1 Ɓɛ ɠa nuu é ʋaazu, é zeɠe Edɔme,

é ʋaazu de ʋɔ, é zeɠe Ɓosela, ná-seɠei zu ɓɔiɗai?

Ná-seɠeungi velevelegai ma,

kɔgi logai ga é ɗa ziɛ, daai ná-zɛbɛi la?

«Nà ʋe de, Ɠɔoɠɔ GALAGI,

é ɓɔɛzu ga telebodai,

nii zobogi bɛ é wo ɠizo.»

2 Kɛlɛ leeni ɠa é ɗa-zeɠeungi zuɓɔiɗai?

Ɗa-zeɠeiti kɛai eɠɛ nuiti maazeɠei,

niiti ti dɔɔɓɔi gwaai ziɠazu.

3 «Nà ɠila kpe ka gè ɠɛni dɔɔɓɔi gwaai ziɠazuʋɛ,

zunu ɠila kpalaa ge ɠɛni bà nuɓusɛiti saama.

Gè ɠɔɠɔloni nuiti ma nà-ziiɠaawanai zu,

gè ti ɠaayɔni nà-ziiɠulagi zu.

Ti-ma ɲamai vazani nà-seɠeiti ma,

gè nà-seɠeiti pɛ suɓɔini.

4 Gè potokula foloi leveni zìimaʋɛ,

yeeɠɛɠalai zeelia gè nà-nuɓusɛiti unmɔɔ.

5 Gè wɛlɛni mini-o-mini

kɛlɛ nu nɔpɛ ge la ɓɔni bà.

Dàavɔɔni ga nu la yeeveezu bɛ̀.

Naazu ɠa zèei ɓɔni bà la,

nà-ziiɠulagi loni ɠɔɠɔʋolu.

6 Nà-ziiɠaawanai zu gè nuɓusɛiti dɛɛvɛni ɠɔɠɔwu,

gè ti ɠɛɛni unga wuulee nà-ziiɠulagi zu,

gè ti-ma ɲamai ʋuuni ya zooi ma.»

7 Nà ɠizɛsu Ɠɔoɠɔ GALAGI ná-wooɠɛɠiladai zu,

Ɠɔoɠɔ GALAGI maamusɛ ungiti kana ade ʋɛ,

niiti pɛ é ti ɠɛa de ʋɛ,

ná-nuɓɔɠɔla wolai zu Izilayɛle ʋɛlɛyeɠei ʋɛ,

niiti pɛ é ti ɠɛa ná-nɛɛbɛi zu, ta ná-wooɠɛɠilada wolai zu.

8 É ɠɛni ma: «Izilayɛle nuiti ta ga nà-nuɓusɛiti,

doun zunuiti ti la yaava pɛ.»

É ɠɛni ti ʋɛ ga Kizo Nui.

9 Ta-ɠidaaʋiligiti pɛ su, tɔ ɓɔɠɔi yiizoolɛni.

Geezuɠeelai é loni kobaʋɛ, naa ɠa é ti ɠizoni.

Ná-nɛɛbɛi ta ná-maawɔinɠai zu, é ti unmɔɔni.

É ti zeɠeni ga ɠasɔ, é ti la yeeloko zu,

ta-vai pɛ su kaite wɔlɔwɔlɔi zu.

10 Kɛlɛ ti kololalai ɠɛɛni,

ti ná-Zɛnvu Ɲadegai yiiɓɔlɔni.

Naa ɓɔɠɔ ɠɛɛni ga ti zili nui,

é tɔɔzei é ɗa ti zakpe.

11 Ti-ɠigi looni wɔlɔwɔlɔ vaiti su ta Moize, ti ɠɛni ma:

«Mini ɠa naama nui ná,

nii é ná-baala kpulugi ta makɛ nui ɠulani kpoloɗɛi wu?

Zɔi é ná-Zɛnvu Ɲadegai yeini ti zaama,

mini ɠa é ná?

12 É ɠɛni Moize ɠoba, é yeei maale, zeei maayikiai,

é ziɛi ʋalini su ti luɠɔ,

é ɓɔɠɔ lɔɠɔɠula faa ɠɛɛni é wosu eyɛsu ɠɔ.

13 É ti leʋeni ziɛi ɓomaʋɛti,

eɠɛ sooi é teʋebai zu, ti la ɠɛni ɓunɛni.

14 Ti ɠɛni eɠɛ togani ɓulugi é yeizu pɛtugi zu,

siɛgi zu Ɠɔoɠɔ GALAGI ná-Zɛnvui liini la ga tiye dooɠo bosuʋɛ.

Ʋele ɠana è loni la ɗa-nuɓusɛiti tuɠɔ,

è ɓɔɠɔ lɔɠɔɠula maayiki.»

15 Yɛ geeɠɔlɔgi zu, è wɛlɛ,

è yɛ è-zeizu ɲadegai naa volozu,

è naa ɠa nii é zeelizu gi ma.

Mini ɠa ɗa-maayogi ná ta ɗa-yeeɠaaɓaai,

ta ɗa-yiizoolɛi ta ɗa-maawɔinɠai nɔ̀un bɛ?

16 Mazɔlɔɔ ɗa ɠa è ga gi-Ɠɛɛ,

Abalaame la gi ɠwɛɛ,

Izilayɛle ɓalaa la gi ɠwɛɛ.

Kɛlɛ ɗɔun ɗa, Ɠɔoɠɔ GALAGI, ɗa ɠa è ga gi-Ɠɛɛ,

kaite wɔlɔwɔlɔ è-laaseigi ɠa ga:

«Gi unmɔɔ nui».

17 Leeni vaa zu, Ɠɔoɠɔ GALAGI, è gi yɛgai ná, gi ɠaka,

gi maaɠooza ɗa-ʋelei ʋa?

Leeni vaa zu è gi-ɠigiti kpaa,

gi la unfesu è ma?

Ʋa gi ʋɔ ʋolu, ɗa-nɛɛbɛi maaʋele ma ʋɛ,

gɛi gi ga ɗa-wotiɠɛ nuiti,

gi ga ɗa-nuɓusɛiti.

18 Ɗa-nuɓusɛ ɲadegaiti gi zooi zɔlɔɔni ga gɔnɔ.

Su la ɠoozani, gi zili nuiti ti ɠɔɠɔzɔ è zei ʋɛlɛ ɲadegai ʋa.

19 Kaite suɠoozaa gi ɠɛɛʋɛ

eɠɛ nuɓusɛiti è la zeini ti unda,

è-laasei ge la ʋɛɛni ti ʋa!

Ee, ni è ɠɛni geeɠɔlɔgi ʋalizu ga,

ni è ɠɛni yeizu!

Gizeiti ta la ɲiikpi è ɠakalaʋɛ.