1 «Samali nuiti ta ta-vaaɠaazagi zuɓoloi ɠɔmɔ,

mazɔlɔɔ ti ɓakagɛ ta-ƓALAGI laalɔɠɔma.

Boɠa zɔkpɔi ɠa é ti ʋaazu,

ti-lointi undaa ɠa ʋili,

ti-anzai niiti kogi ti ma, ti naati kogiti daaʋali.»

2 Ɠale ma mu, Izilayɛle, Ɠɔoɠɔ GALAGI ʋɔ, ɗa-ƓALAGI,

mazɔlɔɔ ɗa-vaaɠaaza golaiti ka ti è loa.

3 À ʋa Ɠɔoɠɔ GALAGI ʋɔ ga wo-wooiti, à ɠɛ ma:

«Ɗa ɗa faaɠaaza golai kpein suvaayɛ.

Yeezei maamusɛ wooi nii wu,

gi daazeelizu è ma,

ga nikɛ zinɛ zalaɠai ʋotogi.

4 Asiili lɛi a zoo gi ɠizosu,

gi la mɔ lɛa ʋolu kɔɔɠɔ zooiti kɔma.

Gi la mɔ ɓalaa ɠɛa mɔnɔ gá-ɓɛtɛanii ma:

‹Ɗa ɠa è ga gá-ƓALAGI!›

Mazɔlɔɔ, ee, Ɠɔoɠɔ GALAGI,

ɗa ɠa è podoin maawɔinɠaazu.»

5 Ɠɔoɠɔ GALAGI ɠɛ ma: «Nà Izilayɛle ʋalozu ná-wooʋalada zeeɓɛi ma,

nà ti nɛɛzuʋɛ, gwɛlɛpolu la ba,

mazɔlɔɔ zìiɠaa la mɔ wanani ti ma.

6 Nà ɠɛɛzu Izilayɛle ʋɛ eɠɛ nɔɗagi.

Naazu toɠa waa eɠɛ bulɛgi,

sape ɠa lɔ eɠɛʋelei Liɓan lɔɓɔi la.

7 Gaalaagiti ta ɠoozakooza,

toɠa ʋa eɠɛ wolive wului,

maku nɛɛnɛgi ɗa ɠula

eɠɛʋelei Liɓan lɔɓɔi nɔnɔi la.

8 Naati ta ɠale ma, ti ʋa,

niiti ti ɠɛa zeizu màaniinigi wu,

ta vulu su ʋolu ga moloi ɠɛʋele.

Ta waa ga leezɛn ɓelei ɠɛʋele,

ti-lɔɠɔi ɠa ɠula ga Liɓan lɔɔiti kɛʋele.

9 Ee, Efelayime, leeni ɠa gi ɓɔgai ma gá kɔɔɠɔ ganigiti, wa kɔɔɠɔ ganigiti?

Nà ɠa gè ɗa-ƓALA faliiti gaaʋotesu,

gè ɗa wɛlɛ è ma.

Nà ga sipɛlɛ gului nii ma wundui su nɔ ɠɔ,

nà ɠa gè è-ɠaawaaiti feezu è ya.»

10 Zɔi ɠigi wola ma, naa ɠa niima vaiti gaaɠa.

Nii keleɠelegai, naa ɠa ti ɠwɛɛ.

Ɠɔoɠɔ GALAGI ná-peleiti sɔlegɛ,

telebo nuiti ta ziɛ ti zu,

kɛlɛ tɔ koloɠolo nuiti kɔɠɔi ɠa ziɠa ná.