42
Zɔɓe ná-gooɠaaʋote gaaɓelagi
1 Zɔɓe Ɠɔoɠɔ GALAGI wooɠaaʋoteni, é ɠɛ ma:
2 «Gè kwɛni ga ɗa zoo é fai pɛ kɛ,
faa nɔpɛ ge la pele ɓesaga è luɠɔ, è ʋa ɓe ɗa-leveiti kɛɛzu.
3 È ɠɛni ɠɛɛzu mà: ‹Ɓɛ ɠa ga ɗe, è ʋa nà-deveiti gaaʋala ba ga ɠimalala ɓɔɛzuɠulaiti?›
Ungo, gè ɠɛa ɓɔɛzu é ʋilɛ faiti ba, gè la ɠɛni ti ɠaaɠaani,
ti ɓudɛai màazu, gè la ɠɛni ti ɠwɛɛni.
4 È ɠɛni ɠɛɛzu mà: ‹Woilo, nà ɓɔɛzu è ʋɔ,
nà ʋaazu è ɠaazaɠasu, ɗa kàlasu.›
5 Gè ɠɛa ɗa-vai mɛnisu,
kɛlɛ niizu gè ɠaazulaa è ma.
6 Naa ɠa é ba, gè ɓɔɠɔ ʋeelalaa,
gè nimiza, gè la fufiligi zu ta zuʋui.»
Zɔɓe ná-fai ɠaaɓela ʋelei
7 Ɠɔoɠɔ GALAGI ɓegai ma ga niima ɓɔɛiti bo Zɔɓe ma, Ɠɔoɠɔ GALAGI ɠɛni Teman nui Elifaze ma: «Zìiɠaawanaʋɛ è ma, wa è-wɔɔla felegɔiti, wo la ɓɔɛni ga gaamai é ʋa ʋilɛ bà, eɠɛʋelei nà-botiɠɛ nui Zɔɓe kɛai la. 8 Niizuʋɛ, à nikɛ zinɛ lɔfela zeɠe, ta baala sinɛ wola lɔfela, wo lii la nà-botiɠɛ zunui Zɔɓe ʋɔ bɛ, wo ti ɠula ga gala zalaɠai. Nà-botiɠɛ zunui Zɔɓe ɠa GALA fali wo ʋɛ, ʋelei gè unfesu ma la, gè la wo zoga eɠɛʋelei wa-ɠimalala vai la, mazɔlɔɔ wo la ɓɔɛni ga gaamai é ʋa ʋilɛ bà, eɠɛʋelei nà-botiɠɛ zunui Zɔɓe kɛɛni la.»
9 Elifaze nii é ga Teman nui, ta Ɓilidade nii é ga Suɠa nui, ta Sofaal nii é ga Naama nui, ti liini, ti naa ɠɛ, nii Ɠɔoɠɔ GALAGI boni ti ma. Ɠɔoɠɔ GALAGI woiloni Zɔɓe ná-fali wooi ma.
10 Naa ʋoluma Ɠɔoɠɔ GALAGI Zɔɓe wuzeɠeni ʋolu, siɛgi zu é GALA falini la bɔɔlaiti bɛ. Nii kpein Zɔɓe ʋalani ma, é naama ʋɛɛda felegɔi veeni zea vɔlɔ. 11 Zɔɓe kɛɛɠɛlointi kpein, zunu geleiti, ta anzanu geleiti, ta bɔɔla ʋagɔiti, ti ʋaani pɔ bɛ ná-pɛlɛi wu, ti laami ʋɔɔma. Ti ta-wɔinlai ɠulani bɛ kɛlɛma, ti gaanɛɛnɛ, tɔɔzei maanɔɠɔi kpein faa zu nii Ɠɔoɠɔ GALAGI seini ma. Ti ɠilagilagi ti wali ɠaei veeni zea, ta zanu balaɠaegi.
12 Ɠɔoɠɔ GALAGI tuya looni Zɔɓe ʋɛ ná-eteai ma ɠaaɓelagi zu, é leʋe ma mɔungi ʋa. Togani goiti é ti zɔlɔɔni, naa ɠɛni ga waapuugɔ maazu naani (14.000), ɲɔmɛi ɠɛni ga waadɔzita (6.000), nikɛi ɠɛni ga waafelegɔ (2.000), ta soovale saai ɠɛni ga waagila (1.000). 13 É doun zunu lɔfela zɔlɔɔni, ta doun anzanu saʋagɔ. 14 É anzanu loun mɔungi laasei pɛɛni ga Yemima (nii poluʋɛ ga «kpumagoi»). É felesiɛi laasei pɛɛni ga Kezia (nii poluʋɛ ga «gulɔ maku nɛɛnɛgi ma wului ma ʋuai»). Saʋasiɛi laa ɠɛni ga Kelɛn-Ɠapuke (nii poluʋɛ ga «gaazuɠɔpolu ʋodai»). 15 Pa anzanuiti kpein ti ɠɛni zooi ná zu, tanɔpɛ ge la ɠɛni ʋani ga Zɔɓe ná-doun anzanuiti kɛʋele. Ti-ɠɛɛ tɔnɔ veeni ti ya poganii zu, ga ti-ʋaazeelaiti kɛʋele.
16 Naama vaiti teʋe ga ʋoluma, Zɔɓe yɛni vulua, é kɛ ga kona ungila kona ʋuunaani (140), é ná-dointi ka, ta ná-doun zunuiti ti-lointi, eyɛsu ɠɛɠalama naanigɔ. 17 Naa ʋoluma, Zɔɓe zii zuɠoozani, é wɔlɔzaɠa gola é ʋa leɠa za.