1 Leeni ʋe deɠɛmu! Zanugi ɠɔikɔiga!

Zanu kitei la mɔ volozu!

Kɔtu ɲadegaiti ti vazaga

taazuʋɛ peleiti su.

2 Leeni ʋe mu, Siyɔn lointi ti vizɔgai,

ti-zuɲɛgi vizɔni zanugi ʋa,

ta zoo ti ɠaalu ga pɔlɔ liɠii zɔngɔi nɔ,

diɠi lo nui kpɛtɛai?

3 Anɛɛ koʋeiti ta ɗa ɲiimi lɔ

ti-lointi da.

Kɛlɛ nà-nuɓusɛiti kɛɛʋɛ eɠɛ maawɔinɠaalala loun deei,

eɠɛ saa wɔnigi é teʋebai zu.

4 Kpɔɔle wɔin doun ɲɛgiti nɛgiti kataga

ti-laaɠoozuʋɛti ba.

Doungoiti ta daamianigi ɠaiziɛzu,

nu la ná, é ʋa ɠɛ dɔ daalaa ɠila kpalaa veezu ti ya.

5 Niiti ti ɠɛni daamii nɛɛnɛ golai wosu,

naati ta loozu ga fikɛʋalasui taazuʋɛ peleiti su.

Niiti ti kulasui woni ani ʋagɔiti pɛ saama,

naati ta kpoɠagiti suvelɛsu.

6 Nà-nuɓusɛiti ta-ɠakagiti suwɔɔlɔʋɛ gola

é leʋe Sɔdɔme nuiti ta-vaaɠaazagiti ba,

nii é ɓezeɠeleni gaazulooma laa ɠila daawu,

nu la yeevɔɔɠuni ba.

7 Siyɔn ɠundiɠiiti ti ɲadeni, é leʋe kobe kolegi ʋa,

ti-ɠɔlɔgi ɠole é leʋe nɔnɔi ʋa.

Ti-ɓusɛi ʋa é leʋe kpɔzɔi ʋa.

Ti-ɠaazuʋɛ ɗa volo é leʋe kɔtu zɔngɔ ɓaagi ʋa daa ga safiilegi.

8 Ti maaʋɛ lɛiɗa é leʋe kpakpaliɠii ʋa,

nu la mɔ ɠwɛɛsu ɠaazu ti ʋa taazuʋɛ.

Ti-ɠɔlɔgi ɠataga ti-ɠaeiti ba,

ti-ɠɔlɔgi vɔa ti ma eɠɛ gulu vɔɔi.

9 Niiti ti zaazu ga boɠa zɔkpɔi, naati undaanɛɛʋɛ

é leʋe naati ba, niiti ti zaazu ga pului,

ti vɔɔzu, ti ɠaɲa,

mazɔlɔɔ ti ʋalagɛ kpala ga aniiti ma.

10 Doun deeiti ti ga maawɔinɠaa nuiti,

ti ɗa ti-lointi gili diɠii zu,

ti ɠɛ ti ʋɛ ga daamianigi

kidaaʋiligi zu é zeelini nà-nuɓusɛiti ma.

11 Ɠɔoɠɔ GALAGI zeelia ná-ziiɠaawanai ɠwɛ ma,

é ná-ziiɠaawana wolai laaɓadɔa,

é abui ɠaazoni Siyɔn,

naa ma wuulaagiti pɛ galani.

12 Eteai zu masagiti ta nu nɔpɛ

ge la ɓena zoo é ʋa la da,

ga yeeta, pilɛ sɔlɔɔ nui, nii é ga gi zili nui

a la lɛ Zeluzalɛme ga pɛlɛla ʋeleiti.

13 Naa ɠɛɛʋɛ ná-GALA goo wo nuiti ta-ɠotoi ma vaa zu,

ta ná-zalaɠa ɠula nuiti ta-vaaɠaaza golaiti,

niiti ti telebo nuiti

ma ɲamai ʋuuni náʋɛ.

14 Kɛlɛ niizu ta leʋesu taazuʋɛ

eɠɛ gaazuɠole nua,

ti ɠɔzɔai ga ɲamai

eyɛsu nu la zooga é ʋa vɔɔɠu ta-zeɠei ʋa.

15 Ta ɓainsu ti ma ga: «À lɔu li, kɔzɔba nuiti!

À lɔu li, à lɔu li, à mina vɔɔɠu gi ʋa!»

Siɛgi zu ti ʋelazu la ɠana, ti ɗa leʋeteʋe ziiti saama,

ta ɠɛɛzu ti ma: «À mina zei ʋɛ!»

16 Ɠɔoɠɔ GALAGI ɓɔɠɔi ɠa é ti zuvazani,

é la pɔ é ʋa ti ɠaa mɔnɔ.

Ti la ɠɛni unfema veeni zalaɠa ɠula nuiti bɛ,

ɓaa ti ʋa kɛwola wɔlɔiti bɛlɛzei.

17 Gi-ɠaazuʋɛ yɛni nɔ ɓɔlɔzu dɛ,

gi ɗa kpɔbai maaɓɔun fuun.

Gi ɠɛni gá-ɠɔɔɓɔgi zeizuʋɛ, gi ɗa wɛlɛ zii ta luɠɔ,

é la ʋaani é ʋa gi ɠizo.

18 Gi zili nuiti ti ɠɛni gi-ɠɔɠɔ ʋo gaiziɛzu,

gi la mɔ ɠɛni ziɛziɛsu taazuʋɛ.

Gá-eteai ɠana ɓe, gá-voloiti daazeelia,

gi-ɠaaɓelagi zeelia.

19 Gi ɓɛɛ nuiti gola zuvilɛni,

é leʋe koɠɛi ʋa geezuʋɛ.

Ti ɠɛni gi ɓɛɛzu gizeiti ma,

ti ɠɛni seikpɛgi ʋɛɛzu gi ɠaiziɛ vai zu teʋebaiti su.

20 Gá-masagi, nii Ɠɔoɠɔ GALAGI gulɔi ziɛni ma, nii gá-eteai ɠɛni zea,

ti naa zoni ga ta-ʋaliiti,

tama naa ɠa gi ɠɛni ɠɛɛzu ma:

«Gá yɛ ná-niinigi wu, gi gá-eteai ziɛ zii ɠiligiti saama.»

21 Wa zoo wo ɠoozunɛ, Edɔme nuɓusɛiti,

wɔiti wo zeini Use yooi zu!

Kɛlɛ tukpɔɠaaleʋe ɗaawɔi ɠa zeelizu ɓalaa wo ma,

ma lɔɔi ɠa wo zo, wo maaɲakai ɠula!

22 Siyɔn nuɓusɛiti, wo-zalai laazeelia,

nu la mɔ lia ga ɗe duɔla zu pɛ.

Kɛlɛ ɗɔun ɗa, Edɔme, Maliɠii ɠa ɗa-vaaɠaaza golaiti salazu,

toɠa ɗa-ɠotoiti kula kɛlɛma.