɓiin golai ʋa, mainmain ɗa saɠa su. Tonaɓiingi naa maalatini ga wozakalagi, é ɗa nu ɠaazuɓɔi. Saamaʋɛ zu ɠɛni volozu eɠɛ kɔlu ɓɔigi é abui ɠa. 5 Zaamazuʋɛ tɔna nɔ, zɛnvu ani naanigɔ ɠɛni ná, ti vulua, ti ɠulaai ga nuɓusɛi. 6 Gaazuʋɛ ɠɛni ti ɠilagilagi ʋa ga naanigɔ, koʋegi ɠɛ ti ɠilagilagi ʋa ga naanigɔ. 7 Ti-ɠɔɠɔiti ti zɔleni, ti-ɠɔɠɔzapalagiti ti ɠɛni ga nikɛ yiʋo zinɛi ʋolokagi ɠɛʋele, ti ɗa volo eɠɛ kɔlu ɓɔigi kpɛlɛai. 8 Nuɓusɛi yeei ɠɛni ti naanigɔ pɛ ti ɠoʋegiti bu, ʋepema naanigɔi pɛ ma. Ti naanigɔiti pɛ ɛsɛ gaazu ɠɛni ba ta koʋegiti. 9 Ti-ɠoʋegiti ti ɠɛni loni ɓɔɠɔ ʋa, ti ɠɛni zɔlesu, ti ɗa li ga ɠakala ʋelei, ti la ɠɛni ti-ɓusɛi latisu. 10 Ti-ɠaazuʋɛ ɠulani ga zunu ɠaazuʋɛ, zala ɠaazui ɠɛni ti naanigɔ pɛ ba ti yeezazuʋɛ, nikɛ zinɛ ɠaazui ɠɛ ti ʋa ti ɠɔʋɛzuʋɛ, koɠɛ ɠaazui ɠɛ ti ʋa. 11 Ti-ɠoʋegiti felegɔi ti lɛɛni geezu ʋelei, naati ti ʋilini ɓɔɠɔ zu, ti ɗa ti-ɓusɛiti maalɔɔɠu ga felegɔiti. 12 Ti ɠilagilagiti pɛ ti ɠɛni zɔlesu, ti ɗa li ga ɠakala ʋelei, ti ɗa li ʋɛ ʋele zɛnvui ɠɛni liizu ga tiye ná, ti ɓɛdɛ la ba ga ti lati. 13 Nu ɠɛni abulekaiti kaazu zɛnvu aniiti saama, ti ɗa ɲiikpi eɠɛ sɔmɔgi ma ziiti. Abui ɠɛni nu ɠaazuɓɔizu, ta mainmain ɠɛni ɠulazu su, é ɗa vaza. 14 Zɛnvu anii naati ti ɠɛni ɓizɛzu, ti ɗa li, ti ɗa ʋa ga suvilɛi, eɠɛ geeɓadɛi.
15 Gè wɛlɛni zɛnvu anii naati ba, gè ani ɠɔɠɔ ɠiliɠiligi ɠaa ti ɠilagilagi ɠobaʋɛ, é zei zooi ʋa. 16 Ma ɠɔɠɔ ɠiliɠili naanigɔi pɛ ge ɠɛni ga ɠɛʋele, ti ɗa volo ga kɔtu zɔngɔ ɓaagi ɠɛʋele. Ti ɠulani ga ʋe, ti ɓɛtɛni, ti lɔ ɓɔɠɔ zu ti pɛ. 17 Ta la ɠɛna ziaa, ta la zoo liizu ʋepema naanigɔiti pɛ. Ʋɛ ná nɛai ti ʋɛ, miná ʋele ɠa ti ɠɛni liizu la, ti ɓɛdɛ la ba ga ti ʋa lati. 18 Ma ɠɔɠɔ ɠiliɠiligiti niiti ti ɠɛni zeizu ti ɠa, naati gaaɠoozani nu ɗa lua ba, ti-ɠaazuɠɛzɛiti ti ti maaʋɛ pɛ. 19 Siɛgi zu zɛnvu aniiti ta la ɠɛna ziaa la, ti-ɠɔɠɔ ɠiliɠiligiti ti ɠɛni latisu ti ɠoba. Ta la wuzeɠena zooi ma, ti-ɠɔɠɔ ɠiliɠiligiti ti wuzeɠe ɓalaa. 20 Ʋɛ zɛnvui a la ɠɛ ti li ná, miná ɠa ti ɠɛni liizu ná. Ti ɠɛni ɓaɠasu ʋɔɔma nɔ ta ti-ɠɔɠɔ ɠiliɠiligiti, mazɔlɔɔ zɛnvui é ɠɛni zɛnvu aniiti su, naa nɔ ɠa é ɠɛni ma ɠɔɠɔ ɠiliɠiligiti su. 21 Siɛgi zu zɛnvu aniiti ta la ɠɛna lia la, ɓaa ti lo, ɓaa ti wuzeɠe, ti zɛlɛ zooi maazu, ma ɠɔɠɔ ɠiliɠiligiti ti ɓena kɛ ga ti ɠɛʋele, ti li, ɓaa ti lo, ɓaa ti wuzeɠe, ti zɛlɛ zooi maazu, mazɔlɔɔ zɛnvui é ɠɛni zɛnvu aniiti devezu, tɔnɔ ɠa é ɠɛni ma ɠɔɠɔ ɠiliɠiligiti devezu ɓalaa.
22 Anii ta ɠɛni zɛlɛni zɛnvu aniiti tɔungi maazu, eɠɛ geei ɠaaʋɛ, é ɗa volo gola eɠɛ sanu ʋɛɛlɛi. 23 Geei ɠaaʋɛ tɔna bu, zɛnvu ani ɠilagilagi pɛ ge ɠoʋe felegɔiti sumaaleni, ti ti zei da ta zɔiti, tama felegɔi zɔiti, ti ɗa ɓɔɠɔ maalɔɔɠu ga naati. 24 Gè ti-ɠoʋegi lugi mɛnini, siɛgi zu ti ɠɛni ɠoʋesu da. Maalugi ɠɛni eɠɛ kpoloɗɛi lugi, eɠɛ GALA Zɛbɛi-Pɛ-Maliɠii wooi, ɓaa mu eɠɛ kɔɔɠɔ nuiti ti mɔinɗa gola, ti zɔngɔ wooi. Ta la lona, ti-ɠoʋegiti pɛɛ su. 25 Geei ɠaaʋɛ é ɠɛni zɛlɛni ti maazuʋɛ, naa maazuʋɛ, zɔngɔ wooi ɠɛni miná ɓalaa.
26 Geei ɠaaʋɛ tɔna maazuʋɛ, anii ta ɠɛni ná eɠɛ kɔtu zɔngɔ ɓaagi é ga ma ɓiinii, kɛai eɠɛ masa kpɔkpɔgi. Naa maazuʋɛ ná ɠaaɠoozaai, anii ɠazaʋigi ta ɠɛni ná, eɠɛ nu vulu. 27 Gè anii ɠazaʋigi naa ɠaani é ɗa volo eɠɛ kɔlu ɓɔi maaloungai, maaɠooliai ga abui. Ɗa sɔligi ʋɛtɛna, maazu ʋelei ta buu ʋelei, gè kaani eɠɛ abui ma voloi ɠa kakugai ma. 28 Wozakalagi é ɠakuni ma, é ɠulani ga kpazamanamanagi é volozu tonaɓiingi zu, foloi tonai puuzu la. Ɠɔoɠɔ GALAGI ná-lɛbiyai é volozu, naa ʋaaɠulabai ɠana. Gè naa ɠaai ma, gè looni zooi ma, gè laaʋɛɛ. Názu ɠa gè nui ta woomɛnini da, é ɗa ɓɔɛ pɔ̀.