1 Efelayime a la ɠɛna ɓɔɛa, ɛsɛ pɛ ge ɠɛni luazu.

Tosu wola ɠɛni zea Izilayɛle.

Kɛlɛ é ɓɔɠɔ ɠɛa ga sɔba nui ga Ɓaale lɛbi vai,

naa ɠa é kɛa é zaa.

2 Niizu niina, wɛlɛ ti ya ʋa, ti ta ɓɔsu ta-ɠotoi ʋa,

ti ɗa kɔɔɠɔ ganigiti kpɛtɛ ga ta-walii nii ti gaawuunsu,

ti ɗa kɔɔɠɔ ganigiti saɠa ɓɔɠɔ ʋɛ ga zeaʋagi,

naati kpein ma ta ga ɲɛɛliɠi ɠɛ nuiti ta-wotii.

Kɛlɛ ta ɓɔɛzu ti ʋɔ,

niiti ti nuiti kulazu ga zalaɠai,

naati ka nikɛ yiʋo ʋaaɠulabai

nɛɛnɛzu ga daaʋɛ komagai.

3 Naa ɠa é ba, niima nuiti ta ɠɛ eɠɛ sobuzobu lonaɓiingi, é ɲɛɛlɛzu fala,

eɠɛ sobu nɔɗagi é vɔɔzu gaamanɔ.

Ta ɠɛ eɠɛ molo ɠaʋai, nii fiilɛi pilisu ya,

é kula molo loɠazuʋɛ,

ɓaa eɠɛ duului é ɠulazu pɛlɛ ɠɔmaʋɛ.

4 «Nà ma, Ɠɔoɠɔ GALAGI, nà ɠa gè ga ɗa-ƓALAGI,

kaite názu dɛ è Ezipete yooi zu.

É ɠula nɔ̀un polu, è la GALA kili nɔpɛ kwɛɛ,

kizo nu ɓalaa ge la ná nɔ̀un polu.

5 Nɔ̀un, gè è ɠwɛɛni teʋebai zu,

zou vɔɔi zu.

6 Ti zeelia nɔ feya tufa lɛnugi zu,

pului zeɠe ti ma, ti yiɠoa,

ti yiilaave ga wasogi,

naa ɠa é kɛɛni ti yeemani mà.

7 Tɔ ɠa é ba, nà ɠɛɛzu ti laalɔɠɔma ga zalai,

gè ɠɛ ga kɔii, é pelei ɓɔunsu ti luɠɔ.

8 Gè ti zo eɠɛ filɛ zuai nii ti ma yiʋoiti seɠeai zea,

nà wo-ɠekegi zuʋali.

Nà ti mi, eɠɛʋelei zala zaai a ɗa kɛ la.

Dɔɓɔ zuaiti ta ti ɓulukpulu, ti ti la ga gilagila.

9 Ɓɔɠɔ ʋɛtɛna, ɗa ʋe, Izilayɛle, è ɠoloɠologa.

Ɓɛ ɠili ka a ɓɔ è ʋa?

10 Mini ɠa wa-masagi ná niizu?

É ʋaana, é wo ɠizo, wa-laa wolaiti kpein su!

Wa-lukpɔɠaaleʋe nuiti ta mini?

Wa ɠa wo ɠɛni ɠɛɛzu mà:

‹Masa seina gi unda, ta kundiɠiiti.›

11 Gè masagi veeni è ya nà-ziiɠaawanai zu.

Nà ma, nà kula è ya, nà-ziivilɛi zu.

12 Efelayime ná-faaɠaaza golai zɛʋɛʋɛ,

ná-kotoi makɛgɛ kpaan.

13 Soolɛi ɠa zeeli ma eɠɛ doun ɠoozuwanai.

Kɛlɛ ɠimalala loin ʋe,

sɔlɔɔ yeeɠɛɠalai zeeliai,

é la kɛɛzu é ʋa ɠula dee ɠoozu.

14 Nà ɠa maanɛɛni mu

ga gè ti unmɔɔ kabayeɠei ná-zobogi ma ɓaa,

gè ti ɠizo saai ma ɓaa?

Ee, saai, ɗa-ɠaaɓaai ɠa mini?

Ee, gɔvɛalaazu, ɗa-undaaʋili ma zobogi wɔɔ?

Ti maawɔin la mɔ sòga pɛ!

15 Efelayime ɠaawɔɔlɔ ʋa ɓalaa kɛɛɠɛleaiti saama, fiilɛi ɠa ʋaazu,

Ɠɔoɠɔ GALAGI ná-fiilɛi ɠa zeɠezu teʋebai zu, é lɛ,

é ná-ziɛungiti maaleʋe,

é ná-ziɛyeɠeiti fɔ su.

Ta loo naavolo makɛsuʋɛti su,

ti li ga sɔɔla ɓiigiti kpein.»