GALA Daawoo Zɛʋɛi Guyeiti 1

GALA Sɛʋɛi Ma Wuyeiti

Sɛʋɛi lɔɔzeizuʋɛ ma woo mɔungiti

Sɛʋɛi nii ɠa ga guye zɛʋɛi ta GALA maanɛɛnɛ zɛʋɛi. Eɓulu wooi zu, daaseigi ɠa ga «Maamusɛ wuyeiti». Tama guye mɔinmɔin ka su, niiti ti GALA maamusɛzu ti zu, kɛlɛ guyei ma zii ɠiligaa ta su ɓalaa. Tanigaa ta ga GALA falii, GALA ná-kpɔbai maaloli fai zu, tanigaa ma ti ga gɔlɔ wooiti niiti ti ziiɓɔlɔ wolai ɠulazu kɛlɛma. Guyei tanigaa ta Izilayɛle masagi maamusɛzu, tanigaa ti ɗa nuiti kala ga ɠimalai ta GALA ziimai, naa ʋɛɛ faa ɠiligaa ʋa. Nu mɔinmɔin ka é guye zɛʋɛi nii zɛʋɛai, gaalɛba vai kona un mɔinmɔin seɠeʋɛ. Guyei tanigaa ta guye wɔlɔma wɔlɔmagiti niiti ti zɛʋɛai masagi Davide ná-yeeɠɛɠalai zu. Tama GALA daawooi ɓɔɠɔi ɠɛ Davide ma guyei ma mɔinmɔin sɛʋɛʋɛ. Tanigaa zɛʋɛʋɛ siɛgi zu Zuifuiti ti ɠaleni la ma, ti ɠula duɔlai zu Ɓaɓilɔne. Faaɠwɛ nu wolaiti ti ɠɛ guye zɛʋɛi zeelini kwɛgi ma kona unnaanigɔiti zɔɠɔzuʋɛ ta unfelegɔi (400-200), aisa Yesu Kilista ʋa zɔlɔɔ. Kɛʋele ɠaaɓelagi naa zu guye ungila puulɔɔlugɔi (150) naati gaaɠwɛʋɛ su ga guye zɛʋɛ ʋɛlɛʋɛlɛ dɔɔlugɔ. É ɠɛni ga guye ɓaa GALA falii, ti pɛ ti zɛʋɛʋɛ kidafaawui ɠɛʋelei zu.

Guye zɛʋɛi nii ɠa sɛʋɛi naati saama, niiti ti wola ɠwɛɛgai ta ti lɔɠɔ wola ɠulaai GALA Daawoo Zɛʋɛi zu. Ti ɠɛni sɛʋɛi nii wola ɠalasu gaalɛbaiti su, GALA sei ʋɛlɛi wu Zeluzalɛme. Guyeiti ta ade ɠalasu ga ʋelei nu a GALA fali ɠɛɛ la, ta é GALA maamusɛ. Guyei puufelegɔ maazu saʋagɔi (23) nu mɔinmɔin iɲɔdɔa, niiti saa loai ti ma. Guyei puulɔɔlugɔ maazu ɠilagi (51) ɓɔga ma mɔinmɔin ba, ti lo zoga ga ta-ɠotoiti GALA gaazu. Guyei ungila puugɔi (110) ɠa iɲɔdɔɔi ta kitogi veezu é lo Mesi ʋaa vai ʋa, nii é ɠɛɛzu ga masagi ta zalaɠa ɠula nui.

Unsosuʋɛ

1. Sɛʋɛ mɔungi zu wuyeiti ta ga 1 é li 41.

2. Sɛʋɛi velesiɛi zu wuyeiti ta ga 42 é li 72.

3. Sɛʋɛi zaʋasiɛi zu wuyeiti ta ga 73 é li 89.

4. Sɛʋɛi naanisiɛi zu wuyeiti ta ga 90 é li 106.

5. Sɛʋɛi lɔɔlusiɛi zu wuyeiti ta ga 107 é li 150.

Sɛʋɛ Mɔungi

(Guyeiti 1—41)

Undaanɛ ɠitei

1 Undaanɛ nu ɠa ga naa, nii é la ziɛzu ga faa ɲɔu ɠɛ nuiti ta-lɛnɛ gooi,

é la ziɛzu ga kotoba nuiti siɛ ʋelei,

é la zeizu ɲɛɛɠulasu nuiti ta-ɓɔkpɔgi ma.

2 Kɛlɛ ziima vai ɠa ga Ɠɔoɠɔ GALAGI ná-tɔgi,

é ɗa ɠizɛ ná-tɔgi zu, folo ʋɛɛ kpidi ʋa.

3 Kɛɛʋɛ eɠɛ gului nii siingai ziɛlaʋɛ,

é gwaai wosu ga gwaa yeeɠɛɠalai,

gaalaagi la ʋooloa,

nii kpein é kɛɛzu, ta ɗa zoloo.

4 É la ɠana ga faa ɲɔu ɠɛ nuiti,

ti ɠɛɛʋɛ eɠɛ molo ɠalai fiilɛi liizu la.

5 Naa ɠa é ba, faa ɲɔu ɠɛ nuiti ti la losu zɔlɔɔga tukpɔɠaaleʋe voloi.

Kotoba nuiti ɓalaa, ti la zeizu zɔlɔɔga telebo nuiti saama.

6 Mazɔlɔɔ Ɠɔoɠɔ GALAGI ɠaazu ɠa telebo nuiti ta-ʋelei ʋa.

Kɛlɛ kotoba nuiti ta-ʋelei ɠa liizu ga tiye undaaʋiligi zu.