GALA Daawoo Zɛʋɛi Zɔɓe 16

Zɔɓe Elifaze wooɠaaʋote fai

1 Zɔɓe gooɠaaʋoteni, é ɠɛ ma:

2 «Gè naa ɠɛɠala vai ma mɔinmɔin gola mɛniga,

wo kpein wa ga gaanɛɛnɛ nu ɲɔiti.

3 Siɛ kpɛgele ɠa wo ɓesu ɓɔɛzu la eɠɛ fiilɛi?

Leeni ɠa é è ɓɔlɔzu, è ɓɔɛzu ɠani?

4 Nà ɓalaagi nà la zoo ɓɔɛzu ga wo ɠɛʋele,

ni wo ɠɛni pòtogi zu,

gè kpɔɛiti bo wo laalɔɠɔma,

gè nɔ̀ungi ɲiikpi wo maazu ga ɲɛɛɠulasui.

5 Nà la wo iɲɔdɔ ga dàawooi,

gè dàkɔlɔgiti ɲiikpi, naa a la wo yiilɛi.

6 «Anɛɛ naa ʋe, ni nà ɓɔɛzu, nà-kpɔlɔi ɠaa la yeizu,

ni nà maaɠɛna kpɔ, toɠa zeɠe bà ɓaa?

7 Niizu, gaamai zu GALA ge zɛbɛi ɠula zèa,

é nà-pɛlɛyeɠei pɛ gaaleʋea.

8 É kɔ̀lɔgi maaɓilikpiliga, é gòla vɔ ɠae ma.

Naa ɠa pèelalazu, é kɛ̀ ga sɔba nui

niima vai zu é zeelizu mà.

9 GALA ka bàlizu ga ná-ziiɠaawanai zu,

é laalɛ bù, é ɗa ɲiigaiti siɛ ga dàalɔɠɔma.

Sìli nui gaazu ɗa volo su.

10 Nuiti ta laa wolaiti daalaosu dàalɔɠɔma,

ti ɗa gòizuloɠa, ti ɗa gòla ʋoomu,

ti ɠili ʋa dàalɔɠɔma.

11 GALA ge dɔ̀ɔni telebotala nuiti zeezu.

É kɛ̀ɛni ga faa ɲɔu ɠɛ nuiti daamianigi.

12 GALA ge ʋaani, é ziilɛigi ɠula zèa, ʋɛ gè ɠɛni vulua ná.

É sòni kɔ̀poluʋɛ, é sùɓezeɠele.

Gè ɠɛa ga ná-mɛɛinti pilisuʋɛ,

13 ta ɠoʋesu nɔ màaɠoolii pɛ su.

Toɠa sàamaʋɛ zuvolosu, maawɔinɠa la su.

Zìi ma wanai ʋua ya zooi ma.

14 É ɗa palai loo bà, palai ʋoluma,

é ɗa ɓizɛ màazu eɠɛ kɔɔɠuluɓai.

15 Gè saa wɔlɔ wo seɠei zɔlɔɔga, gè too ɠɔba.

Gè gàazu unfegi lɔa fufiligi zu.

16 Gɔlɔ ɲɔuɲɔugi gàazuɠɛzɛiti kpɔiɗa su,

saai ma niinigi ɠa gàazuɓedeɠagiti ba.

17 Anɛɛ naa ʋe, suɲɔu vaa la zèeiti kɔzɔni,

wooveleda la ɠɛɛni nà-GALA falii zu.

18 «Zooi mina mà ɲamai lɔɔɠu,

nà-kpee wooi ɠaa mina yei.

19 Mazɔlɔɔ niizu niina zeele ɠa bɛ̀ geeɠɔlɔgi zu.

Ungo, nu ɠa zèema geezuʋɛ, nii a zeele wooi wo bɛ̀.

20 Bɔ̀ɔlaiti ta ɲɛɛɠulazu sù,

GALA ka nà ɗa wooɠula ma ga gàazuɗɛi.

21 Nà-zeelei ɠɛ ga zaamazu lobo nui

gá GALA gi yɔɠɔzu,

eɠɛ nui nii é bɔɔla nu vului maalobosu.

22 Sìi ma voloi ɠana ɓe,

nà ga li ga pelei naa, nii gè la mɔ ɠalega ma la pɛ.»