30
1 «Kɛlɛ ee, za, wɛlɛ nà ʋa, gè ɠɛa ga ɲɛɛɠulasu anii nu niinɛiti zea,
niiti gè ti-ɠɛɛni wɔinzeɠeni, gè la ɓena zoo gè ʋa ti ɓɔ nà-gilɛiti ba,
ti ʋa ɠɛ ga nà-togani ɓulugi makɛ nua.
2 Leeni ɠa ti-yeei ná-zɛbɛi a kɛ bɛ̀?
Ti-zɛbɛi ɲɛɛlɛni.
3 Ti-zuvikɛi ɠulaʋɛ ti ya, baladai ta pului ʋɛ.
Ta ani ɠaiziɛzu teʋebai zu,
ʋɛ kaite ná ɠoloɠologai, ná ɠaaʋala ba.
4 Ta tufa ɲɔiti tɔɔɠulazu, kpɔvɔ goiti saamaʋɛ,
ti-laamianigi ɠa nɔ ga gului daa ga zenɛ, naa ma zapei.
5 «Ti ti ɓɛ nuɓusɛiti saama,
ti ɗa ɓain ti ma, eɠɛ ta ɠɛ unma nu ʋolu.
6 Ti ɗa zeizu ɠaiziɛ pɛtu zeɠeiti su,
ta zeɠeiti su, ti wɔai zooi ʋa, ta fasa yeɠeiti.
7 Ti ʋu ɓɔɠɔ ma, ti lɔɔɠu ɠaingiti bu,
ta-ɓee wooi ɗa ɠula, kpɔvɔ goiti saamaʋɛ.
8 Ɠimalala nuiti, nuiti daasei ge la ti ʋa.
Ti ɓɛai, ti ɠula zooi ʋa.
9 «Wɛlɛ, niizu ti dàalɔa guye zu,
gè ɠɛa ti-laa ga faalaalii.
10 Wɔ̀inzeɠeʋɛ ti ma, ti ɗa maaɠooza bà,
ti la inɛinɛsu ga ti-laaɗɛi ʋuu vai gàazuʋɛ.
11 É zo niizu ma, GALA ge gàalɛɠɛga, é ùnfe,
ti la mɔ daazu ma kpɛ ga nà-faa.
12 Maawɔin nui niiti ta wuzeɠezu zèezazuʋɛ,
naati ta pɔ ga ti kɔ̀ɠɔyɛʋɛ bù.
Ti ɗa maanɔɠɔ ʋeleiti to bà.
13 Ta nà ɓɔɠɔi nà-peleiti teʋezu tùɠɔ, ti ùndaaʋili botii ɠɛ,
tɛiti nu nɔpɛ ge la ɠɛni ɓɔsu ti ʋa.
14 Ta zeelizu mà ga zeɠe wolai laa ʋelei,
ta ɠaazuvilɛzu, ti lɔ ani ɠoloɠologaiti bu.
15 Maalua vai ma zii pɛ ka seeliai mà,
gàazu unfegi ɲɛɛlɛa eɠɛ fiilɛi lugi.
Nà-undaanɛɛi leʋega eɠɛ tonaɓiingi é ɓizɛzu.
16 «Niizu, zɛ̀nvui ɠa na ɠula zèa.
Mazɔlɔɔ kpɔlɔi ma voloiti ti zeelia nà ɓɔɠɔi ma.
17 Kpidii ɠa mà ɠaeiti bɔɔzu dùɠuzuʋɛ.
Taɓai nii é mìizu, naa la ɓɔlɔzu.
18 É nà-seɠei zogɛ ga maaɓaai,
é ɗa kpàkpa eɠɛ seɠei nii kɔgizu lɔiɗɛi.
19 GALA ge pìlini ya palaʋalai zu,
gè ɠulaa ga fufiligi ta zuʋui.
20 «GALAGI, gè è lolini ga è ɓɔ bà, è la gòoɠaaʋoteni.
Gè loga è ɠaazu, è ɗa wɛlɛ bà nɔ.
21 Kɛlɛ ɗa-vai ɓaa nɔ̀un tetema!
È laalɛa bù ga è-yeei zuɲɛgi pɛ.
22 È fiilɛi ɠɛa ga sooi, è li ga ze kɔma.
Fiilɛ wolai ɲìikpiga mini-o-mini.
23 Mazɔlɔɔ gè kwɛɛ ga pagɔ ga ɗa liizu ga ze saai ʋɔ bɛ,
ʋɛ ná ɓɛtɛai ga fuluaniiti kpein koinsuʋɛ.
24 Kɛlɛ zɔi undaaʋilisu, é la ɗa ga yeelɛa ɓaa?
Zɔi é faaɓaagi laawu, é la ɗa ga kpeei loa ɓaa?
25 «Anɛɛ naa ʋe, mɔungi zu, gè la ɠɛni wɔlɔni naati bɛ ɓaa, niiti eteai ɓaani ti ma?
Zìi la ɠɛni kpɔlɔzu ɓaa, nà la bala nui ɠaana kpɔlɔi zu?
26 Mazɔlɔɔ kìgi ɠɛni undaanɛɛi ʋa, maanɔɠɔi ɠa paai.
Gè ɠɛni wozakalagi maaɓɔunsu, kpidii ɠa paai.
27 Sàsu ɠa ɓalizu nɔ ɠɔ, kwɛ ge la ba.
Kpɔlɔi ma voloiti ti ʋaa, ti zeeli mà.
28 Nà ziɛzu gɔlɔɗɛi zu, gè la ɠaazu laazu foloi ma.
Nà wuzeɠezu kpɔgi zu, gè kpeei loo.
29 Gè ɠɛa ga koʋeiti ti-ɠɛɛloin,
ta saa wɔnigiti siɛpoluɲɔɠɔi.
30 Kɔ̀lɔgi lɛiɗa mà tiintiin,
kàeiti ti ɗa ɠala ga kɔɔlɛɓadii.
31 Nà-kɔnigi ɠa zeizu gɔlɔ wo nuiti gooi wu,
nà-koolei ɓalaa ɠa gɔlɔ wo nuiti gooi loozu ma.»