2 «Ee, wɔ̀inʋɛ ga gè ɓɔɠɔ ɠa nà-kɛʋele wɔlɔmai zu,

siɛgi zu GALA ge ɠɛni ɓaazu la màazu, gè ɗa nà-eteai ziɛ,

3 siɛgi zu ná-sɔmɔgi ɠɛni volozu la màazu,

ná-wozakalagi ɠɛni ɓɔsu bà, gè ɗa kpidii zuziɛ,

4 eɠɛʋelei gè ɠɛni la mɔungi sɛ̀bɛi pɛ gaavɔnigai sù,

siɛgi zu GALA ge ɠɛni la ga nà-pɛlɛyeɠei nɛɛɲɔɠɔi,

5 siɛgi zu Zɛbɛi-Pɛ-Maliɠii ɠɛni bà la dɛ.

Naama ziɛgi zu, dòun zunuiti pɛ ti ɠɛni ɠɛɛzu màaɠoolii zu.

6 Naama ziɛgi zu, gè ɠɛni lasesu undaanɛɛi zu,

gulɔ ɓoigi ɠɛni yeizu nà-gulɔ ɓɛtɛzuʋɛ.

7 «Nà la ɠɛna ɠulaa, gè ʋa li taa ziɠidaʋɛ,

siɛgi zu gè ɠɛni liizu la, gè seizuʋɛ ɓɛtɛ maaɓɔ bosuʋɛ,

8 nu niinɛiti ta la kàana, ti ɓena ʋoluazo,

kɛwola wɔlɔiti ti wuzeɠe, ti lo.

9 Kundiɠiiti ti ɓena kpɔɛzuɠulai yɛ ná,

ti yeeʋɛɛ la, ti maaɠɛ kpɔ.

10 Nu wolaiti ti ɠɛni maaɠɛsu kpɔ,

ti-nɛgi ɠata ti-laaɠoozuʋɛ ʋa.

11 «Zɔi a la gòoi mɛnina, naa ɠɛni ɠɛɛzu mà, undaanɛ nui.

Zɔi a la kàana, naa ɓena li, é nà-faa ʋagɔi wo.

12 Gè ɠɛni maanɔɠɔ nuiti kulazu, niiti ti ɠɛni kpɔbai ɠaiziɛzu,

ta podoin ɓalaa, nii é la ɠɛni kpɔba zɔlɔɔsu.

13 Niiti ta la ɠɛ saa yeɠei la, naati ti ɠɛni tuya loozu bɛ̀.

Gè ɠɛni poanzaiti koozunɛɛzu.

14 Telebodai ɠa é ɠɛni kɔ̀ba ga seɠei,

faa zɔle fai ɠɛ kɔ̀ba ga seɠeungi, ta bɔɔlɔgi ùnba.

15 Gè ɠɛni ga gaazuɠole nuiti gaazuɠɛzɛi,

ta kɔɠɔ ɠoloɠolo nuiti kɔɠɔi.

16 Gè ɠɛni ga bala nuiti ti-ɠɛɛ,

gè ɠɛni wɛɛinti maavaiti gaaɠulazu ba.

17 Gè ɠɛni nu ɲɔi ɓalɔɠaeiti galeɠalezu,

gè daamianigi ɠula ɲiigaiti ga.

18 «Gè ɠɛni ɠɛɛzu ma naazu:

‹Nà zaazu mà laɠagi zu,

sìi ma voloi ɠa mɔinzu eɠɛ ɲaɠaegi.

19 Gè ɠɛa eɠɛ gulu wolai, kɔɠɔi ziɛi wu,

kpidii nɔɗagi ɠa yeizu, é ɗa ʋu mà ɓekegiti ga.

20 Nà tɔɠɔɠula niinɛ zɔlɔɔ ʋolu,

ta zɛbɛ niinɛi, eɠɛ mɛɛin maalegai.›

21 «Naama ziɛgi zu, ti ɠɛni wòilosu, ti ɗa maaɓɔun,

ti ɗa maaɠɛ kpɔ, ga ti woilo nà-tɛnɛ gooiti ma.

22 Nà la ɓena ga ɓɔɛ, nu la ɠɛni maaɠaalia,

dàawooi ɠɛni ʋilɛsu ti pɛ ma, pein, pein.

23 Ti ɠɛni màaɓɔunsu, eɠɛʋelei nu a ɗa tonai maaɓɔun da.

Ti-ɠigi loni bà, eɠɛʋelei a ɗa ɠɛ la foɠo lonai ʋa.

24 Gè ɠɛni ɲɛɛzu ti ʋɔ, kɛlɛ ti la ɠɛni laani da,

gàazuʋɛ ná ɠɛni volozu, ti la ɓena zoo ti ʋa naama voloi ɠaaʋa.

25 Gè ɠɛni ti untuɠɔ, gè ɗa pelei lɛ ga tiye,

gè ɠɛ ti zaama eɠɛ masagi nii é ná-salaʋusu ɓulugiti saama,

eɠɛ nui nii é iɲɔteʋe nuiti gaanɛɛnɛzu.»