1 Kɛ̀ɛleaiti, ni nui ta a zona faaɠaazagi ɠɛɛzuʋɛ, wɔiti GALA Zɛnvui wo ʋa, à pilɛ pele ʋagɔi ʋa, wo sɔle ga sɛsɛbogi. Dama ga ɓɔɠɔ, ɗa ɓalaagi è mina lɔ tɛgai zu. 2 À ʋɛɛ ɓɔɠɔ ʋa wo ɠilagilagi pɛ, wo wa-ɠasɔ wuigiti seɠe, wa ɠolo ɠana Kilista ná-tɔgi ʋɛ. 3 Ni nui ta a ɠisiɛna ga toɠa ga nu ɓii, tama é la vɔlɔ ga ani nɔpɛ, naa ɠa ɓɔɠɔ yaavazu. 4 Ɛsɛ ge ɓɔɠɔ ziɛ ʋelei vɛɠɛlɛfɛɠɛlɛ. Ni toɠa zoo ɓɔɠɔ maamusɛzu, toɠa naa ɠɛ ɓɔɠɔ nɔ ʋɛ, anɛɛ é la ʋokɔɠɔni nu ɠili ma. 5 Mazɔlɔɔ ɛsɛ maanɛɛʋɛ é ɓɔɠɔ ɠasɔi zeɠe.

6 Nui ti kalasu ga GALA daawooi, naa maanɛɛʋɛ é ná-kalamɔin ɠɔ zeaɠɔligi kpein su.

7 À mina ɓɔɠɔ yaava pa, mazɔlɔɔ nu la ɲɛɛɠulaa GALA su. Nii nui fazasu, naa ma lɔnɔgi ɠa a ɗa teʋe. 8 Zɔi é fazai wosu ga kpusɛi yiimai, kpusɛi ná-fai ma lɔnɔgi ɠa ve zea ga saai. Kɛlɛ zɔi é fazai wosu ga Zɛnvu Ɲadegai yiimai, Zɛnvu Ɲadegai ná-fai ma lɔnɔgi ɠa ve zea ga ɠɔoɠɔ zɛnvui. 9 Ade mina ɓɔlɔ ga faanɛɛ ɠɛɛ vai, mazɔlɔɔ da ʋaazu ma lɔnɔgi zɔlɔɔsu yeeɠɛɠala ʋagɔi zu é ʋaazu, ni de iɲɔ ge la ɠɛ leʋeni, de ʋa ɓɔlɔ. 10 Naa ɠa é ba, ni nɔ ma zobogi ɠa de ʋɛ, de ɗa faanɛɛi ɠɛ nɔ ɛsɛ pɛ bɛ, ma un ge daa ma ga naati, niiti ti ga de-ɠɛɛleaiti kidaaleʋei zu.

11 À wɛlɛ zèeʋogi ʋa, ʋelei sɛʋɛ ɠaei ɠaaɓaazagai la, nà ɓɔɠɔi, gè sɛʋɛai. 12 Zɔiti kpein ti tatipɛlɛʋolu vai laazu wo unma ga kasɔ, naama nuiti ka ti wɔinni ti ɓɔɠɔ lɛ ga nu ʋagɔ nuɓusɛiti gaazu. Naama ungi ɠa ti ʋɛ ga faa ɠila kpe nɔ, nu mina ti wɔinzeɠe, é ʋa lo Kilista zaa vai ʋa saa wului ma. 13 Mazɔlɔɔ tɛiti ti tatipɛlɛʋolu vai ɠɛɛzu, ti la tɔgi zosu, kɛlɛ ta pɔ wo lati pɛlɛʋolu, ga ti ʋa ɗa waso ga woye, tɔɔzei ti poogi ʋɛa wo-ɓusɛi ʋa. 14 Kɛlɛ nɔ̀un nà, gè la ɓɔɠɔ lɛbia faa ɠili nɔpɛ su, kɛni ade-Maliɠii Yesu Kilista zaa wului nɔ, tɔun maaʋele ma eteai zaaʋɛ nɔ̀un tetemazu, nà ɓalaa gè za eteai letemazu. 15 Nu latini pɛlɛʋolu, ɓaa nu mina lati pɛlɛʋolu, naa la ga faa ɓii nɔpɛ, kɛlɛ kɛni è ɠɛ ga kpɛtɛani niinɛi. 16 Niiti kpein ta ziɛ ga kala gooi niiti, ziilɛigi ta maawɔinɠai ɠɛ ti ʋa, é ɠɛ ɓalaa GALA ná-nuɓusɛiti ba, Izilayɛle nuiti.

17 Eyɛsu pɛ, nu nɔpɛ ge mina mɔ kpɔ̀lɔ, mazɔlɔɔ nà ziɛzu ga pala ʋiliiti, gè ti zɔlɔɔni kɔ̀lɔgi ma Yesu ná-faa zu.

18 Kɛ̀ɛleaiti, ade-Maliɠii Yesu Kilista ná-zaalai yɛ wo ʋa! Amina!