1 Ɠɔoɠɔ GALAGI, ɠizɛ naa zu, nii seeliai gi ma.

Wɛlɛ, è gá-ɓaaɠulamai ʋɛtɛ.

2 Gá-yooi vea taɠiligaani zea,

gá-ʋɛlɛiti ti ve wɛɛinti zea.

3 Gi ɠɛa ga podointi, kɛɛɠɛ la gi ʋɛ,

gi-leeni ti ɠɛ eɠɛ poanzaiti.

4 Gá ɠɛɛna gá-ɗɛi ɓɔlea, kɛni gi geya ga walii,

kɛni gi gá-ɠoʋi vɔɔi ɠeya pɛ, gi ʋa sɔlɔɔ.

5 Gi nimiza nuiti ta gi ʋolu,

gi ɓɔlɔa, dooɠo ge la gi ʋɛ.

6 Gi yeezeini Ezipete yooi ʋɛ,

ta Asiili ʋele, gi ʋa daami wo gá-ʋului zu.

7 Gi-ɠɛɛni ti kotoi ɠɛɛni, kɛlɛ ti la mɔ ná,

gá ɠa niina gi ta-vaaɠaaza golai ma ɠasɔi zeɠezu.

8 Duɔiti ta zeini gi unda,

kɛlɛ nu nɔpɛ ge la gi ɠulazu ti ya.

9 Nii a kɛ gi daamianigi zɔlɔɔ, gi-un ka ɠɛɛzu é yɛ su,

gá ɠomisu nu ɓulugi ma teʋebai zu, boɠa zɔkpɔi ti ya.

10 Gi-ɠɔlɔgi ɗa ɠala eɠɛ gá ɠɛ fuulu zu,

pului ná-kpɔidai ʋɛ.

11 Ti anzanuiti koloɠoloni Siyɔn,

ta anza ɓeaiti Zuda laa wolaiti su.

12 Ti kundiɠiiti kpadɔni gului ma ga ti-yeeiti,

ti la ɠɛni unfeni kɛwola wɔlɔiti ma ga tago ɓalaa.

13 Nu niinɛiti ti ɠɛni ani ziɠa ɠɔtui zeɠezu,

zunu loungoiti ti ɠɛni loozu gulu ɠasɔiti bu.

14 Kɛwolaiti ti looɠoga unpilɛ faiti ba,

nu niinɛiti ti looɠoga ta-wuye loo vaiti ba.

15 Koozunɛ la mɔ gi-yiimaʋɛ.

Gi ɠɛni kuai wosu ga koozunɛɛi, naa valiboga ga gaazuɠilii.

16 Lɛbiya wɔɔlɔgi ɠulaa gi unba.

Gi maanɔɠɔa, mazɔlɔɔ gi kotoi ɠɛa!

17 Ungo, ni gi-yii ɠa ɓɔlɔzu,

ni gi-ɠaazuʋɛti ti ʋɛɛʋɛ ma,

18 naa lɔɔzeiʋɛ Siyɔn ɠoloɠolo fai ʋa,

miná ɠa niina koʋeiti ti ziɛziɛsu ná.

19 Kɛlɛ ɗɔun ɗa, Ɠɔoɠɔ GALAGI, ɗa masadai ɠɛɛzu eyɛsu ɠɔ,

ɗa-masa kpɔkpɔgi ɠa ná siɛnɔpɛ su.

20 Leeni vaa zu ɗa yeema gi ma eyɛsu ɠɔ?

Leeni vaa zu ɗa ɠɛlɛ gi ʋa eyɛsu suɠooza?

21 Ɠɔoɠɔ GALAGI, gi ɠaaɠale ma è ʋɔ pelei, gá ɠale ma!

Gá-voloiti niinɛ, eɠɛʋelei é ɠɛni la mɔungi!

22 Ɗa gi ʋili ya nɛi gaamazu ga ɠite ɓaa?

Ɗa yiiɠaawana nɛi gi ma, da ge leʋe ɓaa?