1 Ɗa la ɠɛ eɠɛ abui é sosu tiɠilekai ʋa,

ɓaa eɠɛ abui é ziɛi nɛsu,

ɗa la è-laaseigi lɛ ga è zili nuiti,

zii ɠiligiti pɛ koozu ɠa ʋili è ɠakala.

2 Ni ɗa faa maayikia wolaiti kɛɛna,

niiti gi-ɠi ge la ti ʋa,

è ɓena yei, gizeiti ta la ɲiikpi è ɠakalaʋɛ.

3 Kaipa nu la dɛ ta mɛnini,

nu la dɛ naa ta ɠaani ga gala kiligi,

é ɠula ɗɔun è ʋolu,

a zoo é kpɔba ɠɛ nu ʋɛ, é ɠitosu ba.

4 Ɗa naama nui laaɠomi,

zɔi é telebodai ziɛzu ga koozunɛɛi,

ta niiti ti ɠisiɛzu ga ti pelei ziɛ, nii è daai.

È yiiɠaawanani, mazɔlɔɔ gi ɠakani,

kɛlɛ pele mɔungi ɠa ga yɛ ba, gi ɠizo.

5 Gi pɛ gi ɠɛa ga kɔzɔba nuiti,

gá-lelebodai ma ɠɛɛwotii pɛ kɛɛʋɛ eɠɛ seɠei kɔzɔai.

Gi pɛ gi vɔai eɠɛ daai,

gá-vaaɠaaza golaiti ta liizu ga giye eɠɛ fiilɛi.

6 Nu nɔpɛ ge la mɔ ná, nii é wooɠulazu è ma,

é wuzeɠezu é ɠili è ʋa,

mazɔlɔɔ è la mɔ kɛɛzu è ʋa ɠaazulo gi ʋa,

è gi yɛga ná, gi loo zɛbɛsulalai zu

gá-vaaɠaaza golaiti maaʋele ma.

7 Anɛɛ naa ʋe, Ɠɔoɠɔ GALAGI, ɗa ga gi-Ɠɛɛ,

gá ga pɔlɔ liɠi ʋenɛiti, è ɠɛ ga gi lo nui,

gi pɛ gá ga è-yeeiti ta-wotiɠɛ ʋogi.

8 Ee, Ɠɔoɠɔ GALAGI, mina yiiɠaawana gola,

mina yɛ ɠitoozu nɔ gá-vaaɠaaza golaiti su.

Kɛlɛ wɛlɛ lɛɛ, gá ga ɗa-nuɓusɛiti!

9 Ɗa-laa wola ɲadegaiti suɲakaʋɛ ná,

Zeluzalɛme ɠɛa ga teʋebai,

Siyɔn ɠɛa ga adaʋɛ ná ɠoloɠologai.

10 Gá-ƓALA pɛlɛ ɲadegai é volosu,

ʋɛ gi-mɛmɛwolani ti ɠɛni ɗa-lɛbiyai maamusɛzu ná,

miná ɠɛa ga abui laamiizu.

Niiti ti ɠɛni ga gi yiima ani ʋagɔiti, ti pɛ ti ɠoloɠoloni.

11 Ee, Ɠɔoɠɔ GALAGI, ɗa maaɠɛsu kpɔ naama vaa zuɠoloɠologiti kpein ma?

Ɗa maaɠɛsu kpɔ mɔnɔ,

ɗa gi unfesu da ge leʋe ɓaa?