1 «Zɛ̀nvu vai ɠaa na ɓaa, sìi ma voloiti ta ɓe,

kabayeɠei ɠa màaɓɔunsu.

2 Ɲɛɛɠulasu nuiti ti la màaɠoolizu ɓaa?

Ta-laazuɠɔlii la vaazu bu, gè ʋa ɲiimɛnii wo.

3 Ee, GALA, ɗa ɓɔɠɔi ɠɛ bɛ̀ ga maalobo nui!

É ɠula è ʋolu, ɓɛ ɠa é minazeɠezu ga nà-faa?

4 Gaamazu, è ti yiilaaɠuluga kidafaawui luɠɔ,

è la vaa bu, ti ʋa zobo sɔlɔɔ.

5 Zɔi é bɔɔlaiti kwɛɛzu ga ti naati zeavoo, toɠa ná-dointi dɔɔzu kpɔlɔi zu.

6 «GALA ge kɛ̀ɛni ga nii ɛsɛ pɛ ge ɲɛɛɠulazu su,

ti ɗa laaɗɛi ʋu gàazuʋɛ.

7 Gàazuɠɛzɛiti ti la mɔ volozu, ti zaa su ga ziizoolɛi,

kpùsɛi kpein ge ɠɛa nɔ eɠɛ niini.

8 Sɔle nuiti daavɔɔʋɛ ga nà-taɓai vaa,

ta sɔbalala nui ɠa wuzeɠezu nu ɲɔi laalɔɠɔma.

9 Anɛɛ naa ʋe, telebo nui ɠaaɓa siɛ ʋelei ma,

nui zeeiti ɲadegai, naa ta ɓɔ ná-gaaɓaai ʋa.

10 Kɛlɛ wɔun bɔ̀ɔlaiti, à ʋa, wo pɛ à ɠale ma, wo ʋa,

gè la ɠima nu ɠila kpalaa kaazu wo zaama!

11 «Nà-foloiti ti leʋega, nà-faazeikpasuiti ti ʋua ya,

zìima vaiti ti la mɔ zolooni.

12 Ta ɠɛɛzu ma: ‹Kpidii ɠa ga foloi, wozakalagi maaɓuɠa,›

tama kpidii ɠa dɛ é ná.

13 Kɛlɛ leeni ɠa niina gè ɠitosu ba? Nà zeizu zɔlɔɔ gɔvɛalaazu,

kpidi yooi zu ɠa gè dàazuʋɛ ɓɛtɛzu ná.

14 Gè ɓainni kabayeɠei ma, gè ɠɛ ma: ‹Ɗa ɠa è ga kɛ̀ɛ!›

Gè ɠɛ duulai ma: ‹Wa ga dèe ta nà-seelaiti!›

15 Mini ɠa deɠɛmu nà-kitogi ná?

Ɓɛ ɠa a zoo é nà-kitogi zuzo?

16 Gá yeizu ga tɔ ʋɔɔma gɔvɛalaazu,

gi felegɔ gá loozu fufiligi zu.»